Consello d'a Fabla Aragonesa
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
O Consello d'a Fabla Aragonesa (C.F.A.) conoixito popularment como "Consello", ye una asociación cultural naixita en 1976 y reconoixita legalment en 1978. O suyo ambito territorial ye Aragón.
As fins d'ista asociación son a esfensa, promoción, estudio y espardidura de l'aragonés en toz os suyos aspectos:
Historia, literatura, gramatica, lexico, toponimia, folklore, consideración social y legal, pedagochía, didactica, amostranza, etc., parando especial cuenta en o estudio, protección y desembolique de totas as suyas variants locals y comarcals, as cuals son l'alacet de l'aragonés común u estándard.
O quefer d'o Consello d'a Fabla Aragonesa se basa en tres prencipios:
- Actitut rispetuosa enta a realidat trilingüe d'Aragón.
- No adscripción colectiva a garra ligallo politico, sindical u relichioso.
- Libertat ideolochica d'as personas que lo forman. Ye, de feito, una d'as asociacions de referencia arredol d'a luenga aragonesa en tota a sociedat aragonesa.
Dende a suya creyación, o Consello d'a Fabla Aragonesa ha treballato de recio en a dignificación de l'idioma aragonés, contribuindo a creyar un estato d'opinión favorable arredol d'ista chicorrona luenga romanica y espardindo o suyo conoiximiento a traviés de publicacions variatas, como as revistas Fuellas u Luenga e Fablas. Como editorial, baixo la dirección de Francho Nagore, ha publicato un total de 135 libros en aragonés en os zaguers 35 anyos, como A lueca. A istoria d'una mozeta d'o Semontano (1982) de Chuana Coscujuela, o Vocabulario básico bilingüe aragonés-castellano y castellano-aragonés (1997) de Antonio Martínez Ruiz, u Sobre fonética histórica del aragonés de Jesús Vázquez Obrador (2011).
Dende que se creyó en l'anyo 2000 o Consello Asesor de l'Aragonés dintro d'o Consello d'a Fabla Aragonesa, totas as decisions que prene iste organo se publican en Fuellas, ta que a chen las conoixca. Convoca cualques premios literarios: "Ana Abarca de Bolea" de poesía, "Chusé Coarasa" de novela curta, "O Gua" de literatura infantil y chovenil, etc.
O Consello ye miembro de l'Asociación por las Luengas y Culturas Europeyas Menazatas (ALCEM, antes AIDLCM). Asiste a los suyos congresos y ha organizato en Uesca lo XVIII.º Congreso en chulio de 1997[1] y lo XXIV.º Congreso en chulio de 2015 en a siede d'a Deputación Provincial de Uesca.[2]
Os organos de gubierno d'o Consello d'a Fabla Aragonesa son l'Asamblea Cheneral de consellers y a Chunta Directiva, que a suya composición y atribucions amaneixen reglatos en as Ordinacions d'o Consello. Os vocals, dende 2015, son siete miembros, mantenindo o criterio de paridat d'entre hombres y mullers, en a Chunta directiva.
| Chunta Directiva d'o
Consello d'a Fabla Aragonesa |
actual
(a partir d'aviento 2015 dica agora) |
anterior
(dende 2004 dica noviembre de 2015) |
|---|---|---|
| President | Chusé Inazio Nabarro | Chusé Inazio Nabarro |
| Vicepresident | Rafel Vidaller Tricas | Santiago Bal Palazios |
| Secretaría Cheneral | Ana Cris Vicén Pérez | Daniel Lerín Cristóbal |
| Tresorero | Chorche Escartín Guillén | Chorche Escartín Guillén |
| Vocals | Ana Gíménez Betrán (de Publicacions)
Amaya Gállego Lamarca (de Relacions) Julia Ara Oliván (d'Organización y Comercialización) María Villalba Monente (d'Amostranza) Óscar Latas Alegre (d'Estudios y Bibliotecas) Mónica Loncan Bergua (de Consellers d'Aduya) Paz Ríos Nasarre (de Comunicación) |
Alberto Gracia Trell (de Publicacions)
Rafel Vidaller Tricas (de Relacions) Miguel Ánchel Sanvicente (d'Organización y Comercialización) Carmina Paraíso Santolaria (d'Amostranza) Amaya Gállego Lamarca (d'Estudios y Bibliotecas) Ánchel Ramírez (de Consellers d'Aduya) Paz Ríos Nasarre (de Comunicación) |
Coleccions d'a Editorial CFA
editar- Serie cheneral en aragonés: Obras orichinals en aragonés, de creyación literaria en cheneral, incluyindo-ie volúmens colectivos de premios literarios.
- Puens enta ra parola: Colección de vocabularios, lexicos, glosarios e obras lexicograficas en cheneral.
- A tefla de cuatro fuellas: Colección d'asayos, estudios, rechiras e obras d'espardidura.
- A tuca: Creyación literaria: obras d'os millors autors que escriben en aragonés, testos clasicos e testimonials escritos orichinalmén en aragonés.
- Os fustez: Colección de traduccions.
- Charrín-charrán: Colección de libros escolars e d'amostranza
- O gua: Colección de literatura infantil e chovenil.
Referencias
editarVinclos externos
editar
Datos: Q3303987