Prof. dr. Sarel Petrus van der Walt (noemnaam Zeller, Bethal, Transvaal, 18 April1907 – 8 Oktober1994) was van 1932 tot 1953 agtereenvolgens leraar in drie gemeentes van die Gereformeerde Kerke (GKSA), daarna tot 1973 hoogleraar aan dié kerkverband se Teologiese Skool op Potchefstroom en, nadat hy sy emeritaat in 1973 daar aanvaar het, van 1976 tot 1983 leraar van nog twee gemeentes in kombinasie.
Van der Walt is as seun van Pieter Johannes van der Walt en Sarelina Petronella Venter gebore. In 1924 skryf hy in as student aan die PUK en behaal in 1926 die B.A., in 1928 die M.A., in 1929 die B.D., en in 1930 slaag hy die kandidaatseksamen aan die Teologiese Skool. In 1942 behaal hy die graad D.Phil. aan die PUK vir CHO met 'n proefskrif “Die wysbegeerte van prof. Herman Bavinck".
Hy het agtereenvolgens die volgende gemeentes bedien: Johannesburg, Johannesburg-Wes en Johannesburg-Suid van 1931 tot 1932 (as hulp vir ds. W.J. de Klerk), Johannesburg-Suid van 1932 tot 1946, Johannesburg-Noord 1946–1950 en Potchefstroom-Noord 1950-1953.
Sedert 1953 het hy as professor aan die Teologiese Skool in die vakke apologetiek en Christelike etiek gedien. Hy het besondere vertroue in die Gereformeerde kerkverband geniet en het buitengewone dienste gelewer as lid van die deputate vir diakonale sake asook van die deputate vir gesprek met ander kerke. Vanaf 1968 het hy weer as rektor van die Teologiese Skool en as dekaan van die fakulteit teologie gedien.
In 1949 het hy die Gereformeerde Kerk verteenwoordig op die sinode van die Christian Reformed Church van Amerika. In 1949 woon hy ook as afgevaardigde die Ekumeniese Sinode van Amsterdam by asook die Sinode van Den Haag van die Gereformeerde Kerke in Nederland. Die kulturele belange van die Afrikanervolk het sy besondere belangstelling geniet. Hy het onder andere gedien in die hoofbestuur van die FAK, van die Reddingsdaadbond en die Ekonomiese Instituut. Hy was sekretaris van die reëlingskomitee in Johannesburg met die Ossewatrek in 1938 en het die organisasie waargeneem van die saamtrek van ongeveer 80 000 Afrikaners op 9 September 1939 by die Voortrekkermonument. Op ekonomiese gebied was hy een van die stigters van die klerefabriek Veka Beperk.
Nadat hy in 1973 sy emeritaat aan die Teologiese Skool aanvaar het, was hy van 1976 tot 1983 leraar van die kombinasie Hennenman-Ventersburg. Hy is in 1994 oorlede, 11 jaar nadat hy finaal afgetree het.
Prof. Van der Walt was getroud met Elizabeth Postma, dogter van prof. Ferdinand Postma. Uit die huwelik is vier kinders gebore, onder wie ds. P.J. van der Walt, wat aan die einde van 1968 sy studie aan die Teologiese Skool voltooi het en die volgende gemeentes tot sy aftrede in 2008 bedien het: Marble Hall 1969–1975, Durban-Wes 1975–1982 en Bethlehem 1982–2008. Ds (PJ) Pieter en Marthie van der Walt het 4 kinders. Een van die seuns, Dr Sarel Petrus (SP) van der Walt is vanaf 2002 as GKSA predikant en vanaf 2011 as professor (dogmatiek) aan die GKSA teologiese skool (NWU) verbonde. 'n Dogter van prof Zeller, Magrietha, is getroud met ds. A.Z. Pelser (Bethulie 1958–1964, Phalaborwa 1964–1970, Oos-Moot 1970–1999). Dié egpaar se seun Abri het ook predikant geword.
Uit prof. Van der Walt se pen het onder meer verskyn: Die Wysbegeerte van dr. Herman Bavinck; Dwaling en Waarheid; Wie het ek buiten U ('n preekbundel); Gods Wet en die ander wet; Apologetiek, sy taak en terrein.
