Polychares
De Polychares (altgriech. Πολυχάρης) isch e Messenier gsii, wo ane 764 v. Chr. de Siig im Stadionlauf a de vierte Olympische Spiil gwune hett. Er söll de Grund för de Uusbruch vom Erste Messenische Chrieg gsii sii.
Sowoll de Pausanias, wie au de Diodor Siculus bischriibet de Striit zwösched em Polychares und em Spartanaer Euaiphnos (Εὔαιφνος) Denoo isch de Polychares e riiche Maa gsii sii, wo sini Rinder em Spartiat Euaiphons zom hüete ggee hett. De aber hett en bitroge und e paar Rinder verchauft und em Polychares verzellt, Roiber heget em siis Veech gstole. Nochem Diodor het de Euaiphnes nöd nu Rinder sondern o Hirte vom Polychares verchauft ghaa haa, und wo d Chäufer bimene Sturm a de messenische Chüste hend müesse lande, sind die Hirte vom Schiff gfloche und hend em Polychares verzellt, wa passiert isch. De Euaiphnes het denn em Polychares versproche, em s Geld z gee und isch mit demm sii Soo uf Sparta, hett de aber ermordet. De Polychares het denn z Sparta en Achlaag erhobe, isch aber nöd agloset wore. Er het denn us Raach jede Spartaner töödt, wonem bigegnet isch.
D Spartaner hend d Usliferig vom Polychares verlangt. D Messenier sind sich aber nöd ainig gsii und sind zonere Versammlig zämechoo. De König Androkles isch för d Uusliferig gsii, dem sii Brüder Antiochos aber degege. Im End hend d Aahänger vom Antiochos de Androkles töödt und de Polychares isch nös uusgliferet wore.
Wege dem und well scho früenner de spartanischi König Teleklos vo Messenier im Hailigtum vo der Artemis Limnatis töödt woren isch, hend d Spartaner bischlosse Chrieg gege Messenie zmache.
D Historizität vo de literarisch uusgschmückte Ereignis werd vo de Forschig kritisch biwertet und d Jooresaagoobe bim Pausanias wered as faltsch aglueget, und söttet öppe 40 Joor spööter agesetzt were.[1]
Quellen
ändere- Pausanias: Raise z Griecheland 4,4,5 – 4,5,2; 4,5,6
- Diodor Siculus 8.7
- Eusebius vo Caesarea, Chronikon zo de 4. Olympische Spiili
Ainzelnoowiis
ändere- ↑ Victor Parker: The Dates of the Messenian Wars; Chiron 21 (1991), 25-47.
Literatur
ändere- Nino Luraghi: The Ancient Messenians: Constructions of Ethnicity and Memory. Cambridge University Press, Cambridge 2008, ISBN 978-0-521-85587-7, S. 81 f. 95 f.
- Mischa Meier: Aristokraten und Damoden. Untersuchungen zur inneren Entwicklung Spartas im 7. Jahrhundert v. Chr. und zur politischen Funktion der Dichtung des Tyrtaios. Steiner, Stuttgart 1998, ISBN 3-515-07430-9, S. 86–87.
- Konrat Ziegler: Polychares. In: Paulys Realencyclopädie der classischen Altertumswissenschaft (RE). Band XXI,2, Stuttgart 1952, Sp. 1596.