Vlag van Kenia

Die nasionale vlag van Kenia (Engels: Flag of Kenya; Swahili: Bendera ya Kenya) is op 12 Desember 1963 amptelik in gebruik geneem. Die vlag vertoon drie ewe wye horisontale bane in swart, rooi en groen met wit fraaiings langs die rooi baan. In die middel van die vlag is ’n afbeelding van ’n tradisionele Masaiskild met twee spiese wat daar agter oormekaar gekruis is. Die vlootvaandel is die enigste variasie op die vlag van Kenia. Dit is ’n wit vlag met die nasionale vlag in die skildhoek en ’n groot rooi anker op die wapperkant.

Vlag van Kenia

Vlag van Kenia
Gebruik	Nasionale vlag en Burgerlike- en Staatsvaandel
Verhouding	5:9
Goedgekeur	12 Desember 1963
Ontwerp	’n Horisontale driekleur in swart, rooi en groen met wit fraaiings langs die rooi baan met, in die middel van die vlag, twee spiese wat agter ’n rooi, wit en swart Masaiskild gekruis is.
Wisselvormvlag van Kenia
Gebruik	Vlootvaandel
Verhouding	1:2
Ontwerp	’n Wit vlag met die nasionale vlag in die skildhoek en ’n groot rooi anker op die wapperkant.
Wisselvormvlag van Kenia
Bynaam	Lugmagvaandel
Verhouding	2:3
Ontwerp	’n Blou vlag met die nasionale vlag in die skildhoek en die rondeau van die lugmag op die wapperkant.

Simboliek

Die Masaiskild met die spiese is die simbool van die stryd om onafhanklikheid en die bereidheid om dit te verdedig. (Die skild verskyn ook in ’n effense gewysigde weergawe op die wapenskild van Kenia.) Swart stel verder ook die Afrikavolk voor, rooi stel die gemeenskaplike bloed van die mens asook die stryd om onafhanklikheid voor, groen stel die landbou en natuurlike hulpbronne voor en wit eenheid en vrede.

Ontwerp

Die verhouding van die horisontale bane is 6:1:6:1:6, die skild neem 3/5 van die hoogte van die vlag in beslag en is presies in die middel van die vlag sodat die swart kante van die skild teen die rant van die rooi baan raak.

Konstruksietekening

Die vlootvaandel se verhouding is 1:2 waar die vlag s’n 5:9 is. Die anker op die vlootvaandel moet dieselfde rooi as die rooi baan van die vlag wees.

Kleure

Keniaanse vlae by die Kenyatta-mausoleum

Die kleure van die vlag is deur die Keniaanse Nasionale Argief soos volg bepaal:

	Swart	Rooi	Groen
Britse Standaardkleure	—	Poskantoorrooi 0-006	Paris/Viridian Green 0-10
Heksadesimaal	#000000	#99292D	#31905F
RGB	0-0-0	153-41-45	49-144-95
Pantone	Black C	484 C	7730 C

Geskiedenis

Britse periode

Tussen 1888 en 1963 was Kenia onder Britse bestuur. In 1888 het die Brits-Oos-Afrika Kompanjie die reg van die Sultanaat Zanzibar verkry om ’n grondgebied ongeveer tweehonderd kilometer van die Keniaanse kus te bestuur. Kragtens die Zanzibarverdrag het die Duitse Keiserryk in 1890 sy regte aan die Britte oorgedra, waarna die Oos-Afrikaanse protektoraat gestig is. Vervolgens het die inlywing van die binneland begin. In 1902 is ’n deel van Uganda aan die Oos-Afrikaanse protektoraat toegevoeg. In 1920 is die Oos-Afrikaanse protektoraat omgevorm tot die kroonkolonie Kenia. Tydens die Britse bewind (vanaf 1895) is ’n blou Britse vaandel gebruik, bestaande uit ’n blou agtergrond met die Britse vlag in die skildhoek en ’n rooi leeu wat op sy agterpote staan op die wapperkant.

Van 1890 tot 1920 was die streek rondom Witu nie formeel deel van Brits-Oos-Afrika nie. Dit het staatsregtelik aan die Sultanaat Zanzibar behoort, maar het na die Zanzibarverdrag ’n Britse protektoraat geword by name die Witu-protektoraat. Hierdie protektoraat was ’n opvolger van Duits-Witu wat in 1885 tot stand gekom het. Tussen 31 Julie 1893 en 1920 het die Witu-protektoraat ’n rooi vlag met die Britse vlag in die middel daarvan gebruik.

Onafhanklikheid

Die Keniaanse vlag is gebaseer op die swart-rooi-grein driekleur van die Kenya Africa National Union Party, wat die leidende party om onafhanklikheid van koloniale oorheersing was. By die verkryging van onafhanklikheid is die Masaiskild asook die wit strepe as simbole van vrede toegevoeg.

Ander vlae

Historiese presidensvlae

• 
  Eerste presidentsvlag van Kenia, 1963 tot 1970
• 
  Presidentsvlag van Jomo Kenyatta
• 
  Presidentsvlag van Daniel arap Moi
• 
  Presidentsvlag van Mwai Kibaki
• 
  Presidentsvlag van Uhuru Kenyatta
• 
  Presidentsvlag van William Ruto

Verdedigingsmagte

• 
  Vaandel van die Keniaanse Verdedigingsmag
• 
  Vaandel van die Keniaanse Vloot
• 
  Presidentsvlag van die Keniaanse Vloot
• 
  Vlag van die Keniaanse Lugmag

Soortgelyke vlae

• 
  Vlag van Kenia met die wapen op

Historiese vlae

• 
  Imperiale Brits-Oos-Afrikaanse Kompanjie, 1888–1895
• 
  Vlag van die Witu-protektoraat, 1893–1920
• 
  Brits-Oos-Afrika, 1895–1921
• 
  Kolonie en Protektoraat Kenia, 1921–1963
• 
  Vlag van die Dominion Kenia, 1963–1964; Vlag van die Republiek Kenia, sedert 1964

Soortgelyke vlae

• 
  Vlag van Malawi
• 
  Pan-Afrikaanse vlag
• 
  Vlag van Suid-Soedan

Eksterne skakels

• (en) Kenia by Flags of the World
• (en) "Flag of Kenya". Encyclopædia Britannica. Besoek op 20 April 2023.

Hierdie artikel is in sy geheel of gedeeltelik vanuit die Nederlandse Wikipedia vertaal.