Kontrabas
Die kontrabas is die grootste strykinstrument wat in die moderne simfonieorkes gebruik word. Dit is 'n standaardlid van die strykers in die simfonieorkes. Dit word ook gebruik in ander soorte musiek, soos jazz, 1950's-styl blues, rock and roll, rockabilly/psychobilly, bluegrass en tango.
Soos ander strykinstrumente in die orkes kan die kontrabas met 'n strykstok gespeel word, of die speler kan die snare pluk.
Daar is verskeie eienskappe wat die kontrabas anders maak as die res van die familielede van die strykinstrumente. Die mees prominente verskil, is dat die kontrabas se snare gestem word in vierdes, en nie in vyfdes soos die ander nie. Daar is ook geen vaste patroon en reëls wanneer dit kom by die konstruksie van die instrument nie. Die instrumente verskil dus in voorkoms en grootte van mekaar.
