Dioskure

D Dioskure (altgriech. Διόσκουροι, im Dual: Διοσκόρω „Zeus-Söö“) sind i de griechische Mythologii d Zwillingsbrüdere, wo as Schutzgotthaite agrueffe wore sind. Ene sini Neme sind Kastor und Polydeukes (Κάστωρ καὶ Πολυδεύκης), wo d Röömer as Castor und Pollux öbernoo hend.

Mythos

D Dioskure sind d Söö vo de Leda und vom Zeus, as sterbliche Vatter werd de spartanischi König Tyndareos gnennt, dromm sind si o as Tyndaride (Τινδαρίδαι) bikannt. Noch de Kyprie isch de Kastor de sterblichi Soo vom Tyndareos und de Polydeukes und d Helene di unsterblichi Chind vom Zeus.

D Dioskure sind ufem Inseli Pephnos uf d Welt choo. De Hermes hett si uf Pellana broocht, wo si ufzoge wore sind. D Dioskure hend a de Argonautefaart tailgnoo und o anderi Oobetüür undernoo. Spööter hett de Theseus d Helena graubt, wo i de Antiki as e bsunders schöni Frau ggulte hett. D Dioskure hend eri Schwöster bifrait und uf Sparta zruggbroocht.

D Dioskure hend selber d Leukippide Hilaira und Phoibe graubt, d Töchtere vom Leukippos und die ghüroote. De Soo vo de Hilaeira und vom Kastor isch de Anaxis oder Anogon und de Soo vom Polydeukes und vo de Phoibe de Mnasinos oder Mnesileos.

D Dioskure und Apharetide Idas und Lynkeus hend z Arkadie e Veeherde graubt und wo si d Büüti tailt hend, sind d Dioskure vom Idas öberlistet wore. S isch zom Striit choo und d Dioskure hend d Herde uf Lakonie tribe. De Lynkeus het si verfolgt und ufem Taygetos hett er gsie, wie de Kastor sich innere hoole Aiche versteggt hett und mit siim Speer het er de Kastor töödt. De Polydeukes hett drufabe de Lynkeus töödt und wo de Idas mit demm hett afange chämpfte hett de Zeus de Idas mitem Strool erschlage.

Well de Kastor sterblich und de Polydeukes unsterblich gsii sind, sii aber hend wöle immer zämebliibe, isch es choo, as beed e halbs Joor ufem Olymp und e halbs Joor im Hades verbroocht hend.

Vereerig

D Dioskure sind vor alem uf de Peloponnes vereert wore und ganz bsunders z Sparta, wo ere Kult eng mit de baide Königshüser verbunde gsii isch. Si hend au de Waffetanz erfunde und d Spartaner im Chrieg gschützt. Dai sind si i Form vo zwee Bommstemm, wo mit zwee Balke verbunde gsii sind, vereert wore, sone Kultbild isch dokana gnennt wore. D Gräber vo de Dioskure sind z Sparta und z Therapne zaigt wore, aber o z Argos.

D Dioskure sind as Noothelfer aagrueffe wore und hend us de Seenoot grettet und hend sich entweder as Elmsfüür manifestiert oder as zwee Sterne. Erst spööter sind si mitem Sternbild Zwilling gliichgsetzt wore.

Literatur

Anne Ley: Dioskuroi. In: Der Neue Pauly (DNP). Band 3, Metzler, Stuttgart 1997, ISBN 3-476-01473-8, Sp. 673–677.