Dionysius (Bischof vu Rom)

Dr Dionysius († 26. Dezämber 268) isch Bischof vu Rom vum 22. Juli 260 bis zue sym Dod gsii. D Chilche un s Chloschter vu San Dionigi alle Qattro Fontane un San Silvestro in Capite z Rom sin em gweit.

Lääbe

Dr Dionysius isch wahrschyns z Griecheland uf d Wält chuu, wänn, waißt mer nit. Sy Name maint „em Dionysos gweit“ (griech./latyn.). As remische Presbyter het er bi me theologische Stryt iber d Giltigkait vu dr Daifi dur Häretiker mitgmacht.

Wun er 260 no dr Verfolgige dur dr Chaiser Valerian gwehlt woren isch, het er d Ufgob gha, di remisch Chilche, wu um die Zyt im Kaos glägen isch, nei z organisiere.

Är het mit em vu dr Chilche as Irrlehr verurdailt Subordinatianismus kämpft, wu im Gegesatz zum Monarchianismus gstande isch, wu dr Calixt I. dergege kämpft ghaa het: In dr Zyt vu sym Pontifikat hän si egyptischi Kleriker wäge Stryt um di rächt Lehr an ihn gwändet. Är het e Synod zämegruefe, wu dr Sabellianismus un dr Subordinatianismus verurdailt het. D Bschliss vu däre Synod het er em Dionysius vu Alexandria in ere Lehrschrift mitdailt. Dodin het er em Gschaffesyy vum Logos sy Zyygtsyy vis-à-vis gstellt: Dr Logos („s Wort“) cha nit wore syy, wel s sunscht e Zyt hätt mieße gee, wu s kai Logos gee het; är isch aber alliwyl gsii, wel er im Vater isch un em Vater sy Logos, Macht un Wyyshait isch, wu Gott nie gee hätt ohni. Dr Dionysius vu Alexandria het derno syni chrischtologisch Aaschauig vu dr Gschepfligkait vum Logos widerruefe un het in ere uusfierlige Schrift d Lehr vu dr remische Synod ibernuu. In ihre het er d Ebigkait vum Logos un sy Wääsesainhait mit em Vater betont. Mit däm Yylänke isch dä theologisch Stryt iberwunde gsii.

Dr Dionysius het an d Chilche vu Kappadokie, wu vu Gote verwieschtet wore sin, großi Gäldsumme gschickt, go die wider ufböue un di Gfange freichaufe. D Neiornig vu dr Chilche un dr Fride mit em Chaiser Gallienus het dr remische Chilche e rueigi Zyt brocht. Dr Dionysius isch dr erscht Bischof vum Rom, wu definitiv nit as Märtyrer gstorben isch. Är isch am 26. Dezämber 268 gstorbe.

Verehrig

Mahndäg

• kadolisch: 26. Dezämber
• z Augschburg un z Frankrych: Uffindig vu dr Bai: 22. April

Ikonografy

Z San Paolo fuori le Mura isch er mit Tunika, Pallium un Tonsur dargstellt, in dr Sixtinische Kapäll isch er im Ornat mit Buech in dr Raie vu dr Papschtfreske zaigt.

Literatur

• W. Möller; Hauck: Dionysius, Bischof von Rom. In: Realencyklopädie für protestantische Theologie und Kirche (RE). 3. Auflage. Band 4, Hinrichs, Leipzig 1898, S. 702–703.
• Friedrich Wilhelm Bautz: Dionysius. In: Biographisch-Bibliographisches Kirchenlexikon (BBKL). Band 1, Hamm 1975, Sp. 1318.
• Ytrag in d Catholic Encyclopedia, Robert Appleton Company, New York 1913 (änglisch)
• Adolf Jülicher: Dionysios 152. In: Paulys Realencyclopädie der classischen Altertumswissenschaft (RE). Band V,1, Stuttgart 1903, Sp. 994–995.

Weblink

 Commons: Dionysius (Bischof vu Rom) – Sammlig vo Multimediadateie

• Dionysius im Ökumenische Heiligenlexikon
• Gsamtwärch vu Migne Patrologia Latina mit Inhaltsverzaichnis

Vorgänger Sixtus II.

Bischof vu Rom Dr Titel Papscht isch anne 384 zum erschte Mol brucht wore. ca. 260–268

Nochfolger Felix I.

Dä Artikel basiert uff ere fräie Übersetzig vu (Bischof_von_Rom)&oldid=177650353 dere Version vum Artikel „Dionysius (Bischof_von_Rom)“ vu de dütsche Wikipedia. E Liste vu de Autore un Versione isch (Bischof_von_Rom)&action=history do z finde.