Bocaf zvak (suterot)

**Bocaf zvak**
	XANTO
	XANTO
Vergumvelt	The Final Problem
Sutesik	Arthur Conan Doyle
Ava	Englava
Suterotinda	Berpotam
Evla	1893
betara	teza

Bocaf zvak

Bocaf zvak ( englavon The Final Problem ) tir berpotam ke Arthur Conan Doyle taneon sanegayan bak 1893 koe Standard Magazine virda az direilanon koe Namio ke Sherlock Holmes berpotamak.

Vildeks

Bak lan sielcek ke balemeaksat ke 1891, Holmes radimi kogrupara koe Franca den Watson selaropik savsaf nik artlanir. Watson numegaler. Holmes va toldoalie kevuyuse gu Moriarty tavesik tis nomyelik ke rotuca toz kareizur. Va grustaks gaden gan Moriarty djukudeokar. Arti levlikerapa, i Holmes va ikse sopetese va bewikeem ke grustaks al lajudolantir, voxen batcoba arti oxam barka dilizeter.

Lanrielon Moriarty int lakir aze va Holmes dene lipok ke Baker vawila wir. Sin belcon prilad isen Moriarty walzer da Holmes va intafa joya vol di funer. Bantan vewar voxaze konakviele bak vielcek zo ruzader. Bam drager da Watson fu dositar, divvawatason va tavesik. Selaropik naler azen sin arti koyarapa koe Meiringen wida ke Swiza tigid. Holmes do ware Watson, poke mayesisa Reichenbach stoya gozad. Voxen Watson ko wida zo rozar kiren jotafa englikya akoleper ise va selaropik gabuon djuwir. Batdume in ko wida dimlanir lize kosmar da su zo ortar kiren mek tigis englik banlize re akoler.

Watson van stoya sorion dimlanir. Va stragama ke Holmes trasir. Va metcokeyena nakila rietar : Holmes is Moriarty drumtice stoya kevlanid ; tavesik nover da kogrupasik va lipimi pu selaropik nik rosuter ; azen toloy kevelik sinton lyumad numaze tit vlarde kevlicason lubed.

Arak ke blay ke Moriarty tavesik tuke bazexa iskeyena gan Sherlock Holmes zo soper, numen bata sopura va radimiawalkerafa xultura ke kogrupasik ziliyar.

Koe Vlardafa mona berpotam, laninde « dimblisison » va Holmes, Conan Doyle va dazatum stekeon roataleter. Tere lanaca tir da Moriarty tit stoya al lubeyer. Kogrupasik va intafa xonukera al jidjayar enide va zugaf garveldasik ke tavesik di divvawayar, i va Sebastian Moran vombik.