Lärche

Lärche
En Öiropäischi Lärche (Larix decidua), Illustrazion
Systematik
Underabteilig: Soomepflanze (Spermatophytina) Chlass: Coniferopsida Ordnig: Konifere (Coniferales) Familie: Chiiferegwäggs (Pinaceae) Underfamilie: Laricoideae Gattig: Lärche
Wüsseschaftlige Name
Larix
Philip Miller (Mill.)

D Lärche (Larix) bilde e Pflanzegattig in dr Familie vo de Chiiferegwäggs (Pinaceae). Si waggse hüfig in de nördlige Urwälder und in Wirtschaftswälder. Die Öiropäischi Lärche isch 2012 z Dütschland dr Baum vom Joor und 2002 z Östriich.

Öiropäischi Lärche (Larix decidua).

Lärche-Mischwald in Östriich im Herbst

Zwäi männligi und äi wiiblige Zapfe vo dr Öiropäische Lärche bim Blüeje.

Beschriibig

Alli Lärche-Arte si summergrüeni Böim, im Spootherbst wärfe si iiri noodleförmige Bletter ab. Si si äini vo nume zwäi Gattige innerhalb vo de Chiiferegwäggs, wo nit immergrüen si. Die anderi Gattig isch die vo de Goldlärche, wo aber nit zu de Lärche ghöört. Am ene Churzdriib het s 10 bis 60 Noodlebletter oder d Noodlebletter befinde sich äinzeln an äijöörige Langdriib. D Baumrinde isch bi junge Böim silber-grau bis grau-bruun; si wird spööter rötlig bruun bis bruun.

Die Öiropäischi Lärche (Larix decidua) wird bis zu öbbe 40 Meter hooch. Dr grösst Baum vo dr Gattig isch e Westamerikanischi Lärche (Larix occidentalis), dr „Seeley Lake Giant“ im Lolo National Forest in Montana, won 49,4 Meter hooch isch, e Stammdurchmässer (dbh) vo 2,21 Meter und 83 m³ Stamminhalt (In dr Schwiz git s en Exemplar mit 10,70 m³ Stammumfang, 3,34 m BHD, 8,50 m Dalieumfang (in 3 m H.), 12 m Basisumfang und 45 m³ Stamminhalt).

D Larix-Arte si äihüüsig drenntgschlächtig (monözisch), si häi also männligi und wiibligi Zapfe an äim Baum. Die männlige Zapfe stöön äinzeln, si äiförmig bis zylindrisch, gälblig und mäistens chliiner as äi Santimeter. Die wiiblige Zapfe si zerst grüen, root oder purpur. Si bruche vier bis siibe Möönet vo dr Befruchdig bis si ruf si, ströije iiri Soome us und blibe denn no e baar Joor am Baum. D Zapfe si äiförmig bis chuugeler und stään ufrächt am Ändi vo Churzdriib oder am ene churze, bognige Stiil mit Bletter am Zwiig. Wenn si rif wärde si si hell bis dunkel bruun. D Soomeschuppe si mäistens e chli bräiter as lang. D Deckschuppe si glatt und dünn. Die chliine Soome si wisslig und 4 bis 6 mm grooss mit 6 bis 9 mm groosse Flüügel.

D Söömling häi vier bis acht Käimbletter (Kotyledone).

Litratuur

• Michael P. Frankis: Generic Inter-Relationships in Pinaceae. In: Notes Royal Botanical Garden Edinburgh. Band 45, Nr. 3, 1988, S. 527–548 (online [abgerufen am 6. November 2011]). 
• Christopher J. Earle: Larix. In: The Gymnosperm Database. 27. Mai 2011, abgruefen am 6. November 2011 (englisch). 
• Robert Schloeth: Die Lärche. Ein intimes Baumporträt. AT, Aarau 1998, ISBN 3-85502-563-0. 
• Walter Erhardt u. a.: Der große Zander. Enzyklopädie der Pflanzennamen. Band 2. Verlag Eugen Ulmer, Stuttgart 2008. ISBN 978-3-8001-5406-7

Weblingg

 Commons: Lärche – Sammlig vo Multimediadateie

Dä Artikel basiert uff ere fräie Übersetzig vum Artikel „Lärchen“ vu de dütsche Wikipedia. E Liste vu de Autore un Versione isch do z finde.