Pakistan

Pakistan isch e Staat, wo am 14. August 1947 us dr mehheitlich muslimische Regione vu Britisch-Indie bildet worre isch. Sini Nachbäre sind Iran und Afghanischtan im Weschte, China im Norde, und Indie im Oschte.

اسلامی جمہوریۂ پاکستان
Islāmī Ǧumhūriya-i Pākistān (Urdu) Islamic Republic of Pakistan (Engl.)
Islamische Republik Pakistan
{{{ARTIKEL-FLAGGE}}} {{{ARTIKEL-WAPPEN}}}
Wahlspruch: (Urdu) اتحاد، تنظيم، يقين مُحکم (Ittehad, Tanzeem, Yaqeen-e-Muhkam) „Äinhäit, Disziplin und feschter Glaube“
Amtsspraach	Urdu unn Änglisch
Hauptstadt	Islamabad
Staatsoberhaupt	Asif Ali Zardari
Regierigschef	Shahbaz Sharif
Flächi	(35.; ohni Kaschmir) 796.095 km²
Iiwohnerzahl	(5.;ohni Kaschmir) 200,8 Mio. (2018)
Bevölkerigsdichti	(36.) 261 Iiwohner pro km²
Bevölkerigs­entwicklig	▲ +2,4 % pro Jahr
Bruttoinlandsprodukt Total (nom.) Total (KKP) BIP/Iiw. (nom.) BIP/Iiw. (KKP)	2017 303,0 Milliarden $ (41.) 1.057,0 Milliarden $ (25.) 1.541 $ (151.) 5.358 $ (140.)
Human Development Index	▲ 0,550 (147.) (2016)
Währig	Pakistanischi Rupie (PKR)
Unabhängigkeit	14. August 1947 (vom Vereinigte Königriich)
Nationalhimne	Qaumi Tarana
Zitzone	UTC+5
Kfz-Kennzeiche	PK
ISO 3166	PK, PAK, 586
Internet-TLD	.pk
Vorwahl	+92

Pakistan (Pakistan) Islamabad Islamabad Quetta Quetta Peschawar Peschawar Lahore Lahore Karatschi Karatschi Muzaffarabad Muzaffarabad K2 K2 AFGHANISTAN IRAN INDIEN CHINA Kaschmir ARABISCHES MEER

Geografii und Bivölkerig

Haupstadt vu Pakistan isch sit 1958 Islamabad. Vorher isch die gröschti Stadt vo Pakistan, Karachi, ganz im Süde, d'Hauptstadt gsi. Islamabad isch ganz noi baut worde.

Pakistan isch fascht ganz muslimisch, es lebed aber ganz verschideni Mensche und Kulture i dem Land. Im Weschte, im Gebirge a de Grenze zu Afghanischtan lebed vili Paschtune. Sie spreched Paschto. Sie sind au e grossi Minderheit im Nachbarstaat Afghanischtan. D'Regierig kämpft i de Grenzgebiet gege muslimische Extremischte. Im Südweschte lebed Belutsche, sie sind au im Iran z'finde. Aber au wenigi Chrischte und Hindus gits na in Pakischtan. Sie lebed vor allem in Lahore und in Karachi.

Sprache

Hauptsprach sind Urdu und Englisch worde. Urdu isch eigentli Hindi mit arabische (persische) Buechschtabe und Uusdrück. Englisch isch us de Ziite von de Engländer sehr präsent. Urdu wird aber nur vo de muslimische Iiwanderer us Indie gschproche. Die iiheimische Schprache sind Pandschabi (40%) i de Provinz Pandschab, Sindhi (15 %) i de Provinz Sindh im Süde, Paschto (15%) im Weschte und Belutschisch (4%) i de Provinz Belutschistan. Andere Schprache werded na ganz im Nordoschte gschproche.

Gschicht

Pakistan vu 1947-71

Na in Britisch-Indie händ sich d Muslim unter em Ali Jinnah zämegschlosse und scho früe en eigene muslimisch-indische Staat gwünscht. Im Jahr 1947 isch denn die Trennig cho. Sie isch aber sehr bluetig gsi. Bsunders i de ethnisch gmischte Provinz Pandschab isch es zu grosse Bevölkerigsuustusch cho. Sikhs sind in Millione nach Indie uusgwanderet oder gflohe, Muslim sind us ganz Indie und us de Provinz Pandschab nach Pakistan uusgwanderet oder gflohe.

Pakistan isch aber nach 1947 sehr es zerrissenigs Land gsi. Des isch eimol d Indus-Region (West-Pakistan) gsi un uf dr andere Site s Delta vum Ganges un Brahmaputra (Ost-Pakistan). Dezwische sin 2000 Kilometer mehrheitlich hinduistischs Indie gläge. D Hauptstadt vu dem Staatsgebilde isch in Westpakistan gläge, d Bevölchrigsmehheit aber in Ostpakistan gsi, wo sich immer wiider benoochdeiligt gfüehlt het. Im damalige Ostpakistan hät d'Bevölkerig aber nur Bengalisch gsproche. Sie händ Urdu nöd verschtande und händ ihri eigeni Gschicht. Das und die grosse Dischtanze händ grossi Problem bracht zwüsched dene zwei Landesteili.

Nooch em indisch-pakistanische Chrieg 1971 isch Ost-Pakistan als Bangladesch mit Hilf vo Indie unabhängig worre.

Bi dr Deilig vu Britisch-Indie in e islamische un e hinduistische Staat isch es au zueme „Bevölcherigsusdusch“ chumme, wo die bisher grösst Vertriibig in dr Menschheitsgschichte gsi isch mit an die 20 Millione zwangsumgsiidelte Lüt. Das sind Sikhs und Hindus gsi. Im Gägezug sind Muslim von Indie nach Pakistan cho. En prominente Pakistani, der ehemaligi Präsident, Pervez Musharraf isch in Delhi, der Hauptschtadt vo Indie uf d'Welt cho. Er isch aber scho als Chind nach Pakistan cho.

Grossi Spannige zwüsched Indie und Pakistan beschtönd wege de umschtrittene Provinz Kaschmir. Die hät sich 1947 Indie aagschlosse gha. D'Bevölkerig isch aber mehrheitlich muslimisch. Pakistan hät darum die Provinz ebefalls beaschprucht. Sie hät denn Kaschmir zumene Teil besetzt. Zwüsched de beide Länder isch es siit dem immer wieder zu Chrieg cho. Pakistan unterschtützt au Rebellebewegige in Kaschmir.

Verwaltigsgliderig

Pakistan isch no dr Verfassuig vo 1973 e föderale Staat. Är untergliederet sich in di vier Provinze Belutschistan, Khyber Pakhtunkhwa (früener Nordweschtlichi Gränzprovinz), Punjab un Sindh, wo ne uf füf Johr direkt vom Volch gwählti Provinzversammlig (Pronvincial Assembly) hän. Regierigschef isch dr Chief Minister, wo vo dr Provinzversammlig gwählt wird un im Allgmeinen dr Vorsitzende vo dr Partei isch, wo di stärchst Fraktion bildet. Em Chief Minister stoht aber in jedere Provinz e vom Präsident ernännte Gouverneur vor, wo no Absproch mit em Präsident d Provinzversammlig cha uflöse und ei Übergangsregierig bilde.

S Hauptstadtterritorium Islamabad un d Stammesbiet unter Bundesverwaltig an dr Gränze zue Afghanistan wärde uumittelbar vo dr pakistanische Zentralregierig verwaltet, ebeso s pakistanisch bsetzt Gilgit-Baltistan (füener Nordbiet) vo dr vo Indien beaaspruchte Region Kaschmir. Zue dr letschtere ghört au s teilautonom Biet Asad Kaschmir, wo ne eigeni gsetzgebendi Versammlig (Legislative Assembly), e Premierminister un e Präsident het.

Jedi Verwaltungseinheit isch in Distrikt unterglideret. S Hauptstadtterritorium bildet e eigene Distrikt. Insgsamt git s z Pakistan 119 Distrikt, dodevo 14 im bsetzte Teil vo Kaschmir. E Uusnahm stelle d Stammesbiet unter Bundesverwaltig dar.

Verwaltungsgliderig vo Pakistan

	Verwaltigseinheit	Status	Hauptstadt	Flächi
1	Belutschistan	Provinz	Quetta	347.190 km²
2	Khyber Pakhtunkhwa (Nordweschtlichi Gränzprovinz)	Provinz	Peschawar	74.521 km²
3	Punjab	Provinz	Lahore	205.344 km²
4	Sindh	Provinz	Karatschi	140.914 km²
5	Islamabad	Hauptstadtterritorium	Islamabad	906 km²
6	Stammesbietvunter Bundesverwaltig	Biet unter Bundesverwaltuig	Peschawar	27.220 km²
7	Asad Kaschmir	teilautonom Biet	Muzaffarabad	11.639 km²
8	Gilgit-Baltistan (Nordbiet)	Biet unter Bundesverwaltig	Gilgit	72.520 km²
	Pakistan	Islamische Republik	Islamabad	880.254 km²