Iaido

Iaido
居合道
País d'orixe	Xapón
Fundador	Desconocíu. Tiense a Nakayama Hakudo (c.1873-1958) por creador del términu “iaido”.
Paternidá	Iaijutsu
Deporte olímpicu	Non

L’Iaido (居合道: iaidō) ye, en poques pallabres, l'arte marcial xaponés de desenvainar la espada y cortar d'esmenu. El significáu lliteral de los kanjis que componen esti términu ye’l siguiente: via (道 = dō) de la xunión (合 = ai) del ser (居 = i). N’efeutu, influyida pola filosofía zen, l'oxetivu final d'esta disciplina ye la perfeuta xunión y harmonía con unu mesmu y col Universu. L’Iaido arraigona n’antigües escueles de kenjutsu y iaijutsu qu'allugaben l'entrenamientu de los samuráis y qu'algamaron el so máximu esplendor contra’l sieglu XVI.

Historia

La tradición y la hestoria del Iaido anicien hai unos 500 años. L’Iaido, como lu conocemos güei, entamó probablemente con Iizasa Choisai, fundador del estilu Tenshin Shoden Katori Shinto Ryu. Esta escuela incluyía nel so currículum práutiques con diversos tipos d'armes, dende l'usu de la katana y el palu (jo), al del cuchiellu y la naginata. Una parte del programa consistía na téunica de desenvainar rápido una espada y golpiar darréu, ello ye, l'Iai. Esta téunica utilizábase pa la defensa o pal ataque preventivu.

Dizse tamién de Jinsuke Hayashizaki Shigenobu (1542-1621) que, como en cualquier arte marcial daquella, recibió la inspiración divina pa desarrollar la so téunica, neto qu'Iizasa Choisai. Esta inspiración llevólu a desendolcar un conxuntu de téuniques que denomó Muso Shinden Jushin Ryu Batto Jutsu. Equí la pallabra Batto significa cenciellamente desenvainar la espada.

Un importante factor común en dambes tradiciones o Ryu (escueles), asina como en munches otres tradiciones qu'emplegaben la katana, yera que les sos práutiques incluyíen solamente l'usu de kates, siempre defendiéndose contra oponentes imaxinarios nos sos entrenamientos.

A lo llargo de la historia emplegáronse diferentes espresiones pa referise a les téuniques de sacar la espada en combate. Nel Periodu Muromachi (1392-1572) llamábenlo battojutsu. Nel Periodu Edo acabo siendo conocío como Iaijutsu. A veces usábase simplemente’l nome “batto”, o tamién “saya no uchi”.

A principios del sieglu XX, Nakayama Hakudo (1873?-1958) acuñó’l términu “iaido”. Esti ye precisamente’l términu avezáu pa referise a la forma moderna, orientada al desarrollu personal, enseñada por exemplu pola Federación Xaponesa de Kendo (AJKF), mentanto Iaijutsu úsase pa delles de les téuniques combatives de los más antiguos koryu.

En cualesquier casu’l términu “iai” acabó trunfando de manera tanto nes escueles antigües como nos sistemes modernos. La denomación d'iaido ye ampliamente usada nos medios marciales, en publicaciones xaponeses especializaes^[1] y n’actos oficiales pa referise xenéricamente a toles escueles, antigües y modernes, qu'enseñen iai. Sicasí hailos críticos con esta denomación, como’l maestru Nakamura Taizaburo (1912-2003), que considera más correuto utilizar el términu battodo o iai-battodo.^[2]

Esencia

Históricamente l'iaido utilizábase nos duelos ente samuráis, u la muerte d'ún o entrambos adversarios producíase polo xeneral llueu d'un o dos golpes como máximo. Ensin dulda nestes condiciones l'habilidá téunica requerida yera cimera y, de fechu, tamién yera posible qu'un duelu terminara sólo cola estraición de la espada y una única cortada instantánea. Poro l'arte de desenvainar la espada yera d'importancia fundamental na vida del samurái.

Modernamente, tres el comienzu de la Restauración Meiji nel últimu terciu del sieglu XIX, l'estudiu de la katana tien un valor puramente interior, como mediu d'investigación pa pescudar lo fondero del ser, y pola mor d'ello les escueles antigües (koryu) de kenjutsu y iaijutsu evolucionaron haza’l Kendo y l'Iaido.

La esencia del iaido contiénse na fras saya no uchi de katsu ("vencer [cola espada] na vaina", vencer ensin desenvainar), o tener y demostrar una conocencia tala qu'induza al enemigu a refugar la llucha incluso primero del so empiezu. Esti principiu esprésalu por exemplu Yagyu Munenori nel so tratáu Heihō kadenshō, como "la espada que da la vida" (katsushinken).

Práutica

L’Iaido entrénase davezu utilizando un iaito, un arma pensada especialmente pa esta práutica, de tamañu, proporciones y pesu lo más asemeyaos posible a la katana, pero fecha con aleaciones de metal más barates que l'aceru y normalmente ensin afilar. Los principiantes avecen entamar usando un bokken (espada de madera), por motivos tanto de seguridá como económicos. Los grandes maestros, y los qu'algamen graos altos, usen davezu katanes auténtiques (shinken).

La principal forma d'entrenar Iaido ye per aciu de la realización individual de kates. Nestos kates fáense movimientos preestablecíos que representen reaiciones énte adversarios imaxinarios. El prauticante tien que ser a imaxinase esos escenarios que se planteguen nos kates y reaicionar acordies. Arriendes del trabayu individual pueden tamién esistir, dependiendo de la escuela, kates pa realizar en pareya, asina como otros tipos de práutica con compañeros.

Los kates d'Iaido consten de cuatro fases que tomen formes distintes según la situación:

Nukitsuke: Desenvaináu rápidu; sacar la espada de la so vaina (saya) echando ésta p'atrás (saya biki). Esta parte ye tan importante que se diz que ye la vida del Iaido.
Kiritsuke: Cortada al oponente.
Chiburi: Escurrimientu del sangre (imaxinario) que queda na fueya.
Noto: Volver la espada a la vaina.

La téunica céntrase en dar fluyidez a estes cuatro fases. Tiénense tamién mui bien en cuenta aspeutos como la precisión, l'equilibriu, l'amplitú de los movimientos o l'atención, ente munches otres coses. L’Iaido trata de preparar al prauticante pa que pueda realizar estes aiciones en cualquier momentu y situación: de pie, sentáu, caminando, en diferentes direiciones, contra dellos adversarios, tando yá preparáu pal combate, siendo sorprendíu, etc.

Escueles antigües (koryu)

En xeneral considérense escueles antigües o koryu a les tradiciones marciales xaponeses fundaes enantes de 1876, cuando se dictó la prohibición de llevar espaes en público.

Cada escuela enseña téuniques, estratexes y conceutos estremaos, y tienen formes d'enseñanza y entrenamientu distintes. Unes escueles enseñaben a remanar tou tipu d'armes, mientres qu'otres especializábense en dalguna concreta. Otramiente esistíen escueles nes que les téuniques de desenvaináu nun yeren más qu'una parte de la enseñanza, mientres qu'otres especializábense nello esclusivamente.

Dalgunes de les escueles qu'inclúin téuniques de desenvaináu nes sos enseñances son les siguientes:

Tenshin Shōden Katori Shintō-ryu
Musō Jikiden Eishin-ryū
Hoki-ryū
Suiō-ryū Iai Kenpo
Mugai-ryū
Sekiguchi-ryū
Toyama-ryū
Musō Shinden-ryū

Seitei Iaido

El Seitei Iaido ye un estilu modernu d'Iaido unificáu consistente nun conxuntu de kates establecíu pa la práutica del “iai”. Instituyólu en 1968 la Federación Xaponesa de Kendo con una demostración pública nel Taikai de Kioto. Esti organismu gobierna tamién el Kendo, el Jodo y la Naginata. Nel mundu enteru dirixe estes disciplines la Federación Internacional de Kendo.

Esta disciplina pueden prauticala tanto homes como muyeres, ensin torgues por edá, primeramente a traviés del exerciciu de les doce kates de Seitei Iai. Col tiempu, algamáu’l dominiu d'estos kates dempués d'un periodu variable de práutica, normalmente del orde d'un par d'años, ye posible afondar nel estudiu de los diversos estilos de les escueles tradicionales (koryu), de les qu'una de les más conocíes ye la Musō Shinden-ryū.

Tresnu del iaito enantes de la práutica

Compuestu orixinalmente por siete kates, en 1980 añadiéronse otros tres, y nel 2000 dos kates más. Los estilos antiguos Musō Jikiden Eishin-ryū, Musō Shinden-ryū y Hoki-ryū fueron los que más influyeron na unificación Seitei Iaido.

Kates de Seitei Iaido

N’orde son los siguientes:

Mae 前: alantre.
Ushiro 後: atrás.
Uke-nagashi 受け流し: parar y dexar pasar.
Tsuka-ate 柄当て: golpiar col mangu.
Kesa-giri 袈裟切り: cortar el kesa (túnica budista).
Morote-zuki 諸手突き: estocada a dos manes.
Sanpō-giri 三方切り: cortar en tres direiciones.
Ganmen-ate 顔面当て: golpiar la cara.
Soete-zuki 添え手突き: estocada cola mano afitada.
Shihō-giri 四方切り: cortar en cuatro direiciones.
Sō-giri 惣切り: cortada continua.
Nuki-uchi 抜打ち: desenvainar golpiando.

Los primeros tres kates execútense dende la posición sentada seiza (正座). El cuarto realízase dende tatehiza (立膝), una posición sedente usada cuando se lleva armadura (yoroi-kacchu 鎧甲冑). El restu faise en pie.

Torneos de Seitei Iaido

Nos torneos de Seitei Iaido enfréntense dos competidores qu'executen 5 kates, dos d'escoyeta personal del koryu que prautiquen, y 3 de Seitei Iaido escoyíos pola mesa, pa facer al empar. Un xuez principal y dos auxiliares dan el so veredictu llevantando la correspondiente bandera (encarnada o blanca) del competidor qu'entienden qu'executó meyor los kates. La duración de la prueba ye d'un mínimu de 5 y un máximu de 6 minutos; fuera d'esi tiempu produzse la descalificación automática.

Toho Iaido

Otra organización, la Federación Xaponesa d'Iaido (ZNIR, Zen Nihon Iaido Renmei), tien un conxuntu estándar de cinco kates denomáu Toho Iaido. Equival n’esencia al Seitei Iaido de la Federación de Kendo. Los siguientes cinco kates correspuenden a estos cinco estilos diferentes:

Maegiri - Musō Jikiden Eishin Ryu
Zengogiri - Mugai Ryu
Kiriage - Shindō Munen Ryu
Shihôgiri - Suio Ryu
Kissakigaeshi - Hoki Ryu

Referencies

↑ Revista Kendo Nippon: Páxines 83,84, xunetu 2004, "Iaido Dojo"
↑ Thoughts on Iaido. Nakamura, Taizaburo; Coautores: Guy H. Power & Takako Funaya "El nome correutu pal iaido ye "batto-do". Nel periodu Muromachi (1392-1572), usábase’l términu "batto-jutsu"; solamente dempués de mediaos del periodu Edo (1730s) empecipió a usase "iai-jutsu". La denomación correuta d'iaido ye un asuntu diferente a tratar; yo toi pola adopción del términu "iai batto-do", o cenciellamente "batto-do", como nome oficial"

Ver tamién

Bibliografía

"Art of Japanese Swordsmanship : A Manual of Eishin-Ryu Iaido". Editor: Weatherhill; 1ª edición (1994).
"Zen Nippon Kendo Renmei Iai", Manual en versión inglesa, 3ª edición, publicada n’ochobre de 2006 pola Federación Xaponesa de Kendo, Tokyo, Xapón.
"Japanese Swordsmanship : Technique and practice". Por Gordon Warner y Donn F. Draeger. Editor: Weatherhill; 1982.
“Flashing Steel, 2ª Edición: Mastering Eishin-Ryū-Swordsmanship”. Por Masayuki Shimabukurō y Leonard J. Pellman. Editor: Blue Snake Books; 2008
De Lange, William, Iaido: History, Teaching & Practice Of Japanese Swordsmanship, Weatherhill, 2002. ISBN 0834805006

Enllaces esternos

[1] Revista Kendo Nippon: Páxines 83,84, xunetu 2004, "Iaido Dojo"

[2] Thoughts on Iaido. Nakamura, Taizaburo; Coautores: Guy H. Power & Takako Funaya "El nome correutu pal iaido ye "batto-do". Nel periodu Muromachi (1392-1572), usábase’l términu "batto-jutsu"; solamente dempués de mediaos del periodu Edo (1730s) empecipió a usase "iai-jutsu". La denomación correuta d'iaido ye un asuntu diferente a tratar; yo toi pola adopción del términu "iai batto-do", o cenciellamente "batto-do", como nome oficial"

[1]

[2]