Portillón de Benás
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Portillón de Benás Port de Vénasque | |
|---|---|
| |
| Situación | |
| País |  Aragón Occitania
|
| De ta |
Val de Benás (Benás) Val de la Pique (Banyeras de Luixón) |
| Datos chenerals | |
| Altaria | 2.444 m |
| Trazau / construito en |
{{{calendata}}} |
| Maxima costera | {{{costera}}} % |
| Longaria | {{{longaria}}} km |
| Tipo | Camín d'alta montanya |
| Zarrau d'hibierno |
|
| Mapa | |
  | |
O portillón de Benás[1] u puerto de Benás (en francés Port de Vénasque, en castellano Portillón de Benasque) ye un puerto de montanya d'os Pireneus situau a una altaria de 2.444 metros entre a tuca Salvaguardia (2.736 m) y a tuca de la Mina (2.708 m).
Une a val de Benás con a val de la Pique.
Cheografía
editarO portillón de Benás se troba en a muga entre Aragón y Francia, en a cresta formada entre a tuca Salvaguardia (2.736 m) y a tuca de la Mina (2.708 m).
Dende Francia conecta con a val de la Pique, a traviés de camins d'alta montanya y trescruzando o ibons de Benás y o cubilar de Benás (en francés refuge de Vénasque). Por o costau aragonés conecta a val de l'Esera chusto debant d'o macizo de la Maladeta y os suyos prencipals picos: a tuca de la Maladeta, o mont Maldito y a tuca d'Aneto; deixando o Hespital de Benás enta l'ueste.
Historia
editar
O portillón de Benás ha estau emplegau dende fa sieglos ta as comunicacions entre Aragon y a val de Luixón. Manimenos, d'antis mas y mientres muito tiempo s'estimaba mas de fer servir o puerto de la Glera, dito tamién Puerto viello, situau mas a l'ueste y de mas fácil acceso, dica que o portillón de Benás fue adaptau, pareixe que por as órdens d'un conte de Comenche, arredol de l'anyo 1325 y con a fin de poder estar emplegau por un caballo montau por o suyo caballero, decindo-se dende alavez Puerto nuevo. O puerto ha estau emplegau por a-saber-los exercitos, dende os romanos, dica os exercitos d'a guerra d'o Francés y por os guerrilleros anti-franquistas mientres a tentativa d'invasión d'a Val d'Arán en 1944, asinas como por os comerciants y os contrabandistas, por o que ye fuent de numerosas leyendas.
O portillón de Benás yera un puesto de gambada prou frecuent entre a sociedat luixonesa d'o sieglo XIX, y encara ye un puesto de paso obligau ta os excursionistas y escaladors que vienen dende Francia en dirección a o macizo de la Maladeta, a Lardana y en l'atro sentiu ta acceder a las montanyas d'a redolada de Banyeras de Luixón. O bibliofilo y "inventor d'o pireneismo" Henri Beraldi (Cent ans aux Pyrénées) deciba que i heba pasau cient vegadas, lo que probablement no constituye un record. Dende aquí un sendero leva ascape dica a cima d'a tuca Salvaguardia.
Francisco Cabellud estió, dica a segunda metat d'o sieglo XIX, a fegura indiscutible d'o puerto de Benás. En sus orichens tintorero en a villa de Benás, obtuvo en 1865 a concesión d'un albergue, un poquet por debaixo d'a cima d'o collau, en o costau aragonés. Os turistas que en pasaban no gosaban aturar-sen a refrescar-sen en a tabierna de Cabellud. A mayoría no quereban pagar l'alto pre que costaba astí un vaso de vin de mala calidat, mientres que os amigos d'o tabiernero, en cheneral as grans feguras d'o pireneismo, teneban dreito a beber-sen as buenas botellas. Estió tamién o mesmo qui prencipió a cobrar un peache d'una peceta a toz aquels que queresen emplegar o camín ta puyar a la cima. Os benasqueses prencipioron por iste motivo a decir a la mesma Salvaguardia pico Cabellud. D'hibierno, cuan la nieve feba imposible o transito por o puerto, l'albergue se feba servir de cubilar: en 1904, ta a primera puyada con esquís a l'Aneto, o equipo composau por Louis Robach, Falisse, Aubry, Heïd, Basset dentró en l'albergue enronau por a nieu en crebando una finestra. Mas tardi fue definitivament abandonau enta 1930 con l'apertura d'o cubilar de la Rencllusa a os piez d'a Maladeta, espaldando-se luego. As suyas ruinas encara son visibles.
Continando con a suya tradición de puesto de paso entre Francia y Aragón, o portillón d Benás a estau l'obcheto d'estudeos de cuantos prochetos de túnels internacionals, primero ferroviario en o sieglo XIX[2] y simpués carretero a partir d'a segunda metat d'o sieglo XX[3].
Puyada
editar
Salindo dende o costau occitán s'ha de pasar por una crepaza prou estreita en a paret rocosa a la que s'accede dende o Hespital de Francia, puyando por a val d'o río Pique, a traviés d'un sendero pleno de remeranzas d'atros tiempos: la dita Trou des Chaudronniers (en francés Forau d'os Calderers) marca por eixemplo o puesto a on morioron uns calderers auverneses que marchaban enta Espanya. Una mica mas entabant, a cabanya de l'Homme debe o suyo nombre a una roca aquí situada, que podría estar o recuerdo d'un homicidio (as leyendas de barallas entre duaners y contrabandistas en o puerto son a-saber-las). Os ibons de Benás (Boums en o dialecto luixonés), situaus a o piet d'a tuca Salvaguardia, son tres y desembocan succesivament l'uno en l'atro. O cubilar de Benás fue instalau a cantos de l'ibón central. En o zaguer trampo dica o collau, o sendero, que fa a-saber-las revueltas, fue preparau por as dos versants por as tropas de Napoleón Bonaparte con l'obchectivo de permitir o paso d'as mulas de carga en a suya ocupación d'Espanya. Feba ta par d'alavez parti d'a carretera nacional 125 que veniba dende Tolosa. Dende a breca bi ha una sobrebuena anvista d'o macizo de la Maladeta y a tuca d'Aneto.
En continar enta l'este s'arriba ta o puerto de la Picada, que mos aduga cuan lo trescruzamos enta o paso dera Escaleta, que leva un atra vegada enta territorio francés, podendo-nos endrezar enta la val d'Arán por o paso dera Monjòia u baixar enta o norte a traviés d'a plana de Campsaure y os suyos praus, tornando enta o Hespital de Francia.
En baixando o puerto dica o sud s'arriba a la val de l'Esera y dimpués puyando por l'atro costau plegamos enta o cubilar de la Rencllusa, punto de partida d'as puyadas a la Maladeta, o Mont Maldito y l'Aneto. Baixando a val de l'Esera enta l'ueste, arribamos a l'antigo Hespital de Benás, actualment convertiu en un hotel, y dimpués a la villa de Benás.
Referencias
editar- ↑ (es) BOA ORDEN VMV/914/2020, de 14 de septiembre, por la que se publica el Acuerdo adoptado por el Gobierno de Aragón, en su reunión celebrada el día 15 de julio de 2020, por el que se aprueban las modificaciones del Nomenclátor Geográfico de Aragón.
- ↑ (fr) Chemin de fer transpyrénéen central par Luchon, Vénasque, Monzon. Jean-Dominique Estradère. 15 de setiembre de 1887
- ↑ (fr) On reparle du tunnel Luchon - Venasque. Pyrénées. Num. 53, Chinero de 1963.
Bibliografía
editar- Henri Beraldi, Cent ans aux Pyrénées, Paris, 1898-1904, sept volumes in-8°, reedición por «Les Amis du livre pyrénéen», Pau, 1977, dimpués por a «Librairie des Pyrénées et de Gascogne», Pau, 2001
Vinclos externos
editar
Se veigan as imáchens de Commons sobre o portillón de Benás.- (es) Portillón de Benás
Datos: Q3398589- Multimedia: Port de Vénasque / Q3398589