Llaviana

Llaviana
	Escudu de Llaviana
Alministración
País	España
Autonomía	Principáu d'Asturies
Provincia	Provincia d'Asturies
Partíu xudicial	Llaviana
Tipu d'entidá	conceyu
Capital	La Pola Llaviana
Alcalde de Llaviana	Julio García Rodríguez
Nome oficial	Laviana (es)
Xeografía
Coordenaes	43°13′56″N 5°32′52″W / 43.2321°N 5.5477°O
Superficie	130,99 km²
Llenda con	Samartín del Rei Aurelio, Bimenes, Nava, Piloña, Sobrescobiu, Ayer y Mieres
Demografía
Población	12 355 hab. (2023)
Densidá	94,32 hab/km²
Xentiliciu
Más información
Estaya horaria	UTC+01:00
	ayto-laviana.org

Llaviana ye un conceyu d'Asturies. Llenda al norte con Bimenes y Nava, al sur con Ayer, al este con Piloña y Sobrescobiu y al oeste con Samartín del Rei Aurelio y Mieres. Cuenta con una población de 13 582 persones (INE, 2015).

Historia

Prehistoria y edá Antigua

Los primeros testimonios de presencia humana nel conceyu de Llaviana remonten al Paleolíticu, colos xacimientos rupestres de El Torrexón y El Cañal (dambos n'El Condao) y el de Peña Corián, ésti últimu con grabaos y canaletes nes parés. Tamién hai constancia de dos túmulos funerarios nos montes de Peña Mayor, en La Vaúga y Cayacente, probablemente del Neolíticu.

Nel territoriu del conceyu atopose dalguna ferramienta, ente la que destaca l'hachu planu de cobre de Villoria, de tipu cabrales (edá del bronce antiguu) y otros dos hachos de Tiraña y El Condao, asemeyaos a d'otros atopaos en Llangréu (edá del bronce final).

Na dómina prerromana, Llaviana formó seguramente parte del territoriu controláu polos ástures orientales. La toponimia indica la presencia posible de poblaos fortificaos (castros) en El Castrillón (La Pola), El Cercu (La Pumará), La Corona (Fresneo na parroquia de Tolivia), La Corona (Boroñes) o El Corón (L'Aldea). A falta d'escavaciones arqueolóxiques supónse qu'estos castros son de la edá del fierro y que siguieron ocupaos na época prerromana. Sicasí, delles hipótesis indiquen la posibilidá de que dalgunos tuvieren una ocupación y hasta una fundación posterior a la dominación romana.

Poco se sabe de la presencia romana nel conceyu de Llaviana, nome que s'esplica a partir d'una hipotética explotación agrícola (villa) romana pertenenciente a Flauius: villa flauiana. Los romanos tamién explotaron mines, de les que queden dalgunos restos nos montes de Peña Mayor. Nesta época cruciaben el conceyu dos calzaes, una viniendo de Tarna, que siguía'l valle del Nalón y otra dende Ayer hasta Villaviciosa, pasando pelos valles de Villoria y Tiraña.

Edá Media y Moderna

Llaviana tuvo na dómina medieval una personalidá bien marcada. Los documentos medievales refiérense a ella indiferentemente como territoriu (“in territorio flavianensi”), valle (“valle quos vocitant Flabiana”) o conceyu (“en el conceio de Llaviana”). Asistimos nesti periodu a un procesu de feudalización alredor de les posesiones del conventu de San Vicente d'Uviéu: los conventos benedictinos de San Esteban (El Condao) y San Xuan de Villaverde (Ciargüelo), de los que nun se conserva nengún restu.

La construcción d'una malatería nel llugar de Comillera, na llende con Sobrescobiu, indica la posible presencia d'una ruta de pelegrinación a San Salvador d'Uviéu y Santiago procedente de Tarna, aprovechando l'antigua calzada romana.

La fundación de La Pola de Llaviana tuvo llugar probablemente a finales del sieglu XIII, anque nun se sabe con certeza yá que nun se conserva'l fueru. En cualquier casu, sábese con certeza que La Pola ye villa en 1400 y capital de conceyu en 1504, añu en qu'unvia representantes a la Xunta Xeneral del Principáu d'Asturies.

En 1776 los vecinos soliciten al rei la concesión d'un mercáu selmanal en Llorío. El rei concedio-yos el mercáu los xueves, pero en La Pola. Pocos años mas tarde, en 1786, les xuntes de vecinos (conceyos abiertos) dexaron de celebrase na capiella de la Madalena (El Puente) y pasaron a un edificiu que tovía se conserva n'actual plaza Maximiliano Arboleya de La Pola.

Sieglu XIX endelantre

Pela guerra de la independencia, les tropes franceses del xeneral Bonet, entraron en Llaviana pel puertu de San Isidro y Tarna. La mayoría de los vecinos abellugáronse nes altures. Sicasí, pequeñes partíes de guerrilleros atacaron a los franceses dende El Barrillón, El Condao, Soto Llorío y Puente d'Arcu, y hasta los ficieron dar marcha atrás nuna ocasión. Tamién destaca l'aición d'un mozu de Tiraña qu'atacó un corréu francés, faciendo prisioneru al xefe. Como premiu, la Xunta Xeneral nomólu cabezaleru d'una partida de 40 homes pa continuar la llucha.

En 1826, el conceyu algama l'actual configuración cola incorporación de los cotos señoriales de Villoria y Tiraña, pertenecientes a les cases de Quirós y de Nava. Del pasáu señorial d'estos dos cotos queden topónimos como El Palaciu (Tiraña) o La Forca y La Picota (Villoria), y varies lleendes qu'evoquen los abusos de los señores pa colos vecinos.

Les Guerres carlistes tamién afectaron al conceyu, que foi abellugu a varies partíes guerrilleres na primer guerra. Na segunda guerra, destaca Melchor Valdés, de La Pontona, que s'echó al monte en 1872 y llegó a tar al mandu del equivalente d'un batallón. Nuna quema provocada pola partida carlista d'Angel Rosas en 1875 perdiéronse tolos fondos documentales del Ayuntamientu.

Los últimos años del sieglu XIX marquen l'entamu de la minería en Llaviana. Anque hubo esplotaciones menores de cobre en Villoria y El Condao, l'actividá minera centrose nel carbón. La primera mina en abrir fue el Coto Musel, en 1880. Tres d'ésta, vinieron les esplotaciones de Villoria, Tolivia, Les Portielles, Carrio y Barredos, toes elles de capital foriatu.

Cola minería, el movimientu obreru fue cobrando importancia. Bien ceo, en 1904 naz la agrupación socialista de Llaviana.

En 1905 inauguróse l'Ayuntamientu actual, construyíu nel sitiu onde s'asitiaba la capiella de San Miguel.

La participación de los mineros de Llaviana foi especialmente importante na fuelga de 1917 y sobremanera na revolución d'ochobre del 34. El 4 d'ochobre de 1934, el cuartel de la Guardia Civil de Barredos foi'l primeru en cayer en toa Asturies. Dempués, los revolucionarios tomaron el de La Pola, lo que provocó un muertu, y axuntáronse a les columnes que combatíen n'Uviéu. El Comité Revolucionariu de Llaviana, nos escasos quince díes que tuvo d'actividá, foi un de los meyor organizaos y menos violentos d'Asturies: ocupose de la sanidá, el tresporte y los abastos y hasta llegó a iguar una pista d'aterrizaxe en La Chalana.

Tres del fracasu de la Revolución, la represión foi enforma violenta: munchos vecinos, como'l mesmu alcalde Julio Castaños, sufrieron tortures nel Conventu de les Adoratrices d'Uviéu o na Casa del Pueblu de La Pola, acondicionada como Centru de Reclusión. Pa escapar a esta represión, dellos revolucionarios suicidáronse, exiliáronse o echáronse al monte.

Na Guerra Civil Española, Llaviana permaneció fiel a la República. Al principiu de la guerra hai que señalar la quema d'alguna ilesia como la de El Condao y la desapaición y probable asesinatu de dellos sospechosos de simpatía colos facciosos, como l'ex-alcalde Arturo León.

Llaviana foi un de los últimos reductos del Frente Norte n'España, hasta la ocupación pol xeneral Muñoz Grandes en 1937. La represión franquista tuvo episodios como l'ametrallamientu de trece vecinos nel cementeriu de Tiraña n'abril de 1938.

Anque nun hubo nengún episodiu bélicu nel conceyu, la guerra provocó 299 víctimes hasta 1940, según les cifres de Francisco Trinidad na so Crónica de Laviana. El detalle de les cifres de les víctimes ye'l que vien darréu:

Files republicanes: 170
Files nacionales: 31
Represión republicana:16
Represión nacional: 66
Afusilaos: 3
Desapaecíos: 9
Otros: 4

Tres de la guerra, nos montes de Llaviana, los fugaos caltuvieron una importante actividá guerrillera hasta bien entraos los años cincuenta. Ente les principales partíes de guerrilleros destaquen la de los hermanos Manuel y Aurelio Díaz García, los Caxigales, de El Condao y la de Lisardo García, Lisardo, de Soto Llorío. Los Caxigales llevaron a cabu la primera aición guerrillera, la muerte d'un falanxista en 1938. Tamién efectuaron atracos, sabotaxes como'l de la mina Coto Musel, un asaltu al cine Maxi y hasta un intentu de secuestrar n'Uviéu al toreru Manolete. Morrieron nun tirotéu cola Guardia Civil el 7 de febreru de 1950. Lisardo foi responsable de varios atracos y de la muerte de siete persones. Morrió nun enfrentamientu cola Guardia Civil el 22 de mayu de 1950 en Llorío.

La represión franquista llevó a episodios especialmente tráxicos como'l del Pozu Funeres, una torca nel monte de Peña Mayor. El 24 d'abril de 1948 tiraron vivos, dempués de sometelos a tortures a ente ocho y ventidós persones, según les fontes, acusaes de collaborar col maquis. Varies de les víctimes agonizaron dellos díes, enantes de que se tratare de borrar el rastru del crime tirando cartuchos de dinamita y prendiendo-y fueu al pozu.

La política económica franquista basada na autarquía tuvo por efeutu una sensible reactivación de l'actividá minera. Llaviana conoció un gran crecimientu demográficu, debíu en gran parte a inmigrantes d'otres zones d'España, lo que llevó a la construcción de barriaes como la de Barredos y Fontoria Nueva. Nesti periodu los mineros llavianeses tuvieron una participación importante nes fuelgues en 1957, 1962 y 1963.

A partir de los años sesenta, Llaviana conviértese nun de los principales llugares d'ociu del Nalón, con zones de baños como El Cañal y La Chalana o coles cafeteríes de La Pola atraíen a xente de tol valle. La empresa de tresportes llavianesa El Carbonero, fundada en 1927 por Manuel Menéndez (anguaño cooperativa Alcotán), beneficiose d'esti fenómenu y llegó a tener 142 emplegaos.

Na década de los setenta la crisis de la minería, llevó a la creación de HUNOSA que agrupó la mayor parte de les esplotaciones mineres. Anguaño l'únicu pozu que queda n'activida en Llaviana ye Carrio.

Al envís de diversificar la economía del conceyu, creóse recientemente un polígonu industrial nos terrenos ocupaos anteriormente por una escombrera en El Sutu.

Xeografía

El conceyu tien una superficie de 130,99 km².

Ta a una distancia de la capital, Uviéu, de 33 quilómetros. Les sos principales víes de comunicación son: AS-17, que treviesa'l conceyu d'oeste a este, l'AS-251, qu'enllaza con Samartín del Rei Aurelio y l'AS-252, que xune La Pola Llaviana con Ayer.

No que cinca al aprovechamientu, esta superficie compónse principalmente de masa forestal (46,48%), pastos (38,75%) y terrenu improductivu (10,36%). El restu repártese en superficie non agrícola (3,37%), tierres de cultivu (0,58%) y agua (0,46%).

El paisaxe de Llaviana ta constituyíu básicamente d'una vega estrencha a la oriella del ríu Nalón, arrodiada de montes. Nesta vega alcontramos les poblaciones más importantes (La Pola, Barredos, El Condao) y les principales víes de comunicación (la carretera AS-17 Avilés – Puertu de Tarna y el ferrocarril La Pola – Xixón).

El ríu Nalón, que crucia'l conceyu d'este a oeste, tien varios afluentes: na marxe derecha'l ríu la Xerra (o riascu El Condao), el ríu la Caya (o ríu de la Robellá) y el ríu Tiraña; na marxe izquierda el ríu Soto, El Raigusu (o ríu Ribota) y el ríu Villoria.

La metá occidental del territoriu de Llaviana forma parte de la Cuenca hullera del Nalón. El relieve compónse principalmente de los valles y cordales formaos pola erosión fluvial sobre materiales carboníferos. Na parte oriental, alcontramos un sustratu calizu, que correspuende a les zones de mayor altitú.

Los principales montes de Llaviana son la Peña Mea (1.560 m), la Triguera (1.291 m), la Xamoca (1.288 m) y el picu Tres Conceyos (1.097 m).

Parroquies

Parque de La Pola Llaviana.

El conceyu de Llaviana ta formáu por 8 parroquies:

Nᵘ	Nome	Superficie (km²)	% superficie Llaviana	Población	% población Llaviana	Densidá (hab./km²)
1	Carrio		n/d	133	1,081,08%	Error d'espresión: Operador round inesperáu
2	El Condao	17,68	13,513,5%	543	4,394,39%	30,71
3	Entrialgo		n/d	217, 217	1758,131758,13%	Error d'espresión: Caráuter de puntuación "," non reconocíu.
4	Llorío		n/d	646	5,235,23%	Error d'espresión: Operador round inesperáu
5	La Pola Llaviana		n/d	8740	70,7470,74%	Error d'espresión: Operador round inesperáu
6	Tiraña		n/d	1607	13,0113,01%	Error d'espresión: Operador round inesperáu
7	Tolivia		n/d	179	1,451,45%	Error d'espresión: Operador round inesperáu
8	Villoria		n/d	1079, 912	8740,698740,69%	Error d'espresión: Caráuter de puntuación "," non reconocíu.

Demografía

Gráfica de población de Llaviana (Asturies)

Fonte: Institutu Nacional d'Estadística d'España - Ellaboración gráfica por Wikipedia

La población de Llaviana foi medrando a lo llargo'l sieglu XX, y pasó de los 8.313 habitantes de 1900 a los 15.363 de 1981, que representen el máximu históricu. A partir d'esti añu la población empezó a menguar.

Nos últimos años asistimos a un procesu d'ensame de la población en La Pola, en detrimentu de les zones rurales. Asina, ente l'añu 2000 y 2003 toles parroquies, quitando la de La Pola, que pasó de 8.500 habitantes a 8.574, perdieron población.

En 2002 el movimientu de población (99 nacencies y 183 defunciones) rexistra un saldu vexetativu negativu. Tamién ye negativu'l saldu de los movimientos migratorios internos (228 emigrantes por 170 inmigrantes). Un saldu migratoriu esternu malapenes positivu (68 inmigrantes por 60 emigrantes) nun ye a compensar les cifres anteriores.

En 2015 Llaviana contaba 13.582 vecinos (con una densidá de población de 104 hab./km²), d'ellos 234 inmigrantes, que representaben el 1,72 % de la población. Esta última ta pembaxo de la media asturiana (3,96% de población inmigrante), que yá ye de por sí inferior a la media española. N'orde d'importancia, los principales países d'orixe de los inmigrantes son Polonia, Ecuador, Arxentina, Cuba, Portugal, Alemaña, Marruecos, República Checa y República Dominicana.

Economía

Llaviana foi un conceyu agrícola y ganaderu hasta les últimes décades del sieglu XIX. A partir d'esi momentu, el pesu de l'agricultura baxó en beneficiu de la ganadería y sobre too de la minería.

Na década de los 70 empieza a cobrar importancia'l sector servicios, sobremanera en La Pola.

Col declive de les mines, a partir de los años 80 y 90 aumenta de manera importante'l númberu de xubilaos y prexubilaos. El fenómenu de les prexubilaciones y de les subvenciones explica'l reciente reaprovechamientu de los praos y montes pa usos ganaderos.

Nel mes de payares de 2004 había en Llaviana 737 paraos (247 homes y 490 muyeres).

Ente la población con emplegu, según les estadístiques de 20096 (SADEI), el 4,21% trabayaba na agricultura, el 12,59% na industria, el 12,06% na construcción y el 71,14% nel sector servicios.

**Emplegaos nos diversos sectores económicos (añu 2009)**
	Númberu de trabayadores	Tantu por cientu
TOTAL	2.280	100
Agricultura, ganadería y pesca	96	4,21
Industria	287	12,59
Construcción	275	12,06
Servicios	1.622	71,14
* Datos tomaos del Anuariu Estadísticu d'Asturies 2009, SADEI

**Usos del suelu del conceyu (añu 2009)**
Usu	Superficie (km²)
Tierres de llabrantíu	0,35
Praderíes	56,16
Terrenu forestal	52,33
Otros usos (industrial, residencial, tierra ermo...)	22,15
* Datos tomaos del Anuariu Estadísticu d'Asturies 2009, SADEI

**Carauterístiques del sector primariu (añu 2009)**
Ganaderíes de bovín	555
Cabeces de ganáu bovín	4.184
Cabeces de ganáu ovín	3.081
Cabeces de ganáu cabrín	1.153
Ganaderos con cuota llechera	0
Quilos de cuota llechera	0
Metros cúbicos de madera valtao	341
* Datos tomaos del Anuariu Estadísticu d'Asturies 2009, SADEI

Política

Nel conceyu de Llaviana, de magar 1979, l'únicu partíu que gobernó foi'l PSOE l'actual alcalde, escoyíu el 30 de setiembre de 2008 tres la dimisión del anterior edil, ye Adrián Barbón Rodríguez, del PSOE.

Eleiciones municipales
Partíu	1979	1983	1987^[1]	1991^[1]	1995^[1]	1999^[1]	2003^[1]	2007^[1]	2011^[2]
PSOE	8	10	7	7	7	8	8	8	8
AP / PP		3	1	2	4	4	4	5	3
PCE / IX / IX-BA / IU-Los Verdes	5	4	5	6	6	3	4	3	3
FAC									3
PAS / URAS-PAS					0	1	0	1	0
URAS / URAS-PAS						1	1	1	0
UCD / CDS	4		1	1
GIL			3	1
Total	17	17	17	17	17	17	17	17	17

Arte

El conceyu de Llaviana, tien munchos monumentos y obres arquiteutóniques ente les que destacaremos:

La ilesia de San Nicolás, na parroquia de Villoria, ye l'únicu exemplu de l'arquiteutura románica, ye Monumentu Histórico Artísticu. Ye del sieglu XII, de la so estructura orixinal namái queda la so portada románica, el restu ye una reconstrucción del sieglu XVII. La so estructura ye de trés naves dividíes por arcos sobre columnes con transeptu y cabecera cuadrada con sacristía y capiella, la nave central tien bóveda d'arista. La so portada románica ta formada por triple archivolta, les archivoltes interiores son d'arcu rebaxáu, les archivoltes esteriores tienen un diseñu semeyante con motivos de retraite, calteníes por columnes de delgáu fuste con capiteles con elementos vexetales. La portada ta flanquiada por otres dos de tipu ferrerianu con morenes acanalaos que sostienen un frontón triangular rematáu en boles. Nel so interior destácase un retablu barrocu del sieglu XVIII.

La ilesia de Nuesa Siñora d'Oteru, ye de planta de cruz llatina. La so fachada ye cenciella con un arcu de mediu puntu. El llateral esquierdu de la ilesia presenta una ventana formada por trés arquielles de ferradura sobre columnes de finu fuste y capitel vexetal, nel interior destaca un retablu del sieglu XVIII.

El Torruxón, declaráu Monumentu Histórico Artísticu. Anque se creyía romanu la so estructura ye de la baxa Edá Media. La so planta ye rectangular pero muy deteriorada poles añadidures de formigón pa evitar el so derrabe. Ye de trés pisos con escases saeteres, el primer pisu yera utilizáu como calabozu, al segundu s'accede por un arcu de mediu puntu y al terceru ta práuticamente zarráu a la lluz. El remate de la torre orixinal yera almenau y anguaño ta llimitáu por una muria de formigón.

La Casona de la familia Menéndez ye Monumentu Histórico Artísticu. Ye un conxuntu de vivienda y capiella adosada, formando too ello una estructura rectangular. Ta realizáu en mampostería y los sos vaños alternen balcones con ventanes. La capiella tien una altura mayor, el so accesu ye al través d'una arcada de mediu puntu sobre'l que s'asitia l'escudu familiar.

La casa natal d'Armando Palacio Valdés, na parroquia d'Entrialgo, ye una casona rural del sieglu XVIII, de planta rectangular y fachada simétrica. Ta compuesta de trés cuerpos, dos llaterales y el central más adelantráu. La exa principal fórmala la puerta allintelada con dos pequeñes ventanes, nel pisu cimeru tien un balcón y dos ventanes. Los cuerpos llaterales cola mesma distribución, dos ventanes nel pisu baxu y un corredor de maera nel superior.

La Casa del Pueblu, allugada na plaza del Ayuntamientu, de grandes dimensiones y con galería de maera na fachada trasera. La fachada principal ta formada por dos cuerpos ente los qu'había un corredor de maera, güei esiste una terraza.

Otros exemplos a destacar son les sos barriaes surdíes pol ensanche de La Pola, destacando la barriada de Fontoria, la de Blanca Ñeves, la de Barreos, etc.

Fiestes

Ente les sos munches fiestes destacaremos les siguientes:

En mayu, son les fiestes de Santa Rita en Boroñes, qu'inauguren la temporada festiva del conceyu.

En xunu, son les fiestes de San Antonio en Villoria.

N'agostu (esautamente'l día 15), celébrase la fiesta mayor del conceyu, que ye la que s'organiza nel Santuariu de la Virxe d'Oteru, patrona de Santa María de Llaviana. (La llenda diz que la Virxe María s'apaeció a un pastor y se decidió construyir ehí una ilesia, pero los señores de la zona quixeron construyila n'otros terrenos y que los materiales apaecieron treslladaos milagrosamente al llugar onde güei s'asitia la ilesia).

El fin de selmana siguiente, organízase'l Descensu Folclórico del Nalón, que foi declarado Fiesta d'Interés Turísticu y gocia de grande sonadía.

Tamién tenemos les fiestes de San Xusto en Soto de Llorío, ente otres.

En setiembre, tenemos el Cristu nel Condao.

N'ochobre, celébrase la Pontona, tamién nel centru de la villa. Ye la segunda mayor fiesta del conceyu. Concasa con dos certámenes, ún de ganáu y otru de quesu asturiano. Esta pieslla la temporada festiva añal.

Hay otos santuarios nel conceyu coles sos romeríes, como son: la de la Visitación na ermida de Les Campes, La de Cortina, o la de Ribota.

Deportes

Laviana cuenta con un equipu de fútbol históricu, el Real Titánico. Fundáu en 1912, históricamente militó na Tercer División asturiana. Sicasí nos caberos años tevo dellos problemes y anguaño milita en Primera Rexonal. Dellos xugadores conocíos a nivel rexonal foron Toño Velázquez, Simón, Senén o Berto. Yosu Uribe, actual entrenador de la Ponferradina entrenó al club llavianetu na temporada 91/92.

L'otru club de Llaviana ye l'Alcava, básicamente dedicáu al fútbol base y ensin equipu de categoría superior. El so equipu xuvenil ascendió la temporada 2008-2009 a la Lliga Nacional Xuvenil. El so futbolista más reconocíu ye Roberto Canella, xugador del Sporting de Xixón.

N'otros deportes, Llaviana cuenta con una escuela d'atletismu con dellos deportistes de categoría nacional, como Magnolia Iglesias, Amás esisten equipos de deporte base de baloncestu, balonmano y natación. Nos caberos años el duatlón adquirió cierta sonadía de mano del club llocal Desnivel.

Quiciás el deportista más destacáu seya'l karateka Valentín Marcos Nieto, miembru del equipu nacional español, múltiples veces Campeón d'España, asina como Campeón Européu y Mundial en categoríes inferiores.

Llavianetos illustres

La llista de llavianetos destacaos que vien darréu ta compuesta esclusivamente por homes, lo que nun ye d'estrañar nuna sociedá patriarcal que dexaba a les muyeres arrequexaes nel ámbitu domésticu.

En cualquier casu, hubo bien de muyeres de valir en Llaviana, anque munches nun trescendieren de les llendes del conceyu. La semblanza d'algunes d'elles apaez nel llibru d'Aida Fuentes Concheso «Histories de muyeres» (Llaviana, 2004).