Palácio do Planalto
Die Palácio da Planalto (Afrikaans: "Paleis van die Plato") is die amptelike werkplek van die staatspresident van Brasilië en geleë op die Praça dos Três Poderes ("Plein van die Drie Magte") in die hoofstad Brasília. Vanweë sy funksie as die Brasiliaanse regeringsetel word die term o Planalto dikwels as 'n metoniem vir die uitvoerende gesag van Brasilië se regering gebruik.
Alhoewel die paleis die hoofkantoor van die staatspresident huisves, dien 'n ander gebou, die Palácio da Alvorada, as sy ampswoning. Naas die president het ook 'n aantal belangrike raadgewers, waaronder die visepresident en die stafhoof hulle kantore in die Palácio da Planalto, terwyl die ander departemente langs Brasília se monumentale Esplanada dos Ministérios lê.
Argitektuur
wysig
Die Palácio do Plantalto is deur die bekende Brasiliaanse argitek Oscar Niemeyer ontwerp, wat ook die meeste ander belangrike geboue in die Brasiliaanse hoofstad geskep het. Die grondliggende idee was 'n ontwerp van fyn linies en golwe vir die kolomme en die buitestruktuur, wat 'n simplistiese en moderne voorkoms aan die gebou gee. Die boubedrywighede het op 10 Julie 1958 begin, en die paleis is op 21 April 1960 ingewy. Die tuine is deur die landskapsargitek Roberto Burle Marx ontwerp.
Die paleis beslaan vier verdiepings met 'n totale oppervlakte van 36 000 vierkante meter. Vier aangrensende geboue maak deel uit van die kompleks.
Kunswerke
wysigDie Palácio do Planalto se kunsversameling behels kunswerke wat deur bekende Brasiliaanse en buitelandse kunstenaars geskep is, waaronder skilderye, skulpture en muurtapyte. Daarnaas pronk die paleis met pragtige meubels, porselein van die Companhia das Índias (Indiese Kompanjie) en Portugese silwerkuns uit die 18de eeu.
Van die kunswerke is eksklusief vir die paleis geskep, soos die muurtapyt Músicos ("Musikante"), wat in opdrag van die argitek Oscar Niemeyer deur die kunstenaar Di Cavalcanti geskep is.
Toegang aan die publiek en veiligheid
wysigDie paleis staan slegs op Sondae tussen 9:30 en 13:00 uur oop vir die publiek. Gidse neem groepe van maksimaal 25 besoekers op rondleidings wat dertig minute duur.
Op weekdae is die paleis slegs toeganklik vir personeel. Die paleis word deur die Presidensiële Garde beskerm, 'n onderafdeling van die Brasiliaanse leër.
Sien ook
wysigEksterne skakels
wysig
Wikimedia Commons het meer media in die kategorie Palácio do Planalto.- Amptelike webwerf
