René Magritte
Dr René François Ghislain Magritte (* 21. Novämber 1898 z Lessines in dr wallonische Brovinz Hennegau, Belgie; † 15. August 1967 z Brüssel) isch e belgische Mooler vom Surrealismus gsi.
Lääbe
ändereDr René Magritte het zwei Brüeder ghaa, dr Raymond, 1900 geboore, und dr Paul, 1902 uf d Wält choo. 1910 isch d Familie Magrittes uf Châtelet züüglet, wo dr René Magritte im Alter vo zwölfi mit em Moolen und Zäichne aagfange het. Si Mueter het sich im Joor 1912 us umbekannte Gründ s Lääbe gnoo, en Eräignis, wo für dr jungi Magritte traumatisch gsi isch. Druf isch dr Vater mit sine drei Söön uf Charleroi züüglet, ere Industriistadt, wo s Lääbe seer hert gsi isch. Dört isch dr René ufs Gümnasium und het sich in d Wält vo de Fantômas-Romään und vo dr Litratuur vom Robert Louis Stevenson, Edgar Allan Poe, Maurice Leblanc und vom Gaston Leroux zruggzooge.
1913 het er d Georgette Berger (1901-1986) kennegleert, wo si Modäll worden isch. In deere Zit si sini erste Arbäite entstande, no im impressionistische Stiil. Dr Magritte het vo 1916 bis 1918 an dr Brüsseler Akademii vo de schööne Künst gstudiert. D Wärk won er denn gmacht het, si kubistisch-futuristisch aaghuucht und gseen zum Däil deene vo de „Kölner Progressive“ zum Verwäggsle äänlig. D Georgette Berger het er 1920 zuefellig im Brüsseler Botanische Gaarte wider aadroffe. Im Joor 1922 het er mit ere e Familie gründet und het sich sis Lääbe as Musterzäichner in ere Dapeetefabrik verdient[1] und vo 1923 aa as Blakaat- und Wärbigzäichner. 1923 het er sis erste Bild verchauft, e Bortret vo dr Sängere Evelyne Brélia.
Dr Magritte het beschlosse, „d Geegeständ nume no mit iire augefellige Detäi z moole“. Erst vo 1926 aa het er festi Verdrääg mit dr Brüssler Galerii „Le Centaure“ ghaa, und het sich usschliesslig uf die künstlerischi Brodukzioon chönne konzentriere. In däm Joor het er Dr verloornigi Dschocki gmoolt, sis erste surrealistische Bild.[1] 1927 het er si ersti Äinzelusstellig in dr Galerii „Le Centaure“ gha mit vorwiegend abstrakte Bilder. Schlüsselbilder us siner ghäimnisvolle „Schwarze Periode“ si die mit groosse schwarze Manne druf. „Dr Maa vom Meer“ oder „D Diebin“ us em Joor 1927 ghööre zu de Wärk, wo vom Filmheld Fantomas inspiriert si. Im gliiche Joor isch er uf Le-Perreux-sur- Marne bi Bariis züüglet, und het dört bis 1930 gläbt. Z Bariis häi en vor allem die metaphüsische Bilder vom Giorgio de Chirico beiidruckt, vor allem s „Lied vo dr Liebi“.
Vo 1930 aa isch dr Magritte wider z Brüssel gsi und Middelpunkt vom ene kulturintressierte Kräis vo Fründ. Zu sine Fründ häi dr André Breton, dr Paul Éluard, dr Joan Miró, dr Hans Arp und spööter au dr Salvador Dalí und dr Dräibuechautor Claude Spaak zelt, und däm si Frau Suzanne Spaak, won er bortretiert het.[2]. Er het e baar Wärk in dr Exposition Internationale du Surréalisme ufghängt gha, wo 1938 in dr Galerii Beaux-Arts z Bariis stattgfunde het.
Vo 1929 bis 1966 het er as Redaktöör vo meerere Zitschrifte und Zitige gschafft, er het meereri Churzfilm dräit, het sich nonemol an de Impressioniste orientiert, isch e baar mol in die Kommunistischi Bartei vo Belgie ii- und denn wider usdräte und het Vordrääg ghalte über sini Arbäite. Sit de nünzääsächziger Joor häi im Magritte sini Moolerei und und sis Dänke e wichdige Iifluss ghaa uf Ströömige wie d Pop Art und d Konzeptkunst. 1956 het er dr Guggenheim-Briis für Belgie gwunne. Im Joor 1959 isch dr René Magritte Däilnäämer an dr documenta II z Kassel gsi.
1967 het män em vorgschlaage, meereri vo sine Gmäld as Skulpture lo usfüere. Er het d Entwürf zäichnet, d Gussforme gmacht und d Modäll signiert. Churz druf isch er unerwartet am 15. August 1967 in siner Woonig z Brüssel am Chräbs gstorbe. Dr René Magritte isch uf eme Friidhoof z Brüssel-Schaarbeek begraabe.[3] Si letschts Bild isch nid fertig gmoolt und isch bis zum Dood vo siner Frau 1986 uf dr Staffelei bliibe stoo. Er het sis ganze Lääbe lang e seer bürgerligi Existänz gfüert und und isch kuum us sim Heimetort uuse.
Sis ehemoolige Woonhuus in dr Rue Esseghem Nr. 135 z Jette isch sit 1999 s René Magritte Museum. Es het do näben e baar Kunstwärk d Originaaliirichdig, wo fast vollständig isch. Sit 2009 git s no s Magritte Museum im Brüsseler Stadtzentrum as Däil vo de Köönigliche Museä vo de Schööne Künst, wo sich em Wärk und Lääbe vom Künstler widmet. In däm Museum isch die grössti Sammlig vo Kunstwärk vom René Magritte uf dr ganze Wält.
Litratuur
ändere- Michel Foucault: Dies ist keine Pfeife. 1973; us em Franzöösische vom Walter Seitter, Carl Hanser Verlag, München 1997, ISBN 3-446-18904-1.
- Uwe M. Schneede: Rene Magritte. 6. überarbäiteti Uflaag. DuMont, Köln 1984 (= DuMont Taschenbücher, Nr.4), ISBN 3-7701-0711-X.
- Jacques Roisin: Ceci n'est pas une biographie de Magritte. Alice Editions, Brüssel 1998, ISBN 2-930182-05-9.
- David Sylvester: Magritte; us em Änglische vo dr Maria Paukert u. a., Parkland, Köln 2009, ISBN 978-3-89340-081-2.
- BA-CA Kunstforum Wien, Fondation Beyeler (Hrsg.): René Magritte: Der Schlüssel der Träume. Ludion Verlag, Amsterdam 2005, ISBN 90-5544-567-3.
Weblingg
ändere
Commons: René Magritte – Sammlig vo Multimediadateie- Materialien von und über René Magritte im documenta-Archiv
- Suech no René Magritte in dr Dytsche Digitale Bibliothek (DDB)
- René Magritte uf kunstaspekte.de
- „René Magritte Museum“ z Brüssel
- Magritte Foundation
- Patricia Allmer: La Reproduction Interdite: René Magritte and Forgery. (PDF) , abgruefen am 24. April 2008.
Fuessnoote
ändere- ↑ 1,0 1,1 Kunstsammlung Nordrhein-Westfalen (Hrsg.): Einblicke. Das 20. Jahrhundert in der Kunstsammlung Nordrhein-Westfalen, Düsseldorf, Hatje Cantz Verlag, Ostfildern-Ruit 2000, S. 571
- ↑ art house Archivlink (Memento vom 3. Dezämber 2009 im Internet Archive)
- ↑ Find A Grave S Graab vom René Magritte
|
Dä Artikel basiert uff ere fräie Übersetzig vum Artikel „René_Magritte“ vu de dütsche Wikipedia. E Liste vu de Autore un Versione isch do z finde. |