Romanos IV.

Dr Romanos IV. Diogenes (middelgriech. Ρωμανὸς Δ' Διογένης; † 1072) isch vo 1068 bis 1071 dr byzantinisch Basileus gsi.

Romanos IV.
Kaiser vom Byzantinische Riich
Bariser Diptychon mit em Romanos IV. und dr Kaiserin Eudokia
Regierigsziit	1068–1071
Uf d Wält cho	öbbe1030
Gstorbe	1072 (im Alter vo 42)
Vorgänger	Konstantin X.
Nochfolger	Michael VII.
Verhürotet mit	Anna vo Bulgarie Eudokia Makrembolitissa

Dr Romanos isch us ere aagseene anatolische Aadelsfamilie choo und isch Guvernöör vo Serdica (hüte: Sofia) gsi. Sini milidäärischi Laufbaan het under em Kaiser Konstantin X. aagfange, und er het sich im Kampf gege d Petschenege uszäichnet. Im Joor 1067 isch er aageklagt worde, ass er an ere Verschwöörig gegen e Konstantin X. mitgmacht häig. Er isch zrugg uf Konstantinopel grüeft und zum Dood verurdäilt worde. S Urdäil isch denn in Verbannig umgwandlet und noch em Konstantin sim Dood am 21. Mai 1067 ufghoobe worde.

Er isch mit dr Anna, dr Dochder vom Alusian, Zar vo de Bulgare us em Huus Komitopuli, verhürootet gsi. Mit iir het er e Soon, dr Konstantin Diogenes gha, wo aber jung gstorbe isch. Noch em Dood vom Konstantin X. het er 1068 däm si Witwe, d Eudokia ghürootet und isch zum Mitkaiser erhoobe worde. Die drei Söön vom Konstantin, dr Michael, dr Konstantios und dr Andronikos, häi mitregiert, wäärend die iiflussriichi Familie vo de Dukas in dr Opposizioon gsi si.

Dr Romanos het zerst mit Erfolg gege d Seldschuke in Chläiasie kämpft, isch aber 1071 in dr Schlacht vo Manzikert vom Sultan Alp Arslan besigt und gfangegno worde. Noch emValerian isch er dr zwäit Kaiser in dr römisch-byzantinische Gschicht gsi, wo das bassiert isch. Gege d Zaalig vom ene Löösegäld und e Friidensverdraag isch er bald wider freigloo worde.

In dr Zwüschezit häi aber sini politische Gegner dr Soon vom Konstantin X., dr Michael VII., uf en Droon gsetzt. Dr Romanos het brobiert, öbbis gegen en z due, isch aber besigt und gfangegnoo worde. Mä het en gfolteret und schliesslig Ändi Juni 1072 bländet. Noch eme Bricht vom Michael Attaliates het sich d Wunde entzündet und isch vo Maade befalle worde, won em „vom Gsicht gfalle si“. Dr Romanos isch uf die griechischi Insle Proti verbannt worde, won er e baar Dääg spööter an de Folge vo dr Verletzig gstorbe isch.

Der Verdrag mit am Alp Arslan, wo dr Romanos abgschlosse het, isch noch sim Sturz vo de Seldschuke nüme anerkennt worde. Si häi denn under em Sultan Malik Schah I., em Soon vom Alp Arslan, groossi Däil vom byzantinische Anatolie erooberet.

Litratuur

• Charles M. Brand, Anthony Cutler: Romanos IV Diogenes, In: The Oxford Dictionary of Byzantium, Alexander P. Kazhdan (Hrsg.), Oxford University Press, 1991
• N. Skabalanovic: Vizantijskoe gosudarstvo i cerkov' v XI veke, St. Petersburg, 1884, S.98-109

Vorgänger Eudokia

Kaiser vo Byzanz 1068–1071

Nochfolger Michael VII.

Dä Artikel basiert uff ere fräie Übersetzig vum Artikel „Romanos_IV.“ vu de dütsche Wikipedia. E Liste vu de Autore un Versione isch do z finde.