Mike Markkula
Armas Clifford "Mike" Markkula Jr. ([mɑrˈkuːlə]; Los Angeles, 11 Februarie 1942) is 'n Amerikaanse elektriese ingenieur, sakeman en belegger. Markkula is van Finse afkoms; sy voorsate het in die 19de eeu na die Verenigde State geëmigreer. Markkula was een van die eerste ingenieurs wat vir Intel werksaam was en was op die ouderdom van 30, toe Intel in 'n publieke maatskappy omgeskep is, reeds 'n miljoenêr.[1]
In die beginfase van Apple Inc. het Markkula die jong onderneming van die benodigde risikokapitaal (hy het borg gestaan vir 'n krediet ter waarde van VS$200 000) en bestuursbystand voorsien. So het hy die eerste sakeplan ontwikkel, die eerste hoof uitvoerende beampte aangestel en daarop aangedring dat Wozniak tot die onderneming moes toetree. Apple, wat aanvanklik as 'n vennotskap bedryf is, kon daarna as 'n onderneming geïnkorporeer word. In ruil vir sy belegging het Markkula dertig persent van Apple Inc. se aandele ontvang.
Markkula het kennis gemaak met twee stigters en sleutelpersone van Apple Inc., Steve Jobs en Steve Wozniak, terwyl hulle op soek gwas na eksterne befondsing vir hul nuutontwikkelde persoonlike rekenaar, die Apple II, nadat enkele eksemplare van die voorloper Apple I reeds verkoop is. Markkula het tussen 1981 en 1983 die amp van hoof uitvoerende beampte van Apple beklee. Hy was tot 1997 by Apple Inc. betrokke.