Erich Honecker

Dr Erich Honecker (* 25. Auguscht 1912 z Neunkirchen, † 29. Mai 1994 z Santiago de Chile) isch bis zur Wändi im Herbscht 1989 dr mächtigschti Politiker vo dr DDR gsii.

Dr Honecker isch im hütige Saarland gebore und ufgwachse, scho i de Jugend isch er kommunistische Funktionär gsii. Währed em Zwäite Wältchriäg isch er under de Nazis i s Zuchthuus choo. Nach em Chrieg het er im sowjetische Machtberiich vo Dütschland d Jugendorganisation gründet und isch i dr SED ufgschtige.

1971 isch er erschte Sekretär vom Zentralkommittee vo dr SED und Vorsitzende vom Nationale Verteidigungsrat worde. Vo 1976 aa isch er Generalsekretär vom Zentralkommittee vo de SED und Vorsitzende vom Schtaatsrat vo dr DDR gsii. Das isch gllichbedüütend gsii mit dr Funktion vom Schtaatschef. S Amt het er vom Willi Stoph übernoo, wo für nur drei Johr dr Nachfolger vom Walter Ulbricht gsii isch.

Dr Honecker het sich bis churz vor em Fall vo de Berliner Muur mit diktatorische Mittel für d Wiiterexischtenz vo dr DDR iigsetzt, isch aber letschtlich uuf dr ganze Linie am Volksuufschtand gschiiteret. Vom SED-Politbüro isch er am 18. Oktober 1989 zum Rücktritt zwunge worde.

1992 isch dr Honecker z Berlin wäge sinere Verantwortig für Mänscherächtsverletzige vom DDR-Regime vor Gricht gschtellt worde. Zumene Verfahre isch es aber ufgrund vonere Chranket und de umschtrittene Rächtslaag nit choo. Dr Honecker isch mit sinere Familie nach Chile usgreist, wo er im Mai 1994 gschtorbe isch.

Weblink

Commons: Erich Honecker – Sammlig vo Multimediadateie