Dixebra

Dixebra
	; Xune Elipe, vocalista de Dixebra en collaboración con Mallacán (25 de mayu de 2010)
Datos xenerales
Orixe	Avilés; Asturies
Información artística
Xéneru(os)	Rock; Rock-folk
Periodu d'actividá	1987 – anguaño
Sellu discográficu	Aguañaz
Miembros
	Lista Jorge Cambareli ; Primi Abella ; Fernando Rubio ; Xune Elipe ; Javi Rodríguez ; Eladio Díaz ; Agustín Lara ; Mario Fueyo ; Sergio Rodríguez ; Isra Sánchez ;
Antiguos miembros
	Cesáreo García Maniegu (ex-componente); Xosé Nel Riesgo (ex-componente); Manu Tamargo (ex-componente); Xuanra (ex-componente); Fredi Sánchez (ex-componente); Asier Martín (ex-componente); Panfle (ex-componente)
Enllaces esternos
Sitiu web oficial	http://www.dixebra.com
Discogs	1680576
	[editar datos en Wikidata]

Dixebra ye un grupu de rock d'Asturies, que canta n'asturianu.

Historia

Dixebra fúndase'l 6 de xineru de 1987 n'Avilés y d'entós p'acá vien trabayando por afitar un verdaderu rock asturianu. Dende l'entamu los sos componentes tienen como oxetivu facer una música comprometida con Asturies, como amuesen nes lletres de los sos cantares y nes actitúes personales. Nos sos testos reflexen la variada y complexa realidá de la sociedá asturiana, inspirándose en fechos de la historia recién asturiana. Poro, nun ye estrañu que nellos heba referencies constantes a la vida política, cultural o llaboral d'Asturies, ensin escaecer el compromisu internacionalista y solidariu.

Otra de les principales señes d'identidá de Dixebra ye l'emplegu esclusivu de la llingua asturiana, siendo esti ún de los factores que-y da más carauter; cuntando amás como collaboradores nes lletres con renomaos escritores de la lliteratura asturiana como Boni Pérez, Pablo A. Marín Estrada y sobre manera Xandru Fernández. Nel so últimu discu incorpórase un nuevu lletrista: Quique Faes. La tercer premisa que define a esta banda ye la incorporación na so instrumentación de la gaita y la inclusión de melodíes tradicionales na so música, too ello endolcáu nun rock potente con múltiples influyencies: ska, punk, folk, reggae, rap... L'estilu de Dixebra pue definise como un soníu fuerte, con un ampliu mestizaxe musical, influyenciáu pola música tradicional y con testos comprometíos en llingua asturiana.

Nestos años Dixebra dio bayura de conciertos per toa Asturies y fuera (Galiza, Euskadi, Cantabria, Castiella, Aragón, Cataluña, Bretaña...). Rescampla que nel añu 1997 actuaron como representantes asturianos nel afamáu Festival Intercélticu de Lorient en Bretaña, onde collecharon perbones crítiques por parte de los medios especializaos, siendo la primer vegada qu'un grupu de rock asturianu participaba en tan importante alcuentru musical celta. Amás esi mesmu añu celebraron los sos 10 años de vida con un espectáculu nel que la tradición y la modernidá dábense la mano. Cuntaron cola participación de la Banda de Gaites Tabladar, diversos collaboradores musicales, la compañía d'animación teatral Tres Ruedas, el coleutivu de creación videográfica Bebés Furiosos y los personaxes tradicionales del conceyu Siero Los Sidros. Esti espectáculu tuvo una repercusión importante nel mundu musical asturianu.

Los más de los aficionaos y críticos coinciden en que Dixebra ye un grupu de direutu; nesi contautu col públicu ye onde meyor se desenvuelven. Les sos actuaciones carauterícense pola participación espontánea de los presentes, buscando la mayor comunicación posible ente músicos y espeutadores.

Tocante a les grabaciones, aparte d'apaecer en vanes, casetes y discos compartíos, el so primer LP llegó en 1990 y llevaba'l títulu de "Grie-ska" (FonoAstur); darréu d'ello vinieron "¿Asturies o trabayes?" (L'Aguañaz 1993), "Apuntate a la llista" (L'Aguañaz 1995), "Dieron en duru" (L'Aguañaz 1997) "Glaya un país" (L'Aguanaz 2000) y “Sube la marea” (L'Aguañaz 2002). Nel añu 2004 editen un recopilatoriu con versiones y remezcles d'una esbilla del so repertoriu, "Cróniques d'un pueblu", acompañáu d'un llibru que resume los sos 17 años de vida. Llueu diba venir otru trabayu discográficu, "Ensin novedá" (L'Aguañaz 2005), onde siguieron evolucionando musicalmente, aportando nuevos matices a la so particular propuesta, llogrando con él mui bones crítiques. Nel 2006, pol so venti aniversariu, ficieron un conciertu na so ciudá natal, Avilés, onde axuntaron a unes 3.000 persones y grabaron un discu en direutu N'aición (L'Aguañaz). L'añu siguiente, a finales del 2007, asoleyóse un discu homenaxe onde ventiún grupos estremaos del panorama musical asturianu facíen versiones de cantares del grupu, ¡Salú ya Dixebra! Perversiones (L'Aguañaz).

En 2008 Dixebra representó a Asturies nel concursu musical de llingues minorizaes Liet international, celebráu en Laponia, onde algamaron la segunda posición col tema "Indios".

Con motivu de cumplise'l 25 aniversariu del grupu, Dixebra dio un conciertu'l 30 de marzu na sala avilesina Quattro nel que subieron al escenariu otros músicos de la escena asturiana. Mentes que nel añu 2017 volvieron al Festival Intercélticu de Lorient pa celebrar los sos 30 años enriba los escenarios.

Componentes

Primi Abella - Guitarra
Xune Elipe - Voz
Jorge Cambareli - Batería
Javi Rodríguez - Baxu
Eladio Díaz - Saxo
Agustín Lara - Trompeta
Sergio Rodríguez - Programaciones y soníu direutu
Llorián García- Gaita
Rubén Bada - Bouzouki, violín, guitarra

Componentes antiguos

Cesáreo García Maniegu - Guitarra
Flavio Benito - Gaita
Xosé Nel Riesgo - Batería
Manu Tamargo - Baxu
Xuanra - Batería
Fredi Sánchez - Batería, percusiones
Asier Martín - Guitarra
Panfle - Guitarra
Isra Sánchez - Batería
Mario Fueyo - Tecláu
Fernando Rubio - Gaita

Músicos collaboradores

Demientres los sos más de 30 años d'historia, el grupu cuntó con abondes collaboraciones, nes sos grabaciones y conciertos, de músicos de dellos ámbitos como:

José Tejedor
Xosé Ambás, (N'arba) (punteru y voces)
Anabel Santiago (voz)
Fermin Muguruza (voz)
Evaristo, (La Polla Records) (voz).
Antón Barquero (tambor, percursión)
Fonsu Mielgo, (Llan de Cubel) , (cordión)
Marcos Llope,(Llan de Cubel), (xiblata)
Dani García (violín)
Jorge Turienzo (saxu)
Paco “Loco” (guitarra)
Tina cuadriello (cordión),
Daniel García (violín)
Federico Pardo (oboe).
José Escarda (clarinete)
Eladio Díaz (Saxo). Aguaño componente.
Agustín Lara (trompeta). Anguaño componente.
David Colado (Trombón de vares).
Francisco Arias (trompeta)
David Colado (trombón)
Tomás Fernández (saxu)
Angel Ruiz (banjo)
Carlos Martínez (igües vientos)
Rubén (violín y bouzouki)
Merce Santos (zanfona y caxa escocesa).
David Colado (trombón)
Antonio Gómez (trombón).
Paco Martínez (programaciones, igües de vientu).
Rubén Bada (bouzouki), anguaño componente
Alberto Castelló, (trombón),
Germán Álvarez (bombarda y xiblata)
Sonia Díaz (coros).
Mario Fueyo (sckratches).
Daniel Jiménez (guitarra)
Dani Antistylo (samplers)

Discografía

Álbumes


Discu	Discográfica	Añu	Notes
Grieska	FonoAstur	1990
¿Asturies o trabayes?	L'Aguañaz	1993
Apúntate a la llista	L'Aguañaz	1995
Dieron en duru	L'Aguañaz	1997
Glaya un país	L'Aguañaz	2000
Sube la marea	L'Aguañaz	2002
Cróniques d'un pueblu	L'Aguañaz	2003	Discu-Llibru. El periodista xixonés fai un percorríu nel llibru pela hestoria social d'Asturies al empar qu'un viaxe pela historia del grupu.
Ensin novedá	L'Aguañaz	2005
N'acción	L'Aguañaz	2006	Discu en direutu, conciertu XX aniversariu acompañáu d'un DVD de l'actuación y otros materiales.
Amor incendiariu	L'Aguañaz	2009
Versióis Eonaviegas	L'Aguañaz	2009	Versión en gallegoasturianu de cuatro cantares de Dixebra (Quero ser ferro, Amor incediario, Berra y Xentuaya).
Bailla la crisis	Goxe Producciones	2011
XXV	Goxe Producciones	2012
Tiempos Modernos	Goxe Producciones	2013
Dalgo vieyo, dalgo nuevo, dalgo emprestao	Goxe Producciones	2017
Uviéu, 17-09-2017	Goxe Producciones	2018

Ver tamién

¡Salú ya Dixebra! Perversiones: discu-homenaxe con versiones de 21 cantares de la banda interpretaes por gran parte de los principales músicos del panorama musical asturianu del momentu.