Consumer Electronics Show
Die Consumer Electronics Show (CES) (Afrikaans: skou vir verbruiker-elektronika) is 'n internasionale handelskou vir inligtingstegnologie en elektroniese verbruikersware wat jaarliks in Januarie oor vier dae in Las Vegas se Convention Center gehou word. Die tentoonstelling is net toeganklik vir vakbesoekers en joernaliste en staan nie oop vir die breë publiek nie. Die handelskou word deur die Consumer Electronics Association (CEA) gereël, 'n Amerikaanse handelsorganisasie vir elektroniese verbruikersware.
Die CES bied vir belangrike vervaardigers van elektroniese verbruikersware 'n geleentheid om nuwe produkte bekend te stel of innovasies aan te kondig. So is die handelskou, wat jaarliks sowat 140 000 besoekers lok, steeds 'n belangrike aanwyser vir ontwikkelings in die IT-bedryf.
Geskiedenis
wysigDie eerste CES is in Junie 1967 in New York gehou. Dit het uit die Chicago Music Show voortgespruit wat tot op daardie tyd die belangrikste handelskou vir elektroniese verbruikersware was. Die eerste tentoonstelling met meer as 100 uitstallers het destyds 17 500 vakbesoekers gelok. Die openingstoespraak is deur die destydse voorsitter van Motorola, Bob Galvin, gehou.
Tussen 1978 en 1994 is die CES halfjaarliks gehou - in Januarie was Las Vegas die gasheerstad vir die Winter Consumer Electronics Show (WCES), terwyl die Summer Consumer Electronics Show (SCES) in Junie in Chicago aangebied is.
Terwyl die winterskou in Las Vegas in 1995 nog 'n groot sukses was, het die somertentoonstellings in Chicago steeds minder belangstelling by uitstallers en vakbesoekers gewek. So het die organiseerders begin eksperimenteer en die handelskou elke jaar in 'n ander stad gehou. Die CES 1995 was geskeduleer om in die Philadelphia Convention Center gehou te word. Maar aangesien E3, die eerste handelskou vir elektroniese spelletjies, op dieselfde naweek aan die Weskus gehou is, het baie uitstallers protes aangeteken. Die CES-somerskou in Philadelphia is derhalwe gekanselleer.
Die volgende winterskou is in Januarie 1996 weer in Las Vegas aangebied. Die somerskou, wat in dié jaar in Orlando, Florida gereël is, het egter min belangstelling by tradisionele uitstallers gelok. Daarenteen het die winterskou van 1997 in Las Vegas weer 'n groot sukses geword. Die volgende somerskou was geskeduleer om saam met die COMDEX-lenteskou in Atlanta, Georgia gehou te word, maar nadat slegs 'n tiental uitstallers vir die CES-gedeelte van die skou geregistreer het, is dit gekanselleer.
In 1998 het die handelskou na 'n nuwe jaarlikse formaat met Las Vegas as gasheerstad oorgeskakel. Vir Las Vegas is dit een van die grootste tentoonstellings wat tot 18 dae neem om opgebou, gehou en afgebou te word.
Eksterne skakels
wysig- Amptelike webtuiste van die CES Geargiveer 6 Julie 2007 op Wayback Machine
| Wikimedia Commons bevat media in verband met Consumer Electronics Show. |