The Catcher in the Rye
The Catcher in the Rye is 'n boek deur J.D. Salinger oor ’n seun, Holden Caulfield, wat uit die skool wegloop en New York toe gaan. Die boek, waarvan die titel geïnspireer is deur een van die Skotse digter Robert Burns se gedigte, Comin' Thro' the Rye,[3] is die eerste keer in 1951 in die Verenigde State gepubliseer. Dit is veral gewild onder jong mense omdat dit oor die probleme en ervarings van adolessente gaan.[4]
The Catcher in the Rye
| |
|---|---|
| |
| Skrywer | J.D. Salinger |
| Omslagontwerper | E. Michael Mitchell[1][2] |
| Land |  Verenigde State |
| Taal | Engels |
| Onderwerp | Roman |
| Genre | Realistiese fiksie, Komende-fiksie |
| Uitgewer | Little, Brown and Company |
| Uitgegee | 16 Julie 1951 |
| Medium | Druk |
| Bladsye | 214 |
| ISBN | 978-0-241-95042-5 |
Die boek was veral in die 1950's omstrede vanweë die growwe taalgebruik en die vrye behandeling van seks en prostitusie daarin. Sommige mense het ook gedink dat dit ander tot die pleeg van misdade sou oorhaal. Terwyl baie mense glad nie van die boek hou nie, vereenselwig jongmense (veral seuns) hulle met die storie. Om hierdie rede vereis baie skole dat hul studente die boek lees.[5][6]
Ongeveer 1 miljoen kopieë van die boek word jaarliks verkoop, met totale verkope wat al oor die 65 miljoen strek. Die boek is in amper al die groot tale van die wêreld vertaal. Dit het die protagonis (hoofkarakter) van die roman oor die wêreld heen 'n ikoon van tieneropstand gemaak.[7]
Storie
wysigHolden Caulfield is 'n sestienjarige, depressiewe jong man van New York wat nie met homself oor die weg kan kom nie. Hy word uit 'n eksklusiewe voorbereidende skool in Pennsilvanië geskors omdat sy punte nie goed genoeg is nie. Ná 'n rusie met sy kamermaat besluit Holden om die nag vroegtydig te vertrek en weg te loop. Hy kan egter nog nie huis toe gaan nie, omdat die skool nog nie sy ouers ingelig het dat hy uitgeskop is nie. So swerf hy verskeie dae doelloos in New York rond.
In die boek vertel Holden wat in hierdie dae met hom gebeur, waaraan hy dink en hoe hy daaroor voel. Dit word 'n soektog na homself, 'n tuiste en maniere om weer geluk te vind. Daar is herhaaldelike insinuasies oor (die bedreiging van) seksuele misbruik, onder andere in hoofstuk 24. Sy neerslagtigheid lei uiteindelik tot 'n soort senuwee-ineenstorting.
Soos die storie vorder is daar aanduidings dat hy in 'n hospitaal vir sielsiekes is. Uit die laaste hoofstuk (26) blyk dit dat Caulfield sy storie aan 'n psigoanalis vertel. Die boek sluit uiteindelik in 'n psigiatriese inrigting in Kalifornië (waar hy behandel word) af.
Sien ook
wysigVerwysings
wysig- ↑ "CalArts Remembers Beloved Animation Instructor E. Michael Mitchell" (in Engels). Calarts.edu. Geargiveer vanaf die oorspronklike op 23 Maart 2016. Besoek op 30 Januarie 2010.
- ↑ "50 Most Captivating Covers" (in Engels). Onlineuniversities.com. Geargiveer vanaf die oorspronklike op 3 Desember 2019. Besoek op 30 Januarie 2010.
- ↑ "www.scotland.org: Think you know about Robert Burns? Besoek op 20 Junie 2017". Geargiveer vanaf die oorspronklike op 30 Junie 2017. Besoek op 20 Junie 2017.
- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Costello, Donald P., and Harold Bloom. "The Language of "The Catcher in the Rye.." Bloom's Modern Critical Interpretations: The Catcher in the Rye (2000): 11–20. Literary Reference Center. EBSCO. Web. 1 Desember 2010.
- ↑ "Carte Blanche: Famous Firsts". Booklist. 15 November 2000. Besoek op 20 September 2007.
- ↑ Merriam-Webster's Dictionary of Allusions By Elizabeth Webber, Mike Feinsilber bl. 105