Groot Piramide van Giza
Die Groot Piramide van Giza (ook bekend as die Groot Piramide van Cheops) is die oudste en grootste van die drie piramides in die Dodeakker van Giza wat grens aan die stad El Giza, Egipte. Dit is een van die oudste van die Sewe Wonders van die Antieke Wêreld en die enigste een wat redelik ongeskonde behoue gebly het.
| Groot Piramide van Giza | |
|---|---|
 Die Groot Piramide van Giza
| |
| Datum | Omstreeks 2560-2540 v.C. |
| Hoogte | 146,5 m (oudheid) 138,8 m (hede) |
| Basis | 230,4 m |
Na aanleiding van ’n inskrywing in ’n kamer wat die werkspan noem en ’n verwysing bevat na die vierde dinastie van farao Cheops,[1][2] glo Egiptoloë die piramide is oor ’n tydperk van 10 tot 20 jaar as ’n graftombe gebou, tot omstreeks 2560 v.C. Dit was aanvanklik 146,5 m hoog en was 3 800 jaar lank die hoogste mensgemaakte struktuur in die wêreld. Daar was al verskeie wetenskaplike en alternatiewe teorieë oor die boutegnieke van die piramide. In die meeste word aanvaar dat groot klippe van ’n steengroef af gebring en opgelig is tot op die regte plek.
Daar is drie bekende kamers in die Groot Piramide. Die laagste kamer is in ’n rotsbodem uitgekap en die res is bo-op gebou. Die sogenaamde Koningin- en Koningskamer is hoër op in die struktuur. Dit is die enigste piramide in Egipte wat gange na bo en onder bevat.
Die hoofdeel van die Giza-kompleks is ’n stel geboue wat twee tempels ter ere van Cheops insluit (een naby die piramide en die ander naby die Nyl), asook drie kleiner piramides vir Cheops se vroue, ’n selfs kleiner "satelliet"-piramide wat die twee tempels verbind en kleiner graftombes vir adellikes.
Verwysings
wysig- ↑ Vyse, H. (1840) Operations Carried on at the Pyramids of Gizeh in 1837: With an Account of a Voyage into Upper Egypt, en Appendix. Vol I. Londen: James Fraser, Regent Street.
- ↑ Dallas and Dr Zahi Hawass inside the Great Pyramid. BbC One, Egypt's Lost Cities.