Fosanegl

Da Fosanegl oda Fasenickl is a boarische Fosnochtsfigua. Ea drogt a ästhetische Hoizmaskn und aufwendige, barocke Gwanda. Ea is a majestätische, prochtvolle Gschtoit, de wo a weng an an venezianischn Karnevai erinnad.

Fosanegl Figua am Hauptplozz vo Kipfabeag

"Nigl/Negl" (dt. Nickel) moant im Boarischn an Koboid (vgl. Bosnigl), "fosln" (faseln) hoaßt unvaständle bzw. sinnlos dahearedn.

Gwand

De Hoizmaskn vom Fasenickl muaß aus an Lindnhoizblock gloddlarvig aussagschniazt wean. Da Gsichtsausdruck is weda lustig no grauslich, eha a weng obghom. Obwoi ra an Kuglschnuaboart hot, san de Gsichtszig a weng feminin: hoche Stian, kloane Schtubsnosn, kloana Mund und millifoarbane Haut.

Auf da Maskn, om am Schädl, auf ana Haum huckt da "Schäbara". Des is a kunstvolla Fedanbusch mid Schejnbaam und buntn Bandln. Auf da Maskn is a Kopfduach festgmocht, des wia da Janka und de Hosn vaziat is.

De barockn Gwanda untascheidn se stoark vo andan Foschingsfiguan. Se san recht kunstvoi: Sei Gwand is aus Leinduach mid umara 6000 aufgnahdn roudn Fiizrautn und mid ana handknipftn Woiboatn eigrahmt. Janka und Hosn san mid an haufa Messinggleggal vaziat.

Weidas hot da Fosanegl imma a Goaßl (Peitschn) dabei.

Vahoidn

Da Fasenickl zoagt aa a bsundas Vahoidn. Ea schnoizt mid da Goaßl, so dass man scho vo weidn heat. De Gleckal auf sein Schädl laitn, wann a gäht. Ea fasld hinta da Maskn mid vaschtejda Schtimm, wos ma nit vastäht. Des mocht a vua oim bei scheenan Deandln. Ea vateit Brezn und Guadln. Dabei schreit a vo zeidweis "Gösucht", wo neamd woaß, wos des hoaßt.

Gschicht und Musäum

Dea Brauch losst se bis ins 18. Joarhundad zruggvafoign. De Wuazn genga meglichaweis bis in heidnische Zeidn zrugg.^[1]

Da Fosanegl kimmt uaspringle woi aus Franggn. As Zentrum vom Brauchdum is heit owa Kipfabeag in Obabayern. Do gibts sogoa a oagnas Fasenickl-Museum. Des is in Kipfabeag im Toaweatahaisl untabrocht. Da Kean vo dem Haus schtammt ausn Middloita (14. Joarhundad). Im Musäum wean vua oim historische Gwanda und Maskn vo de Fasenickl ausgschtejt.

Vaoschtoitunga

Fosanegl Umzug im Fosching
Preisschnoizn: Wettbeweab zun Goaßlschnoizn vo de Fosanegl
Fosaneglball: Foschingsball; Danz, oft oa Woch vuan Foschingssamsda)
Oschnoizn: Ofang Jenna wead da Fosching vo de Fosanegl ogschnoizt (Goaßlschnoizn)

De Fosanegl beteilign se aa de Foschingsumzig in da Region.

Im Netz

Fasenickl Video

Beleg

↑ Die Geschichte der Fosanegl... (auf www.fosanegl.de)

Dea Artike is ois berig in de Hall of Fame (Ruhmeshoin) aufgnumma worn.

Boarischa Brauch


Weihnochtskroas	Nigglodog • Heiligomd • Kristbaam • Rauhnocht • Wüde Jogd • Silvester • Neijoar ooblosn • Neijoar oosinga • Perchtn • Sternsinga • Goaßlschnoizn • Apaschnoizn
Foschingszeid	Fosanocht • Narrischa Pfinzda • Ruaßiga Freida • Schmoiziga Samsda • Oschamigga • Fosanegl • Liachtmess
Ostakroas	Ostan • Poimkatzal • Poimbuschn • Poimgart • Ostabrod • Oascheim • Poimsunda • Greapfinzda• Oustabrunn
Joareskroas	Walburgisnochd • Maibaam • Pfingstox • Unruahnocht (Pfingstn) • Johanni • Oimotrieb • Wiesn • Ollaheilignomd (Halloween) •Ollaheilign • Ollasäin • Martini
Gwand	Boarische Tracht • Diandl • Gamsboart • Haferlschuah • Lederhosn • Pfoad • Roagaspitz • Schariwari
Lebmsobschnitt	Ged • Fensterln • Boarische Hozad • Prograda • Sterbbuidl
Lebmsfreid	Derblecken • Gstanzl • Hiatamadl • Hoagascht • Schuahplattler • Schmei • Weana Schmäh • Wolpertinger • Unruahnocht

[1] Die Geschichte der Fosanegl... (auf www.fosanegl.de)

[1]