Häbse-Theater

47.56497.5975

Dialäkt: Baseldütsch

S Häbse-Theater isch e Chläibühni in dr Klingedaalstrooss 79 in dr Schwizer Stadt Baasel. S Theater isch 1989 vom Hansjörg Hersberger (Häbse) gründet worde im ene Saal, wo as Kino baut aber nie eso brucht worden isch, und denn vo verschidnigi Lüt für die underschidligste Zwäck brucht worden isch, so het dr Alfred Rasser dört d Uruffüehrig vom «Demokrat Läppli» gee. Noch ere Totalrenovierig het s Theater meh as dreihundert Sitzblätz.

Sit 2022 wird s Theater vom Dani vo Wattewyl gläitet.

S Brogramm

S Theater füehrt Eigebrodukzione uf, drunder Musical und Operette («My Fair Laidy», «Der Zigeunerbaron» u. a.) und Komödiene mit em Häbse und siim Ensemble, won e Deil drvo vom Schwizer Färnseh ufgnoh und gsändet worde si.

S vorfasnächtlige Mimösli isch dört schon e baar Johr dehäi und für die Chliine git s Määrliuffüehrige.

Gastspiil gee hai Komiker wie dr Hape Kerkeling, dr Bastian Pastewka und dr Olli Dittrich, d Volksschauspiilere Heidi Kabel oder dr Schauspiiler Hannes Schmidhauser. Au Muusig cha mä go loose, vom Neuen Orchester Basel über dr Iwan Rebroff bis zur Dutch Swing College Band.

Quelle

• D Website vom Häbse-Theater abgrüeft am 17. Septämber 2011
• Basel Culture Unlimited (Site cha nüme abgrüeft wärde; Suche im Webarchiv)[1] [2] Vorlage:Toter Link/www.basel.com abgrüeft am 17. Septämber 2011