American Institute of Architects
American Institute of Architects (AIA)
Washington, DC
Verenigde State
Stigting
23 Februarie 1857
Tipe
Nie-regeringsorganisasie (NRO)
Hoof uitvoerende beampte
Robert A. Ivy, FAIA
AIA Voorsitter
L. Jane Frederick, FAIA
Webtuiste
www.aia.org
Die American Institute of Architects (AIA) is die leidende beroepsorganisasie van Amerikaanse argitekte wat in 1857 deur dertien argitekte in New York gestig is en sy hoofkwartier sedert 1898 in die historiese Octagon House in Washington, DC gehad het. Die hoofkantoor is later verskuif na die American Center for Architecture, 'n moderne kantoorgebou vlakby Octagon House wat in die 1960's opgerig is.
Die AIA se ledetal van meer as 94 000 sluit gelisensieerde argitekte (AIA - Licensed Architects), beroepslui in bouverwante beroepe soos bou-ingenieurs en vennote in wat in meer as 260 afdelings op deelstaat- en plaaslike vlak georganiseer is. Die eerste internasionale AIA-afdeling vir Amerikaanse argitekte en praktyke, wat in die buiteland werksaam is, is in 1993 in Londen gevestig. Later het afdelings in vastelandse Europa (1994), Hong Kong (1997), Japan (2005), die Midde-Ooste (2010) en Shanghai (2015) gevolg.[1]
Die AIA voer 'n verskeidenheid programme deur ter bevordering van die argiteksberoep. Sy aktiwiteite sluit ook die toekenning van eerbewyse en pryse in soos die AIA se Goue Medalje en die Architecture Firm Award. Die AIA tree daarnaas as gasheer op van die jaarlikse AIA National Convention and Design Exposition, een van die grootste vergaderings van argitekte en professionele ontwerpers in die Verenigde State. Die AIA organiseer 'n jaarlikse konferensie oor argitektuur waarvan die volgende, die A’20 Conference on Architecture 2020, tussen 14 en 16 Mei 2020 in Los Angeles gehou sou word.[2] Die konferensie is as gevolg van die Koronavirus-pandemie gekanselleer en sal nie herskeduleer word nie.
Architectural Adventures
wysigDie AIA het vanaf 2016 tot 2020 sy eie reisprogram vir argitektuur-entoesiaste of ander belangstellendes na internasionale bestemmings met 'n belangrike argitektoniese en kulturele erfenis georganiseer. Deskundiges het as toergidse agtergrondinligting oor die betrokke plekke in 'n internasionale konteks verskaf.[3] Deelnemers kon learning units (LUs) verwerf (waarvan 'n bepaalde aantal as HSW credits erken word).
In 2020 sou klein toergroepe van Architectural Adventures-reisigers besoeke bring aan Havana, Trinidad en Cienfuegos in Kuba, Egipte, die waterweë van Nederland, Japan, Portugal en Noord-Spanje, Berlyn, Marokko, Brasilië, Peru, die Ryn, die Donau en die Baltiese hoofstede Tallinn, Riga en Vilnius. Die toere is as gevolg van die Koronavirus-pandemie gekanselleer. Vroeg in Augustus 2020 het die AIA besluit om die Architectural Adventures-program heeltemal te staak. In plaas daarvan word die reisprogram van National Trust Tours aanbeveel vir AIA-lede. 'n Aantal toere, wat vir 2021 beplan word, is in samewerking met Architectural Adventures saamgestel.
Verwysings
wysig- ↑ new.aia.org: History. Besoek op 22 Mei 2016
- ↑ AIA Conference on Architecture 2020. Besoek op 7 November 2019
- ↑ "Architectural Adventures: Destinations. Besoek op 7 November 2019". Geargiveer vanaf die oorspronklike op 3 Augustus 2017. Besoek op 5 Desember 2017.