Bubo bubo
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Bubo bubo | |
|---|---|
 | |
| Denominacions populars | |
| Estau de conservación | |
| Clasificación cientifica | |
| Animalia | |
Filo:
|
Chordata |
| Aves | |
| Strigiformes | |
| Strigidae | |
| Bubo | |
| B. bubo | |
| Descripción | |
| Distribución cheografica | |
 | |
O bobón u babueso (Bubo bubo (Linnaeus, 1758)[3]) ye una especie d'au d'a orden d'os Strigiformes y familia Strigidae que ye una d'as especies mas grans de Bubo y as fembras pueden creixer dica una longaria total de 75 cm , con una envergadura de 188 cm, estando os masclos una miqueta mas chicoz.[4] Ista au tien flocos d'orellas distintivos, con partis superiors malladas con una color negruta mas fosca y lionada. As alas y a coda son baretiadas. As partis inferiors son d'una tonalidat variable, con rayas de colors mas foscas. Lo disco facial no ye muit visible y os uellos anaranchaus son distintivos.[5]
Os bobons se troban en muitos habitats, pero en a suya mayoría son aus de rechions montanyosas u atras arias rocosas, a ormino amán d'o canto de selvas variadas y arias arbustivas con obreduras u paúls pa cazar a mayoría d'as suyas presas. Amás, habitan selvas de coniferas, estepas y atras arias en elevacions variadas que gosan estar relativament remotas. Os bobons se troban ocasionalment entre tierras de cautivo y en entornos semellants a parques adintro d'as ciudaz europeas, mesmo rarament adintro d'arias urbanas mas concorridas.[6] Iste bobón ye un depredador sobretot nocturno, que caza una variedat de diferents especies de presas. Predominantement, a suya dieta ye componida per chicoz mamifers como radedors y coniellos, pero tamién s'alimentan de mamifers mas grans y aus de cuantos grandarias. Atras presas secundarias pueden incluyir reptils, anfibios, peixes, insectos grans y atros invertebraus variaus.[7] A especie por un regular se reproduz en os zillos d'as cinglas, en clamors, entre penyas u en atros puestos amagaus. Lo niedo contiene tipicament una niedada de dos uegos, que se meten a entrevalos y eclosionan en diferents intes.[8] A fembra coba os uegos y cría a las crietas, y lo masclo proporciona birolla pa ella y, cuan naixen, tamién pa os pichons. Toz dos adultos proporcionan o cudiau parental contino d'os chóvens mientres uns cinco meses.
Amás d'estar una d'as especies vivients mas grans de Bubo, o bobón ye tamién una d'as mas distribuyidas. Con un aria de distribución total en Europa y Asia d'uns 32 millons de km2 y una población total estimada entre 250.000 y 2,5 millons, l'IUCN enumera l'estau de conservación de l'au como de menor preocupación. A gran mayoría d'os bobons viven en Europa continental, Escandinavia, Rusia (que ye cuasi con aseguranza an ocurre a mayor cantidat y diversidat de razas) y Asia central.[9] Existen poblacions menors adicionals en Anatolia, o norte d'Orient Meyo, a parti superior montanyosa d'o sud d'Asia y en China; amás, s'estima que entre 12 y 40 parellas residían en o Reino Uniu a partir de 2016 (an posiblement no son nativas), un numero que puede estar en augmento. Os bobons domesticaus s'han emplegau ocasionalment en o control de plagas a resultas d'a suya grandaria pa disuadir a las aus grans como as gabiotas de fer niedo.
Referencias
editar- ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ (an)/(ca)/(es) Cartel d'as aus (PDF: 9.9 Mb) d'a pachina web "Aragón Natural" d'o Gubierno d'Aragón
- ↑ (en) Claus König, Friedhelm Weick, Becking: Owls – A Guide to the Owls of the World. Pica Press, Sussex 1999, ISBN 1-873403-74-7.
- ↑ (en) Owls of the World: A Photographic Guide by Mikkola, H. Firefly Books (2012), ISBN 9781770851368
- ↑ (en) Penteriani, V., & del Mar Delgado, M. (2019). The eagle owl. Bloomsbury Publishing.
- ↑ (en) Voous, K.H. (1988). Owls of the Northern Hemisphere. The MIT Press, ISBN 0262220350.
- ↑ (en) Obuch, J., & Karaska, D. (2010). The Eurasian eagle-owl (Bubo bubo) diet in the Orava Region (N Slovakia). Raptor Journal, 4(1), 83-98.
- ↑ (en) Hume, R. (1991). Owls of the world. Running Press, Philadelphia.
- ↑ (en) BirdLife International (2017). "Bubo bubo". IUCN Red List of Threatened Species. 2017: e.T22688927A113569670. doi:10.2305/IUCN.UK.2017-1.RLTS.T22688927A113569670.en
Vinclos externos
editar
Se veigan as imáchens de Commons sobre Bubo bubo.
Wikispecies tiene un articlo sobre Bubo bubo.
