Roetetabel

In rekenaarnetwerke is 'n roetetabel 'n elektroniese tabel of databasis wat gestoor word op 'n roeteerder of 'n netwerkrekenaar. Die roetetabel stoor die roetes (en in sommige gevalle die voorkeurgewigte wat met daardie roetes gepaardgaan). Hierdie inligting bevat die topologie van die netwerk in die onmiddellike omgewing daarvan. Die saamstel van roetetabelle is die hoofdoel van roeteringsprotokolle en statiese roetes.

Roetetabelle word gewoonlik nie direk gebruik vir pakket aansture in moderne roetebepalerargitekture nie, maar word eerder gebruik om die inligting vir 'n kleiner aanstuurtabel te verkry wat slegs die roetes bevat wat deur die roeteringsalgoritme gekies is as die voorkeurroetes vir pakket aansture, dikwels in 'n saamgeperste- of voorafsaamgestelde formaat wat geoptimiseer is vir stoor- en opsoekdoeleindes op die hardeware.

Inleiding

'n Roetetabel gebruik dieselfde begrip as die gebruik van 'n kaart vir die aflewering van posstukke. Wanneer 'n nodus data moet versend na 'n ander nodus op 'n netwerk, moet dit weet waarheen dit gestuur moet word. As die toestel nie direk aan die bestemmingsnodus verbind is nie, moet dit 'n ander manier vind om die pakket te stuur. Wanneer 'n nodus nie weet hoe om die pakket aan te stuur nie, word die IP-pakket na 'n deurgangspoort op die lokale area netwerk gestuur. Aangesien dit 'n ingewikkelde taak is om die roete na die korrekte bestemming vir die pakket te bepaal, moet die deurgangspoort tred hou van die manier waarop die pakket afgelewer moet word. 'n Roetetabel is die manier waarop hierdie data gestoor word, 'n soort kaart van die netwerk. Dit is 'n databasis wat tred hou van die paaie wat gevolg kan word en verskaf hierdie inligting aan die nodus wat die data versend.

Hop-vir-hoproetering werk deur alle direk bereikbare bestemmings se adresse vanaf die gegewe roetebepaler te lys. Gegewe dat die roetetabel se data konsekwent is, is 'n eenvoudige algoritme om pakkette aan te stuur na die volgende hop op pad na die bestemming voldoende om enige pakket by sy bestemming uit te kry. Hop-vir-hoproetering is 'n grondliggende eienskap van die IP internetwerklaag.