Denominación d'Orichen Protechida Campo de Borcha

A Denominación d'Orichen Protechida Campo de Borcha ye una denominación d'orichen protechida (DO) vitivinicola d'Aragón dende 1977. A suya zona de producción se troba situada en o norueste d'a provincia de Zaragoza, en as comarcas d'o Campo de Borcha y de Tarazona y Moncayo. La componen 16 municipios y tien una amplaria de 6270 ha.

Museu d'o vin d'o Campo de Borcha

Orichens

A primera cita sobre a presencia d'a vit en ista zona ye un documento sobre a donación a o monesterio de Veruela d'os vinylas de Magallón en l'anyo 1203 estando abat Raimundo Guillén. Mientres o sieglo XIV os abaz de Veruela miroron d'agrupar as suyas propiedaz, crompando a villa d'Ainzón o 2 de chulio de 1453 a requesta de l'abat Gabriel Serra con l'obchectivo de desarrollar os vinyals. A l'abad Fray Martín de Vera (1676-1680) se debe a renovación completa d'os vinyals d'Ainzón.

Dica l'anyo 1835 encara yeran os monches de Veruela os que controlaban l'agricultura d'a zona y as suyas sinyorías en Alcalá, Litago, Vera de Moncayo, Bulbuent, Ainzón, Pozuelo, la grancha d'o Río en Borcha y atros biens en Agón, Anyón, Trasmoz, Magallón, Borcha, Albeta, Tarazona u Fuent de Xalón. Amás d'en o monesterio, yera tradición fer vins en bodegas privadas d'a zona, destacando mas que mas os tintos, pero elaborando-se-ie tamién blancos, rosaus, vins de licor y mesmo vins esbrumosos de calidat.

En a decada de 1950 y debiu a las dificultaz economicas pa comercializar o vin de forma particular, plega o cooperativismo a la zona, formando-se seis cooperativas que encara en l'actualidat agrupan a mayor parti d'a producción d'ista denominación d'orichen.

Redolada

Localización d'a D.O.P. Campo de Borcha.

L'altaria d'os vinyals varía entre os 350 y os 700 metros sobre o livel d'a mar. Os terrenos son calsineros y ricos en nutrients.

Clima

O clima ye continental, con una pluviometría d'entre 350 y 450 l/m² anyals.

Demarcación cheografica

Os siguients termins municipals son incluyius en a zona cheografica d'a Denominación d'Orichen Protechida Campo de Borcha:

Agón, Ainzón, Alberit, Albeta, Ambel, Bisimbre, Borcha, Bulbuent, Bureta, Lo Bust, Fuent de Xalón, Magallón, Maleixán, Pozuelo d'Aragón, Tagüenca, Vera de Moncayo y parcialment os termins municipals de Mallén y Frescano.

Caracteristicas

Ugas

Vino d'a D.O.P. Campo de Borcha.

• Tintas
  • Cabernet sauvignon
  • Merlot
  • Syrah
  • Tempranillo
  • Garnacha
  • Carinyena

• Blancas
  • Macabeu
  • Chardonnay
  • Moscatel d'Alexandría

Producción y comercialización

Bodegas

Istas son as 17 bodegas que fan parti d'a denominación d'orichen:

Bodegas Ainzón (Ainzón) Bodegas Alto Moncayo (Borcha) Bodegas Aragonesas (Fuent de Xalón) Bodegas Borsao (Borcha) Bodegas Cabal (Ainzón) Bodegas Morca (Borcha) Bodega Pagos del Moncayo (Vera de Moncayo) Bodega Palmeri Sicilia (Tagüenca) Bodega Picos (Magallón)

Bodegas Román (Bulbuent) Bodegas Ruberte (Magallón) Cooper Cellars (Pozuelo d'Aragón) Cooperativa Nuestra Señora Niño Perdido (Tagüenca) Cooperativa Santo Cristo (Magallón) Cooperativa San Juan Bautista (Fuent de Xalón) Santa Ana Crianzas y Viñedos Sociedad Cooperativa (Pozuelo d'Aragón) Sociedad Cooperativa Agrícola de Borja (Borcha)

Vinclos externos

• Se veigan as imáchens de Commons sobre a Denominación d'Orichen Protechida Campo de Borcha.
• (es) Web d'a DO Campo de Borcha
• (es) Vins de Campo de Borcha en alimentosdearagon.es

• Datos: Q2935540
• Multimedia: Campo de Borja (DO) / Q2935540