Vlag van Macau

Die vlag van Macau (amptelik die streeksvlag van die Macau Spesiale Administratiewe Streek van die Volksrepubliek China) is op 31 Maart 1993 deur die Nasionale Volkskongres goedgekeur en is sedert 20 Desember 1999 in gebruik. Die vlag vertoon ’n enkele groen baan met, in die middel, ’n gestileerde lotusblom oor die Ponte Governador Nobre de Carvalho onder ’n boog van vyf goue vyfpuntige sterre waarvan die middelste groter as die res is.

Vlag van Macau

Vlag van Macau
Gebruik	Nasionale vlag en Staatsvaandel
Verhouding	2:3
Goedgekeur	31 Maart 1993 Gebruik sedert 20 Desember 1999
Ontwerp	’n Enkele groen baan met, in die middel, ’n gestileerde lotusblom oor die Ponte Governador Nobre de Carvalho, onder ’n boog van vyf goue vyfpuntige sterre.
Ontwerp deur	Yahun Bang

Streeksvlag van die Macau Spesiale Administratiewe Streek van die Volksrepubliek China
Name (taalvariante)
Tradisionele Chinees	中華人民共和國澳門特別行政區區旗
Vereenvoudigde Chinees	中华人民共和国澳门特别行政区区旗
Pinyin	Zhōnghuá Rénmín Gònghéguó Àomén Tèbié Xíngzhèngqū Qūqí
Kantonees	Jūng'wàh Yàhnmàhn Guhng'wòhgwok Oumún Dahkbiht Hàhngjing Kēui Kēuikèih
Jyutping	Zung1waa4 Jan4man4 Gung6wo4gwok3 Ou3mun2 Dak6bit6 Hang4zing3 Keoi1 Keoi1kei4
Ander name	Bandeira regional da Região Administrativa Especial de Macau da República Popular da China (Portugees)

Simboliek

Die lotusblom is gekies as Macau se blomembleem. Die Ponte Governador Nobre de Carvalho is ’n brug wat die Macau-skiereiland met die eiland Taipa verbind. Die brug is een van die bekendste landmerke van die gebied. Die water onder die lotusblom stel Macau se posisie as ’n hawe en die rol wat dit in die gebied gespeel het, voor. Die vyfpuntige sterre verwys na die ontwerp van die vlag van die Volksrepubliek China en stel Macau se verhouding met die Volksrepubliek China voor.

Ontwerp

Volgens die grondwet van Macau is die streeksvlag van Macau ’n groen vlag met vyf sterre, lotusblom, brug en seewater. Hierdie wet het ook vasgestel dat, buiten die vertoon van die vlag van die Volksrepubliek China, die Macau Spesiale Administratiewe Streek ook ’n streeksvlag mag gebruik.

Geskiedenis

Portugese oorheersing

Voor Macau se oorhandiging in 1999 deur die Portugese Republiek aan die Volksrepubliek China, dus van 1557 tot 1999, het Macau amptelik slegs die Portugese vlag gebruik. Dit is in teenstelling met Hongkong wat onder Britse oorheersing ’n Britse blou vaandel met ’n wapen op die wapperkant naas die Unievlag as sy vlag gebruik het. In 1967 was daar voorstelle om aan elk van Portugal se oorsese provinsies sy eie vlag toe te ken bestaande uit die Portugese vlag met die plaaslike wapenskild, maar geeneen hiervan is ooit aanvaar nie.

In 1975 is ’n vlag vir die Portugese koloniale regering van Macau in gebruik geneem. Dit was ’n ligblou agtergrond met die amptelike wapenskild van die Portugese kolonie van Macau in die middel. Gedurende die Portugese administrasie het hierdie vlag ook die Macau-streek by internasionale forums verteenwoordig, hoewel dit nie die amptelike vlag van die kolonie was nie.

Daar was ’n nieamptelike variant van die vlag van die Portugese koloniale regering van Macau. Dit was sonder die muurkroon wat die kastele van die Koninkryk Algarve in die wapenskild voorgestel het, en het die woorde ““Governo de Macau” met “Macau” vervang. Hierdie vlag is by die Universiteit van Macau opgespoor in ’n foto van ’n internasionale universiteitesporttoernooi waar dit in die parade gebruik is. Hoewel hierdie vlag nooit amptelik gebruik is nie, het sommige sportmedia dit in plaas van die Portugese vlag gebruik om Macau voor te stel.

Daar was ’n vlag van die regering van Macau waarop die kolonie se wapenskild op ’n ligblou baan verskyn het.

Die Leal Senado-munisipaliteit van Macau het ook ’n vlag gehad met ’n wapenskild in Portugese styl met twee engele as skildhouers. Dié vlag is gedurende die oorgawe in 1999 gebruik. Insgelyks het die Ilhas-munisipaliteit in 1975 ’n eie vlag ontvang bestaande uit ’n oranje agtergrond met Ilhas se wapenskild in die middel.

• 
  Vlag van Macau, 1557 tot 1578
• 
  Vlag van Macau, 1578 tot 1640
• 
  Vlag van Macau, 1640 tot 1667
• 
  Vlag van Macau, 1667 tot 1707
• 
  Vlag van Macau, 1707 tot 1816
• 
  Vlag van Macau, 1816 tot 1830
• 
  Vlag van Macau, 1830 tot 1910
• 
  Vlag van Macau, 1911 tot 1999
• 
  Vlag van die provinsie Leal Senado, 1975 tot 1999
• 
  Vlag van die provinsie Ilhas, 1975 tot 1999
• 
  Vlag van die Portugese koloniale regering van Macau, 1975 tot 1999

Ander vlae

• 
  Nieamptelike vlag van die Portugese koloniale regering van Macau, 1975 tot 1999
• 
  Vlag van die Portugese Goewerneur van Macau
• 
  Voorgestelde vlag vir die kolonie van Macau

1993-voorstelle

Die gekose vlag van Macau

In 1993 is verskeie voorstelle aan die hand gedoen.

• ’n Vertikale tweekleur van groen-rooi wat aan die Portugese vlag herinner, met ’n gestileerde lotusblom in die middel
• ’n Horisontale driekleur in rooi-wit-rooi met ’n gestileerde “M” wat vir “Macau” staan; ’n groot ster daaroor en vier sterre daaronder verteenwoordig die Volksrepubliek China.
• Soortgelyk aan die huidige vlag van Macau, maar die lotusblom is anders gestileer en op ’n skyf met die sterre binne die blom
• ’n Horisontale driekleur in rooi-wit-rooi; die middelbaan met ’n afbeelding van die St. Paulus-katedraal in Macau
• ’n Gestileerde rooi en blou “M” met ’n groot wit vyfpuntige ster daaroor en ’n rooi lotusblom daarin effens na die vlagpaalkant met twee dun horisontale bane daaronder
• Soortgelyk aan die huidige vlag maar in rooi en die embleem het nie die brug en water nie.
• ’n Gestileerde lotusblom met ’n boog van geel sterre op ’n rooi agtergrond (in etlike variasies)
• ’n Afbeelding van die Guia Vesting-vuurtoring, die oudste vuurtoring in Asië, onder ’n goue ster; ’n wit ligkrans form om die vuurtoring en twee ligkeëls verdeel die vlag in rooi (bo) en blou (onder)
• ’n Vertikale tweekleur van groen-rooi wat aan die Portugese vlag herinner, met ’n wit seemeeu in die boonste helfte en ’n wit afbeelding van die Ponte Governador Nobre de Carvalho in die onderste helfte
• ’n Rooi driehoek met die basis aan die vlagpaalkant en spits aan die wapperkant waarin die vyf sterre van die vlag van die Volksrepubliek China vertoon word en die boonste en onderste helftes in groen is
• ’n Afbeelding van die Ponte Governador Nobre de Carvalho in die middel van ’n rooi baan met die vyf goue sterre van die Chinese vlag daaroor

• 
  
• 
  
• 
  
• 
  
• 
  
• 
  
• 
  
• 
  
• 
  
• 
  
• 
  
• 
  
• 
  

Sien ook

• Vlag van Hongkong
• Vlag van Oos-Turkestan
• Vlag van Tibet
• Vlag van die Republiek China
• Vlag van die Volksrepubliek China

Eksterne skakels

• (en) Macau by Flags of the World
• (pt) Wet No. 6/1999 oor die gebruik en beskerming van die streekvlag en embleem
• (pt) Administratiewe regulasie nr. 5/2019 konkrete bepalings rakende die gebruik van nasionale en streeksvlae en embleme en die instrumentale en vokale uitvoering van die volkslied

Hierdie artikel is in sy geheel of gedeeltelik vanuit die Engelse Wikipedia vertaal.