Ayikya dem vrodak (trutca ke Vermeer)

Ayikya dem vrodak ~ Het melkmeisje (NL)

Ayikya dem vrodak ( nederlandavon Het melkmeisje ) tir trutca lumkirafa gu 45.45 × 40.6 cm-, i puntalingeks keve stama skuyun gan Johannes Vermeer nederlandaf lingesik moni 1658-1661.

Bata trutca koe Rijksmuseum tcilaxe koe Amsterdam ( Nederlanda ) re ( 2018 ) tigir.

Izva ke grot

Viele Johannes Vermeer moni 1660 va Ayikya dem vrodak trutca linger, ware tir jotaf lingesik. Benele ke inaf grabomeem stekeon zo askitir. Soe in me tir bodorkik larde moni 1653 kan konak alkaf lingeks toz klepuyur ise va konaka nakilafa trutca al skur. Nakilaf lingeks koe Nederlanda banugale tozuwer isen dolebela va yamba awir. Glastikeem is kulaf tawadayikeem tid warzaf anelikeem zoen gan watsa amidafa gu telyona ke oluikeem ok alkokilikeem. Voxen vundopafa is alkafa lingeropa ware jontikedje titir ontinuk ke cultimaf ardil numen radimi awalkera Vermeer di zo vulkupur.

Tokdume grot ?

Dene Rijksmuseum tcila ke Amsterdam, nederlandaf Het melkmeisje vergumvelt valeve trutca zo bazecker. Voxen bat vergumvelt tir metageltaf kiren melkmeisje trogarn tir vas bildesik va vrod ke diel ko mona. Bak XVII^-eafa decemda, taneaf vergumvelt ke trutca tiyir Zanisikya kogimasa va vrod. To batcoba tickir, voxen azaf vergumvelt jontikeke zo grupeper nume me zo robetar.

Viele Vermeer va bata trutca linger, pune inafa blira tir erodackafa larde bak 1653 va Catharina Bolnes nazbeikya ke kulaf kazasik al kurer. Erbafa pomara adrafa gu jotafa tolonga tir bas gadikya ke Catharina. Numen zanisik koe oga gitigid numen lingesik kan disukera pilkafa gu yambanyik va sin rodizver. Koe swava ke lingesik, entafa disukexa ke zanisikya dagimasa va vrod vanpir belcera va tazuk is uka is afi, i belcera momimatasa kev azentafa welma ke trutca. Diola ke grot vas tcedera va artazukara va rieta gu skuks daner. Lingesik va tamava kan swava fiste grutuezlar aze va ewava kan lingera grutukramar. Vermeer tir lingesik artazukas va vieleuca gu kotabuca kan intafa grupesa divoksera va ayafa pelava gu opelafa nakila.

Kiewatca ke Ayikya dem vrodak dene yambaribik me dun tir, dace viele Vermeer tiyir vulkuyun, kiren trutca va tamee artfir. Nope watsa is intafa listuca tir rogildana gan lotan. Meka abdilafa araya tir adrafa gu gildara va watsa ok mafelara va skura. Kot ayik, ke bet kruldes seltay, va coba tisa ba taneafa itara tire rovannarir. Ezlafa disukera ke yambik va vieleafa geltruca vaon artazukar ise va tamefa voda dear.

Bak XX^-eafa decemda, aptacik ke dolebelopa va kota sumpasuca ke bata vrodgimasikya al remwid. Nazbeay ke walvedeyafa ja ta yunkera va koverteyena kazatcala yoltkirafa gu La Laitière va ewava al malsaver. Numen kawarzeks va trutca ke Vermeer moe weloraxa ke jontik vrodaf warzeks re tigir. Bata sanegapafa malsavera va walvedeyafa kiewatca ke grot ape al weber.

Drunara va Ayikya dem vrodak ke Vermeer

Koexofa nakila ke Vermeer koe olkoba dem klorsid cugviele tigid, i koe olkoba kulon zikeyena gu marwida is trutca. Kaatoen korik tid ke kulaf glastikeem ok oluikeem ke bane sare. Mecoba mana batlize kiren ayikya dem vrodak koe burmotaxo ok blotxo kobar. Batdume pufapaf kadimef azent gutageltayan gan lingesik. Tulon, rebava kadime ayikya tir dem cepta ta levrumkara va muka is fe ke soltiolteyena cepta awisise va kerafa norka leve kalka.

Milon, plencek rowin koe titef ronef gentim tir kum isola ke Delft, i ke vowidava ke Vermeer lize va kotafa blira tiskiyir. Idulak do intaf tawoldaf bor dem reliez moe sid tigir. Tcaza kev rebava ke afi remu dilk pintoton zo skuyur, ton gentim ke olkoba wan tis izgaf. Koe bat gentim kita kum tronkayana ksewa is azilbafa ok lutafa sarma zo rumkayad.

Azega tigisa kabdue zanisik va ageltafa yalestaca koplekuyuna gu oxifa nakila tadler. Tiaveteson va brutafa volvura ke refa kobavera, Vermeer va kota muka moe bata azega pintoton skelayar.

Voxen to uka va memperanya ke bata yalestaca dead : baroya faltafa uka mu abday is ploda is tayi aykayani moe azega, is varkukaf ok beretraf ligundeks mu beg, is ksewafa kita, is tawoldafa sarma. Batakaf moplekuksam va drigdara va afifa tcaza noved. Kevaxaks ke iduluka is fentuka is felilera va afitcaza remu dilk va bat abduazent gu benelaca ke bunera icde listuca lidam sugdaluca. Batinde, ukeem ke yalestaca va tel ke vola ke ayikya dulzar ; baninde, volana muka va pwadesa kerdelama icde refa tegira koplekud.

Koredik vas ayikya dem vrodak tir dem gadikyaf lum, i dem denaf sinkas lum. In tir delafa ayikya pokefa gu geltrafa tamava is fu epusa va vrod ik beg ik arcoba, i va voltaxa karolatana gan kottan. Ukeem is afi cugeke trumon zo skuyud. Gesiara va blafote is sizuntase falte koe konaka trutca ke Vermeer zo trasir, i koe tulon ar grot : Sardikya dem mard. Afi remu dilk kev gexata ke zanisik is inaf pand luber, nyapeson va disukesik van traspusin vrod. Wiyucapa va koredik lidam kotaf buneks divfir. Yikya va vieleaf lag istfir, i va intafa blirinda opelafa is aulafa.

Nakila ton volestobara zo atoer, trabe dizvesik va trutca tite ayikya sordon abiceke tigir. Bata tca ke buneks va laumasira va litera va tigira ke koredik nover. Ara kira ke buneks koe jontika trutca ke Vermeer zo trasid : istefa tirka ke koredik, is zikexa bene rebava ( batlize anton toloya muka ), is afi remu talteon dilk.

Dere rupec

► Trutceem ke Vermeer

Stragela

(fr) Daniel Arasse, L'Ambition de Vermeer, Paris, Adam Biro, 1993, 232 p. (ISBN 2-87660-321-7)
(nl) A. Bailey (2002) Gezicht op Delft. Een biografie van Johannes Vermeer
(en) Lawrence Gowing, Vermeer, University of California Press, 1997, 240 p. (ISBN 0-520-21276-2)
(en) Hans Koning is Editors of Time-Life Books. The World of Vermeer: 1632–1675
(fr) Walter Liedtke, Vermeer : Tout l'œuvre peint, Ludion, 2008, 208 p. (ISBN 978-90-5544-743-5)
(en) Walter Liedtke is Michael C. Plomp is Axel Rüger, Vermeer and the Delft School, New York: The Metropolitan Museum of Art, 2001.
(en) John Michael Montias, Vermeer and His Milieu : A Web of Social History, Princeton (New Jersey), Princeton University Press, 1989, 472 p. (ISBN 978-0691040516)
(fr) Norbert Schneider, Vermeer 1632-1675 : ou les sentiments dissimulés, Köln, Taschen, 2005, 232 p. (ISBN 3-8228-4656-2)
(en) Arthur Wheelock, Vermeer, Yale University Press, 1995 (ISBN 0-300-06558-2)

(en) Walter Liedtke, « Johannes Vermeer (1632–1675) and The Milkmaid », Heilbrunn Timeline of Art History. New York, The Metropolitan Museum of Art,‎ 2000, p. 238-253

Ayikya dem vrodak
Het melkmeisje (NL)

Yambik

Johannes Vermeer

Evla

moni 1658-1661

Ord

Nakilafa trutca

Lingerinda

Puntalingeks keve stama

Lum

45.45 × 40.6 cm-

Tigixo

Rijksmuseum tcilaxe, Amsterdam ( Nederlanda )

Trutceem ke Johannes Vermeer
Alkaf ok vundopaf lingeks		Diana is yona dositikya • Krist koe mona ke Marta is Maria • Praxedes Tumtikya
Delt		Ayikya dem keredji • Delt va yikya • Sardikya dem mard
Nakilaf lingeks		Ayikya dem datoy • Ayikya dem vrodak • Ayikya tarumiusa • Belisikya poke dilk • Dolpa • Faltakirikya belisa va twa • Fidesikya • Galema dem cente • Kingusikya • Kocopik • Liugenafa sardikya • Nonura va tavera va lexa • Ranyesikya poke tarumi • Renatwa • Sardikya dem val • Sayakikye is kipesa yikya • Sespasikya • Tarumiusikya • Tavera va lexa • Tawavopik • Twasutesa ayikya is zanisikya • Weltikya dem mardflek • Weltikya is zanisikya • Yikya sutesa va twa • Yikya is toloye ayikye • Yikya tasilusa • Zdunagesikya
Purdaf lingeks		Lingeropa • Purda va folixa
Patectoy		Nudama • Wiks va Delft

Tuveli icde Lingeropa