Lente
Lente is een van die vier seisoene waarin die jaar opgedeel word. Lente volg na die winter en kom voor die somer. Gedurende die lente word die dae langer en die nagte korter (dit word later donker).
Meteorologies gesproke val die maande September, Oktober en November in die lente (Suidelike Halfrond). Terwyl dit lente in die Suidelike Halfrond is, is dit herfs in die Noordelike Halfrond.
Astronomies gesproke begin die lente egter met die lentenagewening. In die Suidelike Halfrond vind die lentenagewening gewoonlik op 22 of 23 September plaas. In die Noordelike Halfrond vind dit gewoonlik op 20 Maart plaas.
Lentedag word op 1 September gevier. Omdat dit warmer word, kom mense meer gereeld uit hulle huise en hoef hulle nie so warm aan te trek nie. Party mense ly (veral in die lente) aan hooikoors, as gevolg van die allergene in die lug.
In die lente begin die plante weer te groei. Die wêreld word groener, die bome bot en blomme kan orals gesien word. Vir baie diere is dit ook die begin van hulle broeiseisoen. Voëls wat na warmer gebiede gemigreer het begin weer na hul broeigebiede terugkeer. Diere wat deur die winter gehiberneer het, word weer aktief.
Eksterne skakels
wysig
Wikimedia Commons het meer media in die kategorie Lente.
Wikiwoordeboek het 'n inskrywing vir lente.
