Wikipedia

KV46

KV46 in die Vallei van die Konings by Thebe, naby die moderne stad Luxor in Egipte, was die grafkelder van Joeja en Toeja. Hulle was die ouers van koningin Tije, die hoofvrou van farao Amenhotep III.

KV46
Die grafkelder van Joeja en Toeja
Die plan van die inhoud, soos in 1908 deur Quibell gepubliseer.
Die plan van die inhoud, soos in 1908 deur Quibell gepubliseer.
Ligging Vallei van die Konings
Land Vlag van Egipte Egipte
Ontdek 5 Februarie 1905
Uitgrawings deur James E. Quibell
Versiering Onversier
← Vorige
KV45
Volgende →
KV47

Hulle grafkelder is in Februarie 1950 ontdek deur die Egiptoloog James E. Quibell, en uitgrawings is gedoen onder die borgskap van die Amerikaanse miljoenêr-sakeman Theodore M. Davis. Die graf is in antieke tye beroof, maar 'n groot deel van sy oorspronklike inhoud het bewaar gebly, onder meer kiste, beddens, stoele, 'n stydwa en verskeie flesse. Verder is die onversteurde mummies van Joeja en Toeja in hulle kiste ontdek. Voor die ontdekking van Toetankamen se graf is dit beskou as een van die grootste ontdekkings in Egiptologie.[1]

Ligging en ontdekking

wysig
 
'n Uitgrawer langs die buitenste kis van Joeja.

KV46 bestaan uit 'n trap met 15 treetjies wat afloop na 'n gang, nog trappe en nog 'n gang tot in 'n reghoekige grafkamer.[2][1] Die mure is nie versier of afgerond nie, waarskynlik weens die swak gehalte van die kalksteen.

Die grafkelder is op 5 Februarie 1905 ontdek, en uitgrawings is deur James Quibell gedoen namens Theodore Davis. Die graf lê in 'n syvallei tussen KV3 en KV4.[3][4] Die gebied was bedek met 'n "groot hoop klipgruis, duidelik kunsmatig, en duidelik vir 'n lang tyd onaangeraak". Quibell het vermoed dit kan 'n vroeëre grafkelder versteek.[4] Davis het nie verwag dat veel gevind sou word nie.[5]

Op 12 Februarie was die deur na die grafkelder heeltemal oop en 'n deel van die binnekant kon gesien word. Die volgende oggend het Davis; Arthur Weigall, nuwe hoofinspekteur van antiekhede; en die Egiptoloog Gaston Maspero die graf met kerse binnegegaan.

In 'n soeke na die eienaar van die graf het Maspero die naam "Joeja" gelees. Hulle het die volgende dag met elektriese ligte ingegaan. Die plek was vol allerhande voorwerpe soos kisstelle, begranisflesse, 'n strydwa, beddens en stoele. Die ongeskonde mummies van Joeja en Toeja was nog in die kiste.[6]

Inhoud

wysig

Tot met die ontdekking van Toetankamen se graf in 1922 was dit die rykste en bes bewaarde grafkelder in die vallei, en die eerste een waarin alles nog op hulle oorspronklike plek gestaan het.[1]

 
Die troon van Sitamoen.

Meubels het oral rondgestaan, Die grootste van drie stoele het links van die deuropening gestaan. Die stoel, bekend as die "troon of stoel van prinses Sitamoen", is van 'n rooi, verniste hout met goue versierings. Op die rugkant is twee tonele van Sitamoen, Joeja en Toeja se kleindogter. Op 'n ander, vergulde stoel is 'n toneel van 'n sittende koningin Tije, met 'n groot kat onder haar stoel, vergesel van Sitamoen, asook 'n ander dogter op 'n papirusboot.[7][8]

Die groot houtsarkofae en kisstelle vir Joeja en Toeja het die grootste ruimte in die grafkamer beslaan. Joeja s'n was teen die noordemuur en Toeja s'n teen die suidemuur; albei sarkofae was na wes gedraai. Die enorme grootte dui daarop dat hulle in die grafkamer aanmekaargesit en moontlik afgerond is, want daar was geen onderbrekings in die goue versierings nie. Die bewyse van grafrowery was baie duidelik.[9]

Altesaam 19 grafbeeldjies is in die grafkamer gekry: 15 vir Joeja en 4 vir Toeja. Die meeste was van hout ('n paar van sederhout en een van ebbehout), en van hulle het goue gesigte en pruike gehad.[10] In die westelike deel van die grafkamer was 52 groot potte, asook 'n strydwa in 'n perfekte toestand.[11] Die buitekant is ryklik versier en die panele aan die binnekant is groen geverf.

Nog 'n vonds was Joeja se Dodeboek van 9,7 meter met 40 hoofstukke. Dit begin met 'n toneel van Joeja en Toeja saam met Osiris. Joeja word uitgebeeeld met wit hare, waarskynlik 'n teken van ouderdom. Dit bevat baie tonele van die begrafnis.[12]

Voorwerpe wat in KV46 gevind is

wysig
  •  
    Dodemasker van Toeja
  •  
    Dodemasker van Joeja
  •  
    Vergulde koppenent met 'n uitbeelding van die god Bes
  •  
    'n Vergulde stoel
  •  
    Nog 'n vergulde stoel
  •  
    Verseëlde fles
  •  
    Paar sandale
  •  
    Begrafnisbeeldjies van Joeja en hulle bokse
  •  
    Vinjet van Joeja uit sy Dodeboek

Verwysings

wysig
  1. ↑ 1,0 1,1 1,2 Reeves & Wilkinson 1996, pp. 174–178.
  2. ↑ Quibell & Smith 1908, pp. i–viii.
  3. ↑ Reeves & Wilkinson 1996, p. 174.
  4. ↑ 4,0 4,1 Quibell & Smith 1908, p. i.
  5. ↑ Davis, Maspero & Newberry 1907, p. xxv.
  6. ↑ Davis, Maspero & Newberry 1907, pp. xxv–xxx.
  7. ↑ Davis, Maspero & Newberry 1907, pp. 37–44.
  8. ↑ Quibell & Smith 1908, pp. 52–54.
  9. ↑ Quibell & Smith 1908, pp. i–vii.
  10. ↑ Mekawy Ouda 2021, pp. 21–40.
  11. ↑ Davis, Maspero & Newberry 1907, pp. 35–36.
  12. ↑ Naville 1908, pp. 1–20.

Bronne

wysig
  • Davis, Theodore M.; Maspero, G.; Newberry, Percy E. (1907). The Tomb of Iouiya and Touiyou. Londen: Archibald Constable and Co. ISBN 0-7156-2963-8.
  • Mekawy Ouda, Ahmed M. (Junie 2021). "The Shabtis of the God's Father, Yuya". The Journal of Egyptian Archaeology. 107 (1–2): 21–40. doi:10.1177/03075133211059842. ISSN 0307-5133. Besoek op 20 Maart 2022.
  • Naville, Edouard (1908). The Funeral Papyrus of Iouiya. Londen: Archibald Constable and Co. Ltd. Besoek op 26 Maart 2022.
  • Quibell, J. E.; Smith, Grafton Elliot (1908). Tomb of Yuaa and Thuiu. Le Caire Impremerie De L'Institut Francais D'Archeologie Orientale.
  • Reeves, Nicholas; Wilkinson, Richard H. (1996). The Complete Valley of the Kings: Tombs and Treasures of Egypt's Greatest Pharaohs (2010 uitg.). Londen: Thames & Hudson. ISBN 978-0-500-28403-2.

Skakels

wysig
Ontsluit van "https://af.wikipedia.org/w/index.php?title=KV46&oldid=2620866"
  NODES
Project 1