Palácio da Alvorada
Die Palácio da Alvorada (Portugees: Paleis van die Dagbreek) is die ampswoning van die Staatspresident van Brasilië. Net soos die res van Brasília, die hoofstad van dié Suid-Amerikaanse land, is die paleis deur die befaamde Brasiliaanse argitek Oscar Niemeyer ontwerp en in 1958 ingewy.
Die paleis het vinnig 'n simbool vir die moderne beweging van Brasilië se argitektuur geword wat die tegnologiese en kulturele vooruitgang van die land versinnebeeld. Sy elegante pilare simboliseer nou die nuwe hoofstad en verskyn ook in die vlag en seël van Brasília.
Die paleis lê in die SHTN Asa Norte-buurt van Brasília, sowat vier kilometer van die Praça dos Três Poderes af. Die naam van die paleis is afgelei van 'n aanhaling van die vroeëre Staatspresident Juscelino Kubitschek:
|
Brasília is 'n nuwe dagbreek in die geskiedenis van Brasilië. |
|
Argitektuur
wysig
Die paleis, wat as een van die eerste geboue in die nuwe hoofstad opgerig is, lê op 'n skiereiland aan die rand van die kunsmatige Paranoámeer.
Net soos talle groot bouwerke in die geskiedenis van die argitektuur word ook Niemeyer se ontwerp deur die grondbeginsels van eenvoudigheid en moderniteit gekenmerk. Die beskouer kry die indruk van 'n groot glaskis, wat danksy die steun van sy pilare aan die buitekant saggies op die grond geland het.
Oscar Niemeyer het vir sy ontwerp veral op die kombinasie van marmer, glas en water gesteun. Die marmerpilare verskaf 'n sekere ligtheid aan die paleis se argitektuur, en hulle simmetriese vorm reflekteer in die glasfasade en op die wateroppervlak voor die paleis.
Die gebou beskik oor 'n oppervlak van 7 000 vierkante meter en drie verdiepings: Kelder, grondverdieping en tweede verdieping. In die kelder lê die ouditorium, wassery, mediese sentrum en administrasie. Die kamers van die grondverdieping word deur die Staatspresident vir amptelike onthale gebruik. Die tweede verdieping bevat die ampswoning met vier woonstelle, twee vertrekke en ander privaatkamers.
Die paleis beskik daarnaas ook oor 'n biblioteek, 'n verhitte swembad van Olimpiese afmetings, 'n musiekkamer, twee eetsale en verskeie onthaalkamers. Aangrensende geboue huisves die kapel en heliport van die paleis.
Personeel
wysigDie 72 personeellede in die paleis sluit sekretarisse en sekretaresses, assistente, tafelbediendes, kokke, dokters en veiligheidspersoneel in. Die kompleks word deur die Presidensiële Garde beveilig.
Sien ook
wysigBron
wysig- Bruand, Yves: Arquitetura contemporânea no Brasil. São Paulo: Editora Perspectiva 2002
Eksterne skakels
wysig
Wikimedia Commons het meer media in die kategorie Palácio da Alvorada.- "About Brasilia – Inligting oor Brasília"
