Apis (ook Hapis of Hapi-anch) was in die Egiptiesemitologie ’n bul-god wat in Memphis aanbid is. Apis het gedien as tussenganger tussen mense en die god Ptah, later Osiris en toe Atoem.[1]
’n Standbeeld van Apis uit die 30ste Dinastie (Louvre).
Seremoniële begrafnisse van bulle dui daarop dat rituele offerandes deel was van die vroeë mitologie. Apis was die belangrikste heilige dier in Egipte. Hy is beskou as ’n lewende verpersoonliking van Ptah. Tydens uitgrawings by die serapeum by Saqqara is die grafkelders van meer as 60 diere gevind.
Die tempel van Apis in Memphis was die hooftempel wat aan hom toegewy was. Dit word beskryf in die werk van klassieke historici soos Herodotus, Diodorus en Strabo, maar is nog nie ontdek nie. In die tempel is Apis as ’n orakel gebruik; sy bewegings is beskou as voorspellings. Daar is geglo sy asem het siektes genees en sy teenwoordigheid het mense naby hom met viriliteit geseën. Daar was ’n venster in die tempel waardeur hy gesien kon word en op sekere vakansiedae is hy deur die stad se strate gelei, versier met juwele en blomme.
Talle standbeelde van Apis is tydens uitgrawings by Memphis gevind. Die meeste bekendes kom uit Serapeoem.
Wikimedia Commons het meer media in die kategorie Apis.