Wallis Simpson
Wallis, die Hertogin van Windsor (gebore Bessie Wallis Warfield; 19 Junie 1896 - 24 April 1986), bekend as Wallis Simpson, was 'n Amerikaanse sosiale vlinder en die vrou van die Hertog van Windsor, die voormalige koning Edward VIII van die Verenigde Koninkryk. Hulle trouplanne en haar status as geskeide vrou het 'n grondwetlike krisis veroorsaak wat tot sy abdikasie gelei het.
| Wallis Simpson | |
|---|---|
 | |
| Gades |
|
| Vader | Teackle Wallis Warfield |
| Moeder | Alice Montague |
| Geboortenaam | Bessie Wallis Warfield |
| Gebore | 19 Junie 1896, Square Cottage, Pennsilvanië, VSA |
| Oorlede | 24 April 1986 (op 89), Parys, Frankryk |
Wallis het grootgeword in Baltimore, Maryland. Haar pa is kort ná haar geboorte oorlede, en sy en haar weduwee-moeder is gedeeltelik deur ryker familielede onderhou. Haar eerste huwelik, met die vlootoffisier Win Spencer, is gekenmerk deur tydperke van skeiding, en dit het eindelik in 'n egskeiding geëindig. In 1931, tydens haar tweede huwelik, het sy Edward ontmoet, wat toe die Prins van Wallis was. Vyf jaar later, nadat Edward koning van Brittanje geword het, het Wallis van haar tweede man geskei om met Edward te trou.
Die koning se begeerte om met 'n vrou te trou wat twee keer geskei is, het tot 'n grondwetlike krisis gelei, en eindelik tot sy abdikasie in Desember 1936 om te trou met "die vrou wat ek liefhet".[1] Ná sy abdikasie is die voormalige koning deur sy broer en opvolger, koning George VI, die Hertog van Windsor gemaak.
Wallis is ses maande later met Edward getroud, waardeur sy amptelik bekend was as die Hertogin van Windsor. Sy is nie toegelaat om, soos haar man, as "Koninklike Hoogheid" aangespreek te word nie.
Voor, gedurende en ná die Tweede Wêreldoorlog het baie mense vermoed die Hertog en Hertogin van York is die Nazi's goedgesind. In 1937 het hulle Duitsland besoek en Adolf Hitler ontmoet. In 1940 is die hertog aangestel as goewerneur van die Bahamas en die egpaar het na die eilande getrek tot met sy uittrede in 1945. In die 1950's en 1960's het die hertog en hertogin tussen Europa en Amerika rondgereis en 'n luilekker lewe geniet.
Ná die hertog se dood in 1972 het die hertogin in afsondering gewoon en is sy selde in die openbaar gesien. Sy is steeds 'n omstrede figuur in die Britse geskiedenis.
Vroeë lewe
wysig
Bessie Wallis Warfield is op 19 Junie 1896 in die Monterey Inn gebore, 'n hotel regoor die Monterey-klubhuis, in Blue Ridge Summit, Pennsilvanië.[2] Blue Ridge Summit was 'n someroord naby die grens tussen Maryland en Pennsilvanië en gewild onder inwoners van Baltimore wat van die somerhitte ontsnap het. Monterey Inn, wat 'n sentrale gebou en individuele houthuisies gehad het, was die dorp se grootste hotel.[3]
Haar pa was Teackle Wallis Warfield, die vyfde oudste en jongste seun van Henry Mactier Warfield, 'n meelhandelaar. Hy is beskryf as "een van die bekendste en gewildste inwoners van Baltimore", wat in 1875 as burgemeester gestaan het.[4] Wallis is genoem na haar pa, wat as Wallis bekend was, en haar ma se ouer suster, Bessie. Sy is Bessie Wallis genoem totdat die naam Bessie iewers is haar jeug gelos is.[5]
Volgens 'n troueaankondiging in die Baltimore Sun (20 November 1895) is haar ouers op 19 November 1895 getroud.[6] Dit dui daarop dat sy buite-egtelik was. Wallis het egter beweer haar ouers is in Junie 1895 getroud.[7] Haar pa is op 15 November 1896 aan tuberkulose dood.[8] Vir die eerste paar jaar daarna was sy en haar ma afhanklik van die welsyn van haar pa se ryk alleenloperbroer, Solomon Davies Warfield, destyds die posmeester van Baltimore. Hulle het aanvanklik saam met hom gewoon in die huis wat hy met sy ma gedeel het.[9]
In April 1916 het Wallis vir Earl Winfield Spencer jr., 'n vlieënier van die Amerikaanse vloot, ontmoet.[10] Die twee is op 8 November 1916 getroud. Win, soos haar man bekend was, het kwaai gedrink. In 1920 het hy sy vrou vir vier maande verlaat, maar in die lente van 1921 is hulle in Washington herenig. Hulle is gou weer uitmekaar en in 1922, toe Spencer na die Verre Ooste uitgeplaas is, het Wallis agtergebly en 'n verhouding met 'n Argentynse diplomaat, Felipe de Espil, gehad.[11]
Wallis het deur China getoer en in Beijing glo 'n verhouding gehad met graaf Galeazzo Ciano, later Benito Mussolini se skoonseun en minister van buitelandse sake. Dit het gelei tot 'n verknoeide aborsie, wat haar onvrugbaar gemaak het.[12] Die gerug is later ontken.[13]
Verwysings
wysig- ↑ Bloch, Michael (1988). The Secret File of the Duke of Windsor. London: Bantam Books. ISBN 978-0-593-01667-1.
- ↑ Weir, p. 328
- ↑ "Baltimore in Her Centennial Year", Frank Leslie's Popular Monthly, Volume 43 (Frank Leslie Publishing House, 1897), p. 702
- ↑ Carroll, David H. (1911), Men of Mark in Maryland, Volume 3, B. F. Johnson Inc., p. 28
- ↑ King, p. 13
- ↑ "Montague–Warfield", The Baltimore Sun, 20 November 1895
- ↑ Duchess of Windsor, p. 17; Sebba, p. 6
- ↑ Tombstone in Green Mount Cemetery, Baltimore; King p. 13; Sebba, p. 9
- ↑ Carroll, vol. 3, pp. 24–43; King, pp. 14–15; Duchess of Windsor, p. 20
- ↑ King, p. 38; Sebba, pp. 20–21; Vickers, p. 257; Duchess of Windsor, pp. 59–60
- ↑ Ziegler, Philip (2004) "Windsor, (Bessie) Wallis, duchess of Windsor (1896–1986)", Oxford Dictionary of National Biography, Oxford University Press, doi:10.1093/ref:odnb/38277, besoek op 2 Mei 2010
- ↑ Higham, p. 50; King, p. 66; Sebba, pp. 55–56
- ↑ Moseley, Ray (1999), Mussolini's Shadow: The Double Life of Count Galeazzo Ciano, New Haven: Yale University Press, pp. 9–10, ISBN 978-0-300-07917-3
Skakels
wysig
Wikimedia Commons het meer media in die kategorie Wallis Simpson.
Hierdie artikel is in sy geheel of gedeeltelik uit die Engelse Wikipedia vertaal.
