Johnny Cash

Dá Johnny Cash (deitsch: Bargeld Hanse) is oáná vo de eáfolgreichsdn Country-Musiker, de wejs jemals gem hod. Geboán isá ám 26. Feba 1932 als J. R. Cash in Kingsland, Arkansas, gschtoám ám 12. Sebdembá 2003 in Nashville, Tennessee.

Biográfie

Eá war vo 1954 - 1958 in da Air Force; undá anderem isa do in Landsberg am Lech schdázioniád gwen. Do hoda seine eásdn Liadln gschriem und sei eásde Gidár káffd. Wejá na wiedá dáhoám gwen is, hoda im Sun-Studio, do wou zu deárá Zeid áá de unbekanndn Musiker Elvis Presley, Carl Perkins, Roy Orbison, Jerry Lee Lewis ect. gwen sán, á Pláttn ááfgnummá. Eá is nachád aláwál bekanndá woán und hod guáde Verkaufszahln ghod. Alládings hodá á Drogn gnummá. Deárástweng hod se áá sei eáds Frau vo eám scheidn loun. 1968 hoda ná d'Carter June gheirad, de wej sölwá á bekannde Country-Musikerin war. 1968 und 1969 hoda seine eáfolgreichsdn Albn ááfgnumma, oáns live ausm Folsom Prison und s'onáne im San Quentin-Gfängnis. Vom zwoadn kimmd áá sei eáfolgreichsde Single, A Boy Named Sue. Vo 1969 - 71 hoda sogoá sei eigáne Fernsehsendung ghod. Schej langsam is nachánd á weng schdáádá woán um eám, bisa nachánd in de Achzgá Joar komplett in da Vosenkung voschwundn is. 1994 hodá owá a Kambäck ghod, midn eásdn Dáál vo seiná American Recordings-Serie, des wej nachánd ingesamd stuckárá fimf CDs woán sán. 1997 is bei eám nachand a Neávnleidn gfunná woán, an däm wejá nachand 2003 gschdoám is.

Musikstil

Da Cash Johnny hod in Ofang no koán Schlagzeigá ghod, blos án Gidárisdn (án Perkins Luther) und án Bassisdn (án Grant Marshall). Eá sölwá hod gsunga und Gidár gschbülld. Wáál eám owa des Greisch vo da Snare-Drum áso gfolln hod, hoda a Babiá hinda d'Soidn zwiggd, des hodse nachánd so ähnlich ogheád. Des, und de bsondane Technik vom Perkins Luther, hod dazou gfiaád, dasa braggdisch sein eigenen Musikstil ghod hod, der wej Boom-chicka-Boom ghoissn hod. Schbeda hoda nachánd no án Schlagzeigá grejgt, án Holland W. S., nachánd is aus dá Begleidbänd Tennessee Two de nuie Band woán, Tennessee Three

Man in Black

Wááláse awl schwoáz oglegd hod, isá Man in Black ghoissn woán. Do dámid wolldá zoing, dass einfach vüll z'vüll Leid git, dene wejs ned so guád gejd. Eá hod áá á Liádl gschriem, des wej "Man in Black" hoisd, wou eá des allse eágleád.

Fülm

2005 is a Fülm dráád woán iwá eám mid dem Titl "Walk The Line". Da Phoenix Joaquin hod n'Cash Johnny gschbülld und d'Witherspoon Reese hod d'Carter June gschbülld. Fiá de Rolln hods ná sogoá án Oskar gwungá.

Bekannde Liádln

I Walk The Line
Get Rhythm
Cry! Cry! Cry!
Folsom Prison Blues
Ring of Fire
Big River
A Boy Named Sue
Daddy Sang Bass
Man In Black
Jackson (á Duet mid seiná Frau)
Hurt (vo de American Recordings)