Ruolonds Paksos

Ruolonds Paksos (lt: Rolandas Paksas, gėmė 1956 metās bėrželė 10 dėin Telšiūs) – bovė̄s Lietovuos prezėdėnts. Pėrmāsā Euruopas valstībės prėzidėnts, katros palėka nūšalints nū pareigūm apkaltuos būdo.

Paksos liousē rokounas žemaitėškā ė dėdžiuonas ka īr žemaitis.

Biuograpėjė

R. Paksos gėmė Telšiūs, Elėnas ė Pelėksa Paksūm šeimuo. Īr vėintortis anūm sūnos. 1974 metās bengė Žemaitės vėdorėnė muokīkla ėr istuojė i Vėlnious ėnžėnerėni statības instėtota (daba Vėlniaus Gedėmėna Teknėkas onėversėtets – VGTU). 1979 metās apgīnė dipluoma ėr igījė Pramuonėnės ė cėvėlėnės statības ėnžėnėrė specialībė.

Da stodėjūm metās Paksos tapa akruobatėnė skraidīma meistro. Bova Lietovuos ė TSRS kuomandūm narīs. 1980 metās tapa TSRS čempijuono. Ons īr daugkartėnis Lietovuos čempėjuons, S. Dariaus ėr S. Gėriena tauries laimietuos.

1984 metās bengė Leningrada cėvėlnės aviacėjės akademėjė ėr igījė ėnžėnėrė piluota dipluoma.

Ruolonds Paksos bova S. Dariaus ėr S. Gėriena aerokluba vėršėninks, Lietova atkūrus liuosoma bova Savanuorėškas krašta apsauguos tarnības avėjacėjės jongėnė vaduovs. 1992 metās ėkūrė akcėnė bėndruovė „Rasteko“ ėr ana vadovava, kol 1997 metās bova ėšrinkts i Vilniaus miesta tarība ė palėka Lietovuos suostėnės mero. 1999 metūm bėržielė tapa Lietovuos premjiero, anou bova lėgė spalė mienėsė. 1999 metū groudi tapa Lietovuos Liberalum Sājongas pėrmėninko.

2000 metūm balondi Paksos viel palėka Vėlneus mero, a rodeni bova ėšrinkts i Lietovuos Respoblėkas seima. Nū 2000 metūm lapkrėstė lėgė 2001 metūm bėrželė bova Lietovuos ministros pėrmėninks.

Nū 2001 metūm lėipas lėgė lapkrėstė bova Libralu frakcėjės seimė seniūns ėr Seima opuozėcėjės līdėris.

2002 metūm kuova ikūrė Liberalu demuokratu partėjė ėr palėka anuos pėrmėninko.

2003 metūm sausė 5 dėina par ontuojė rėnkėmum tora ėšrinkts Lietovuos Respoblėkas prėzėdento.

Ėšrinkts prezėdento R. Paksos pradiejė refuormas, katruos napatėka Seima daugomā, ė sīkiom ons bova itarts Konstėtocėjės pažėidėmās. Paksou bova ivardītė kaltėnėmā pažėidos Konstėtocėjė, ėr ons 2004 metūm balondė 6 dėina apkaltuos būdo bova nūšalints nu prezidėnta parėigūm.

Puomiegē

Ba skraidīma da miegst tenėsa ė mutuocėklus. Vertėn geras kningas ė mozėka.

Šėima

Apsėžanėjė̄s.

Žmuona Laima – ėnžėnėrė ekonomėstė.
Doktie Inga.
Sūnos Mindaugs.

Bova prīš Valds Adamkos	Lietovous prezidėnts 2003 – 2004	Pakaitė Artūrs Paulauskis

Šaltenē

[1]