Assosiasie

Die woord assosiasie beteken ’n verhouding tussen twee veranderlikes of ’n verhouding tussen idees of dinge. Die woord ‘assosiatief’ kom van die Latynse woord associatus wat ‘verbind met’ beteken.

In Wiskunde is hierdie woord deel van die assosiatiewe wet van optelling en die assosiatiewe wet van vermenigvuldiging.

Assosiatiewe wet van optelling

Hierdie wet sê dat dit nie saak maak hoe die getalle wat opgetel word gegroepeer word nie, die antwoord sal altyd dieselfde wees.

Bv. (5 + 2) + 3 is presies dieselfde as 5 + (2 + 3), albei gee ’n antwoord van 10.

Assosiatiewe wet van vermenigvuldiging

Hierdie wet sê dat dit nie saak maak hoe die getalle gegroepeer word wanneer daar vermenigvuldig word nie, die antwoord sal altyd dieselfde wees.

Bv.         (2 x 5) x 3 = 30

             2 x (5 x 3) = 30

Volgens hierdie wette maak dit dus nie saak hoe getalle gegroepeer word wanneer daar opgetel of vermenigvuldig word nie.