Allium sativum

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre a planta de l'allo. Ta atros usos d'«allo» se veiga Allo (desambigación).

Allium sativum
Matas d'allos en un huerto.
Denominacions populars
Allo
Estau de conservación
Seguro (IUCN)
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Liliopsida
Orden:	Asparagales
Familia:	Amaryllidaceae
Subfamilia:	Allioideae
Tribu:	Allieae
Chenero:	Allium
Especie:	Allium sativum
Descripción
Allium sativum L., 1753

L'allo (d'o latín <ALLIU(M); cientificament Allium sativum (L., 1753)) ye una planta monocotiledonia amarilidacia, en a subfamilia d'as alióidias, de port herbacio, cautivada por o suyo bulbo caracteristico; l'allo propriament dito.

Ye a especie tipo tanto de a subfamilia d'as alióidias como d'o chenero Allium.

Descripción

A mata de l'allo ye una planta perén, estreitament emparentada con a cebolla, o puerro y a cebolleta, con as cuals comparte o chenero Allium a on que l'allo ye a especie tipo.

As fuellas planas y finas, creixen dica fer mas de 30 cm de lonchitut, y son leverament carnosas y con a nervadura paralela a l'eixe central. A planta en produz alto u baixo meya docena, que constituyen a mayor parte d'o volumen d'as partes aerias.

As flors son blancas, y amaneixen en una inflorescencia terminal en alto d'un tallo que ye o mas largo que produz a mata. As venas son radials, y se fincan en a tierra dica mas de 50 cm.

O bulbo ye l'organo mas caracteristico d'a especie, y tamién a parte comestible que s'aprofita d'ella. Se tracta d'un bulbo segmentau, embolicau en una pela decidua blanquinyosa, que se seca dimpués d'a cullita, produciu por una segmentación tardana en a maturación. A os segmentos se les conoix como os «dients de l'allo» u os «dients d'allo». O bulbo, que tiene a consideración d'hortalicia, ye a parte que da nombre a la especie.

Os allos se conservan meses dimpués de cullir-los, sin perder guaires propiedaz gracias a la capacidat de retener l'augua interna que tienen os dients. Dende a Edat Meya se'n conoix as propiedaz contra las infeccions, actualment sabemos que en especial contra las bacterianas, que tiene o teixiu interno d'os dients d'allo, y que se deben a la presencia d'aliina (a responsable indirecta de a ulor de l'allo) y de disulfuro d'alilo.

Cautivo

Se crei que l'allo ye dimanau d'Asia central, pero se tiene prebas que ya se cautivaba en l'Antigo Echipto. Os romanos y os griegos antigos tamién en consumiban con asiduidat, por o que o suyo cautivo probablement s'extendilló por Europa y a cuenca Mediterrania encara en l'Antiguedat.

L'allo se siembra d'entre marzo y abril, as menos vegadas en mayo, con dients anisolaus. Escapa millor si as temperaturas medias en os días cuan s'ha sembrau no pasaban de bels 20 °C, pus una calor excesiva es gosa malmeter en ista fase incial, cuan encara son tiernos. Os dients que se siembre han de tener o grillo ya un poquet escapau, de bels 3 u 4 cm d'altaria, y cal plantar-los con a punta t'alto porque si se fa a la contra l'allo futuro puede tener malformacions.

A cullita se fa en agosto y setiembre, cuan a mata comienza a ixecar-se. Os allos que s'ha sacau cuan a mata yera seca tienen o gusto mas fuerte de toz, y se consideran os piors ta minchar-ne, pero os que millor valen ta simient. A la contra, os que se pilla cuan a mata encara ye un poquet verde son os millors ta consumo.

Imáchens

• 
  Allos.
• 
  Un dient d'allo.
• 
  Inflorescencia.

Vinclos externos

• Se veigan as imáchens de Commons sobre Allium sativum.
• Wikispecies tiene un articlo sobre Allium sativum.

• Datos: Q23400
• Multimedia: Allium sativum / Q23400
• Especies: Allium sativum