Batalla de l'Ebro
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
A batalla de l'Ebro estió una d'as zagueras y mas decisivas batallas d'a guerra civil espanyola. Se produció dende o 25 de chulio a lo 16 de noviembre de 1938 cuan l'Exercito Popular Republicano aislato en Catalunya prebó de recuperar os territorios a lo sud de l'Ebro, enlazar con as linias republicanas d'o Sistema Iberico, afloixar a presión militar sobre Valencia, y aislar a las tropas sublevatas que i heba en Castellón.
Antecedents
editarDimpués d'a batalla de Belchit y d'a batalla de Teruel, en a primavera de 1938 as tropas sublevatas iban avanzando por a marguin dreita de l'Ebro y plegoron dica a mar Mediterrania por Vinaroz tallando en dos o territorio baixo control d'a Republica.
O gubierno d'a Republica reclutó mes soldatos en Catalunya y creyó un exercito de 100.000 hombres distribuitos en 3 cuerpos, o Cinqueno Cuerpo baixo o mando d'Enrique Líster, o Quinceno Cuerpo baixo Manuel Tagüeña y o Diecihueiteno Cuerpo. O mando supremo fue confiato a Juan Modesto y Vicente Rojo yera o chefe d'operacions.
Juan Negrín y o Gubierno Republicano heban pensato en as circunstancias internacionals pa decidir-se a lanzar una ofensiva en l'Ebro. Tamién pretendeban millorar a suya posición a l'hora d'unas posibles negociacions de paz con o Gubierno rebel. Con a ofensiva de l'Ebro sería posible estabilizar os frents de batalla y aguardar os resultaus d'a crisi de Checoslovaquia, en a que esperaban a formación d'un bloque de potencias democraticas pa contrarrestar l'auche de gubiernos de tipo totalitario y mesmo faixista. Os politicos republicanos suposaban que o gubierno de Franco se veyería carriato ta un conflicto internacional por Mussolini y Hitler.
Desembolique
editarA nueit d'o día 24 de chulio de 1938 se produció una ofensiva en un frent de cuasi 100 km, a mayor ofensiva republicana d'a guerra civil. A XIV Brigada Internacional fació una operación de guerra distractiva en Amposta que tamién pretendeba cubrir o flanco d'un ataque principal. En Mequinenza o XV Cuerpo fació un ataque tamién pa cubrir o flanco d'ixe ataque principal, que se produció en o sector de Gandesa baixo o mando de Líster. O paso d'o río se podió fer por sorpresa de tot, yera bien preparato y facioron servir puents, barcazas, y tota clase d'embarcacions.
As unidaz republicanas arrolloron a 50ª División d'o Cuerpo d'Exercito Marroquín en Flix, Móra d'Ebre y Miravet.
En l'aria d'Amposta a 14 Brigada internacional habió de reblar y tornar a cruzar o río, derrotata por a 105ª División d'os sublevatos.
En l'aria de Mequinenza a 42ª y a 44ª Divisions republicanas ocuporon una extensa aria entre Mequinenza y Fayón fendo retacular 5 km a los sublevatos.
En o sector central avanzó l'XI Brigada Internacional, formata por escandinavos, plegando dica Gandesa, sin poder ocupar-la de tot. Os republicanos controlaban ya un extenso arco entre Fayón y Cherta. Os republicanos desembolicoron un efectivo sistema de defensa pa poder mantener as suyas posicions.
Contraofensiva de Franco
editarNuevas unidaz acudioron a enfortir o Cuerpo d'Exercito Marroquín. 8 divisions de l'Exercito nacional defendeban Gandesa y o día 3 d'agosto a ofensiva republicana fue aturada. Francisco Franco encomenzó una lenta batalla de desgaste, (tecnica que seguiba en a guerra civil). En os 4 meses vinients os republicanos acotolarían os suyos recursos.
A principios d'agosto as divisions 82ª y 4ª d'os sublevatos ya heban feito desapareixer a bolsa de Mequinenza.
O 30 de setiembre os Pactos de Múnich defraudoron as esperanzas d'internacionalización d'o conflicto espanyol. Os republicanos ya no podeban mantener as suyas posicions a lo sud de l'Ebro. L'exercito Republicano yera sozmeso a un intenso bombardeyo de l'aviación y l'artillería y tamién sufriba ataques locals. O frent Republicano se fue replegando lentament enta l'Ebro.
O 18 de noviembre tornoron a cruzar o río camín d'o norte as zagueras tropas republicanas.
Consecuencias
editarA batalla de l'Ebro significó a derrota d'a resitencia que a Republica Espanyola podeba ofreixer a l'abance d'as tropas sublevatas. O 15 de chinero as tropas sublevatas entraban en Tarragona y en un mes cuasi tota Catalunya yera ya ocupata.
Datos: Q1280119
Multimedia: Batalla del Ebro / Q1280119