Paleis van die Sjirwansjah

Die Paleis van die Sjirwansjah (Azerbeidjans: Şirvanşahlar sarayı) is 'n kompleks van vorstelike geboue op die heuwelpiek van İçəri Şəhər, die geskiedkundige ou stad van die Azerbeidjanse hoofstad Bakoe. Dikwels word ook net na die woonpaleis as "Paleis van die Sjirwansjah" verwys.

Paleis van die Sjirwansjah*
Unesco-wêrelderfenisterrein
Die Paleis van die Sjirwansjah
Paleis van die Sjirwansjah Posisie van die Paleis van die Sjirwansjah in Azerbeidjan
Koördinate: 40°21′59″N 49°50′00″O
Lande	Azerbeidjan
Tipe	Kultureel
Kriteria	iv
Verwysings	958
Streek†	Asië
Inskripsiegeskiedenis
Inskripsie	2000  (24ste Sessie)
Bedreigd	2003-2009
* Naam soos dit in die Wêrelderfenislys verskyn. † Streek soos deur Unesco geklassifiseer.

'n Aantal geskiedkundige geboue maak deel uit van die kompleks, waaronder die Mausoleum van die Sjirwansjah, die Maagdetoring, die Sjah-moskee met sy minaret, die grafmonument van die vorstelike astroloog Seyid Yahya Bakuvi, die Moerad-poort, die Divanchana of vergaderingshuis, die Key-Gubad-moskee en die badhuis (hammam).

Die woonpaleis is die oudste gebou van die kompleks. Boubedrywighede vir dié vorstelike woning het in 1411 onder sjah Ibrahim I begin toe Bakoe Sjamaha as permanente regeringsetel vervang het en sou voortduur tot in die regeringstyd van sy seun Faroek. Dit is eers gestaak toe hy in 1501 gesneuwel het. Die paleis bestaan uit twee identieke verdiepings waarvan elkeen tot by 25 vertrekke het. Die laagste verdieping huisves stoorgeriewe en wonings vir dienaars.

In die oudste saal, die agthoekige Divanchana, het plegtige seremonies plaasgevind. Die saal het in 'n sekere afstand van die ander geboue in die middel van 'n vierhoekige binneplein met arkades ontstaan. 'n Kleiner kamer langsaan het as vestibule (voorportaal) en verbinding tot die kamers van die boonste verdieping gedien. 'n Ryk versierde portaal, wat deur 'n koepel bekroon word, vorm die wesfasade.

Die paleiskompleks is in die 18de eeu deur die keiserlike Russiese vloot gebombardeer en ernstig beskadig. Kunsskatte uit die paleis is eers in Tabriz, Iran bewaar en later as buit na die Topkapi-paleis in Istanboel, Turkye geneem. Sedertdien het omvattende restourasiewerk plaasgevind. Die paleis is in 2000 as deel van die historiese ou stad van Bakoe as Unesco-wêrelderfenisgebied gelys.

• 
  Die binneruimte van die moskee
• 
  Die vergaderingshuis
• 
  Die binnehof van die paleis
• 
  Die Paleis van die Sjirwansjah op 'n Aserbeidjanse posseël