D Akziegsellschaft in dr Schwiz

D Akziegsellschaft (churz AG) (französisch Société Anonyme (SA); italienisch Società anonima; änglisch Limited (Ltd.)) isch im schwizerische Gsellschaftsrächt e Rächtsform von ere Kapitalgsellschaft. Die gsetzlige Grundlage über d Akziegsellschaft wärde im Obligazioonerächt in de Ardikel 620 bis 771 behandlet. Spezialrächtligi Akziegsellschafte si Akziegsellschafte, wo uf öffentligem Rächt basiere. Groossi Däil vo däm si gliich wie bi de brivaträchtlige Akziegsellschafte.

Akziegsellschaft Kapital und Resärve 2000K Franke – Räingwünn- und Kapitalbelastig dur Kantons-, Gmäind- und Chillestüüre und diräkti Bundesstüür im Ganze in Brozänt vom Räingwünn 2007

Akziegsellschaft Kapital und Resärve 100K Franke – Räingwünn- und Kapitalbelastig dur Kantons-, Gmäind- und Chillestüüre und diräkti Bundesstüür im Ganze in Brozänt vom Räingwünn 2007

D Gründig

Zum en AG gründe brucht mä en Akziekapital vo mindestens CHF 100'000 (Obligazionerächt Art 621). Dr Naame vo dr Gsellschaft, wo as Firma bezäichnet wird, muess in dr ganze Schwiz äimoolig si (Obligazionerächt Art 951). D Gründig bassiert mit ere Öffentlige Urkunde, wo din d Statute, die äinzelne Iilaagwärt und d Organ zur Zit vo dr Gründig festgläit si (Obligazionerächt Art 629). Erst wenn d Firma im Handelsregister iidräit isch, gältet en AG as entstande – vorhär existiert si as Äifachi Gsellschaft mit deren iire Haftigsbedingige.

D Organ

D Organ von ere AG si d Generalversammlig (abk. GV), dr Verwaldigsroot (abk. VR) und d Rewisionsstell. Anders as z Dütschland isch d Geschäftsfüerig bzw. -läitig, wo öbben eme dütsche Vorstand entspricht, kä Organ vo dr Gsellschaft. Hingege chönne au freiwillig witeri (fakultativi) Organ ernennt wärde, z. B. en Ufsichtsroot.

Litratuur

• Peter Böckli: Schweizer Aktienrecht. 4. Uflaag, Verlag Schulthess, Züri, 2009; ISBN 3-7255-5846-9.
• Peter Forstmoser, Arthur Meier-Hayoz, Peter Nobel: Schweizerisches Aktienrecht. Verlag Stämpfli, Bärn, 1996; ISBN 3-7272-0889-9.
• Arthur Meier-Hayoz;, Peter Forstmoser: Schweizerisches Gesellschaftsrecht. 10 Uflaag, Verlag Stämpfli, Bärn, 2007, insbesondere § 16; ISBN 978-3-7272-0801-0.
• Robert Meier: Die Aktiengesellschaft. Verlag Schulthess, Züri, 2005; ISBN 3-7255-5013-1.

Weblingg

• Die akzierächtlige Bestimmige im Obligazionerächt

Dä Artikel basiert uff ere fräie Übersetzig vum Artikel „Aktiengesellschaft_(Schweiz)“ vu de dütsche Wikipedia. E Liste vu de Autore un Versione isch do z finde.

Bitte gib au Achtig uf dr Hiwis zue Rechtstheme!