Buku Poda

Poda. ᯇᯬᯑ 1

1:1 Ondo angka poda sipaingot ni si Salomo, anak ni si Daud, raja sian Israel: ᯀᯉᯬ᯲ᯑᯬ ᯀᯰᯄ᯦ ᯇᯬᯑ ᯘᯪᯇᯤᯝᯖᯬ᯲ ᯉᯪ ᯘᯪ ᯘᯞᯬᯔᯬ ᯀᯉᯄ᯦᯲ ᯉᯪ ᯘᯪ ᯑᯀᯑᯮ᯲ ᯒᯝ ᯘᯪᯀᯉ᯲ ᯀᯘᯪ᯲ᯒᯀᯞᯩ᯲

1:2 Asa botoon hapistaran dohot pangajaran, asa dapot antusan undangundang ni hapantason.

1:3 Asa manjalo pangajaran ni panuturion, roha manimbang hatigoran, uhum dohot hasintongan.

1:4 Laho mangalehon habistohon tu halak na tobok marroha, parbinotoan dohot pingkiran tu halak na bajar.

1:5 Sai dibege na pistar ma i, asa tamba poda di ibana, jala na marroha i dapotan ruhut partogion;

1:6 Asa diantusi umpama dohot undangundang, hatahata ni angka na pistar dohot hulingkulingannasida.

1:7 * Biar mida Jahowa do parmulaan ni parbinotoan, alai anggo halak na oto manoisi hapistaran dohot pangajaran.

1:8 Sai tangihon ma, ale anaha, pangajaran ni amangmu, jala unang tulakkon poda ni inangmu.

1:9 Ai bulangbulang hasoloan do i di ulum, jala horunghorung landus di rungkungmu.

1:10 Ale anaha, molo dielaela halak pardosai ho, unang ma ho mangoloi.

1:11 Tung sura didok nasida: Beta hita marbajo laho mandurushon mudar, itagopgop ma halak na so marpipot, soada paralaan.

1:12 Itapolgak ma nasida songon i mangolu, songon na binahen ni parbeguan, jala angka na daulat i, songon halak angka na turun tu tanoman.

1:13 Marragam ma arta angka na arga dapot hita, gohanta ma jabunta tabantaban!

1:14 Marpintu ma ho di tongatonganami, sisada puro ma hita sudena!

1:15 Ale anaha, unang ma olo ho sauduran rap dohot nasida, paholang tagonan patmu sian dalannasida i.

1:16 Ai marlojong tu jea do patnasida i, jala hapogan nasida laho mandurushon mudar.

1:17 Ai tung na so marguna do taon on rambang di adopan ni nasa na marhabong.

1:18 Nasida pe, mudarnasida sandiri do na binajoanna disi, hosanasida sandiri do na ginopgopanna.

1:19 Sai songon i do pangalaho ni ganup na hisapan di pangomoan, tung hosa ni indukna do dibuat.

1:20 Sai joujou do hapistaran i di balian, dipangiar do suarana di angka alaman.

1:21 Di partumpuran ni hariburon do nasida joujou, di pintu harbangan ni huta i ditingtingkon hatahatana songon on:

1:22 Sadia leleng on, hamu ale angka na oto, haholonganmuna haotoon? Jala halomohononmuna insahinsak; hamu ale angka panginsahi? Jala hagigihononmuna parbinotoan; hamu ale angka na bodo?

1:23 Ua mulak ma hamu mangoloi pinsangpinsangku! Ida ma, pangusehononku ma tu hamu Tondingku, pabotohononku ma angka hatangku tu hamu!

1:24 Ala joujou Ahu, hape manjua ia hamu; husurdukkon tanganku, hape ndang adong parduli disi nanggo sahalak.

1:25 Lam diambolongkon hamu tahe sandok panuturionku, jala pinsangpinsangku ndang dioloi hamu:

1:26 Ahu pe nda martata ma Ahu di hinamagomuna, mangolesi ma Ahu di haroro ni hagodoron tu hamu.

1:27 Molo ro hagodoron tu hamu songon habahaba, jala jeamuna ro songon halisungsung, molo ro tu hamu hagogotan dohot hasosahan.

1:28 Disi ma jouonnasida Ahu, hape ndang alusanku; pasogotonnasida ma mangalului Ahu, hape ndang jumpang nasida Ahu.

1:29 Ala naung hinagigihonnasida parbinotoan, jala ndang dipillit biar mida Jahowa.

1:30 Jala ndang dioloi panuturionku, jala ndang dipengkon sandok pinsangpinsangku.

1:31 Jadi ingkon panganonnasida parbue ni dalannasida, jala habutongkononna sangkapsangkap ni rohana sandiri.

1:32 Ai panundalion ni halak na oto laos mambunu nasida, jala hapedemon ni halak na bodo laos mangago nasida.

1:33 Alai manang ise na tumangihon Ahu, marsonangsonang ma ibana maringanan, jala sonang rohana maradophon hagodoron dohot jea.

Poda 2

2:1 Ale anaha, molo dijangkon roham angka hatangki, jala diparateatehon ho angka tonangki.

2:2 Jala dipatinggil ho pinggolmu tumangihon hapistaran, dipaeleng ho roham tu habisuhon.

2:3 Pola tung * joujou ho mangido pangantusion, dipangiar ho suaram mangido habisuhon.

2:4 Molo dijalahi ho angka i, songon perak, jala disulingkit ho, songon arta angka na buni:

2:5 Jadi antusanmu ma biar mida Jahowa, jala jumpang ho parbinotoan ni Debata.

2:6 Ai Jahowa do na marbasabasahon hapistaran, sian pamanganna do ro parbinotoan dohot habisuhon.

2:7 Jala Ibana pahot hatuaon di * halak partigor, Ibana do lombulombu di halak na marpangalahohon hadaulaton.

2:8 Asa diramoti angka lapang ni uhum, jala dijagai dalan ni angka na niasianna.

2:9 Jadi disi ma antusanmu hatigoran dohot uhum, ro di ruhut hasintongan, sandok pangalaho na denggan i tahe.

2:10 Molo masuk hapistaran tu bagasan roham, jala dihalomohon roham parbinotoan.

2:11 Jadi roha hapantason mangaramoti ho, jala habisuhon marjaga ho.

2:12 Asa paluaonna ho sian dalan ni parjahat, sian baoa na mangkatahon getegete.

2:13 Sian halak angka na tumundalhon dalan hasintongan, asa mardalani di angka dalan haholomon;

2:14 Halak angka na las roha mangulahon hajahaton, mariaia nasida mida getegete angka na roa;

2:15 Halak angka na geduk marpangalaho, jala pasebut angka dalanna;

2:16 Asa * paluahon dirim sian jolma ni halak sileban, sian sibabijalang na * patabotabo hatahatana;

2:17 Naung tumadingkon hasoloan ni haposoonna, jala dihalupahon padan tu Debatana.

2:18 Ai marongrong tu hamatean do bagasna, jala pate tu banua toru do angka dalanna.

2:19 Nasa na manopot nasida, ndang ulahan bulung, jala ndang dapotsa angka lapang tu hangoluan.

2:20 Dibahen i mardalani ma ho ale anaha, di dalan ni halak angka na denggan roha, jala marsihohot roham mangihutihut angka dalan ni halak partigor;

2:21 Ai halak partigor i mangingani tano on sogot, jala halak na daulat roha tading disi.

2:22 Alai anggo halak parjahat siap sian tano on, jala halak pangoseose pidom sian i.

Poda 3

3:1 Ale anaha, sai unang halupahon poda na sian ahu, sai diradoti roham ma angka tonangku.

3:2 Ai tambaan ni do di ho ganjang ni ariari dohot taon ni ngolum dohot dame.

3:3 Sai unang ma tallushon sian roham habasaon dohot hasintongan, * horunghorungkon tagonan angka i tu rungkungmu, jala surathon angka i bahen parningotan ni roham.

3:4 Jadi dapotan asi ni roha dohot pangantusion na denggan ho maradophon Debata dohot jolma.

3:5 Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri.

3:6 Sai Ibana ma tanda di nasa dalanmu, asa Ibana patigor angka dalanmu.

3:7 Unang tung * na bisuk ho diparbaga roham, habiari ma Jahowa, jala paholang dirim sian hajahaton.

3:8 I ma gabe hahisaron di dagingmu, jala haneangon di holiholim.

3:9 Pasangap ma Jahowa marhite sian hamoraonmu dohot marhite sian patumonaan ni sandok pangomoanmu.

3:10 Jadi marsipinjot ma angka sopom, jala sirnip tuak anggur angka pangilanganmu.

3:11 Ale anaha, sai unang toishon pangajaran ni Jahowa, jala unang hagitikhon pinsangpinsangna.

3:12 Ai matua dipinsang Jahowa do na hinaholonganna, songon amaama mida anakna hasudungan ni rohana.

3:13 Martua ma jolma na jumpangan hapistaran dohot jolma pangalapan roha.

3:14 Ai dumenggan do pangomoanna sian pangomoan di perak, jala dumenggan parbuena sian sere palangki.

3:15 Ummarga do i sian angka mutiha, jala sandok arta hasoloan ni roham, ndang tarpatudos tusi.

3:16 Di tanganna siamun do ganjang ni umur, jala di hambirangna do hamoraon dohot hamuliaon.

3:17 Dalanna do angka dalan hasudungan ni roha, jala sude lapangna hademakon.

3:18 Hau hangoluan do Ibana di angka na mandahopi, jala manang ise na marsitiopan tusi martua do.

3:19 Marhitehite hapistaran do dipaojak Jahowa tano on, jala marhitehite hapantason angka langit i dipadiri.

3:20 Marhitehite parbinotoanna mabola angka lung i, jala manetekkon nambur angka ombun parginjang i.

3:21 Ale anaha, unang tung loas malua sian matam, sai tiopi ma tagonan roha hahohomon dohot hapantason.

3:22 Asa gabe hangoluan do i di tondim, jala * hajagaron di rungkungmu.

3:23 Jadi marsihohot ma roham manulus dalanmu, jala ndang tartuktuk ia patmu.

3:24 Molo modom ho ndang tagamon tarsonggot, jala ia naung renge ho modom, sonang ma parpodommu.

3:25 Ndang pola tahuton ho mida hagunturon so pangkiriman, manang mida rampokrampok ni halak parjahat, molo ro.

3:26 Ai Jahowa do gabe * haposanmu, jala Ibana mangaramoti patmu maradophon jorgong.

3:27 Unang jua mambahen na denggan tu na hurangan, molo tung tuk gogo ni tanganmu patupahon.

3:28 Unang dok tu donganmu: Datdati tusi marlaho ro; marsogot pe hulehon, hape naung dipeop ho nian nuaeng.

3:29 Unang patubutubu gasa dompak donganmu, hape nalom do anggo rohana maringan di lambungmu.

3:30 Unang pagulut ho dohot manang ise soada paralaan, molo so adong na jat dibahen tu ho.

3:31 Unang mangiburu ho di baoa pangarupa, jala unang paihut dalanna nanggo sada.

3:32 Ai marbiasbias do Jahowa mida halak na geduk, alai * rosu do Ibana tu halak partigor.

3:33 Manginona do torutoru ni Jahowa tu jabu ni parjahat, alai dipasupasu do ianggo undungundung ni halak partigor.

3:34 Ibana marengkelengkelihon halak pangelesi, alai dilehon do asi ni roha anggo tu halak na unduk marroha.

3:35 Hamuliaon do teanon ni halak na bisuk sogot, alai luahonon ni haurahon do halak na oto i.

Poda 4

4:1 Sai tangihon ma, hamu ale angka anaha, pangajaran ni sada ama, jala ringkoti hamu ma gumuruhon pangantusion.

4:2 Ai poda na denggan do na hulehon tu hamu, unang tung tadingkon hamu patikku.

4:3 Ai ahu pe, siminik ni damang do ahu, hasudungan jala anak sasada ni dainang.

4:4 Jadi dipodai ibana ahu, jala didok do mandok ahu: Sai parateatehon ma angka hatangki, jala * radoti angka tonangku, asa mangolu ho!

4:5 Sai eahi hapistaran, eahi ma tutu pangantusion; * unang tung halupahon, jala unang tundali angka hata ni pamanganku.

4:6 Unang tung tadingkon angka i, asa diramoti ho; sai haholongi ma angka i, asa dijaga nasida ho.

4:7 Parmulaan ni hapistaran, on do: Tuhori hapistaran i, jala tuhorhon sandok na niomom tumuhor pangantusion!

4:8 Sai parhamaol ma i, asa dipatimbul ho, marmulia do ho bahenonna, molo marparsigantungan tusi ho.

4:9 Lehononna do tu ulum bulangbulang hasoloan, tumpal na jagar situtu basabasahononna tu ho.

4:10 Sai tangihon, ale anaha, jala jangkon ma angka hatangki, asa * tamba di ho angka taon ni ngolum.

4:11 Di bagasan dalan hapistaran ahu mangajari ho, huiringiring ho mardalan di angka lapang hatigoran.

4:12 Molo mardalan ho disi, ndang tagamon hagogotan langkalangkam, jala molo marlojong ho, ndang tagamon tartuktuk.

4:13 Marsitiopan tu pangajaran ma ho, unang parsitading i; sai tiopi ma i, ai i do hangoluanmu.

4:14 Unang paihut dalan ni angka parjahat, jala unang mardalani ho di dalan ni parjahat.

4:15 Tung palua dirim sian i, unang bolus sian i, paholang dirim sian i jala pasiding.

4:16 Ai ndang tarpodom nasida, nda jolo manjahati, ndang tarnono matanasida, nda jolo targasip dibahen manang ise.

4:17 Ai roti hajahaton do dipangan nasida, jala anggur pangarupaon diinum nasida.

4:18 Alai anggo lapang ni halak partigor tudos tu buha siang ari, lam tu tiurna do, sahat ro di hos ni ari.

4:19 Ia dalan ni halak parjahat tudos tu na holom marimpotimpot, ndang diboto nasida partuktuhannasida i.

4:20 Ale anaha, sai parateatehon ma angka hatangki, tarehon ma pinggolmu tumangihon angka hatangki.

4:21 Unang tung sirpang angka i sian matam, sai momosi ma di tongatonga ni roham.

4:22 Ai hangoluan do i di angka na jumpangan disi, jala gabe hahisaron di sandok dagingna.

4:23 Sian saluhut sijagaon i, gumodang ma jaga roham, ai sian i do ruar angka mual hangoluan.

4:24 Paholang ma sian ho ansiansi ni pamangan, jala padao sian ho bibir sijubajabi.

4:25 Sai manulus tu jolo ma matami mamereng, jala langkop ni matam manuju tigor tu jolom.

4:26 Sai timbangi ma pangalangka ni patmu, asa tung marsihohot saluhut dalanmu.

4:27 Unang manimbil ho tu siamun manang tu hambirang, sai paholang ma patmu sian hajahaton.

Poda 5

5:1 Ale anaha, sai parateatehon ma habisuhon na huajarhon i, tarehon ma pinggolmu tumangihon poda na sian ahu.

5:2 Asa diradoti ho angka panuturion, jala dipajop bibirmu parbinotoan.

5:3 Ai maneteknetekkon situak ni loba do bibir ni sibabijalang,

5:4 Alai anggo ujungna paet do songon pogu, tajom songon podang sidua baba.

5:5 Tuat tu hamatean do ianggo patna, na roko do manjail langkalangkana.

5:6 Ndang ditimbang rohana ianggo * lapang hangoluan, sai maor do pangalangkana, ndang diboto manang dompak dia.

5:7 Dibahen i ale angka anaha, tangihon hamu ma ahu, jala unang manimbil hamu sian pangkataion ni pamanganku.

5:8 Sai paholang ma dalanmu sian parompuan i, jala unang jumonok ho tu pintu ni jabuna!

5:9 Asa unang dipasayang ho hamuliaonmu tu jolma sileban, manang angka taon ni ngolum tu halak na garang.

5:10 Asa unang halak na asing marsaulihon gogom, jala na hinangaluthonmi tading di bagasan jabu ni halak sileban.

5:11 Jala ingkon morongorong ho di hajujumpang ni ajalmu, ia dung sun siap dagingmu dohot sibukmu.

5:12 Gabe dohononmu ma: Apala huhagigihon ma pangajaran marisuang, jala ditoishon rohangku pinsangpinsang!

5:13 Tung so hutangihon suara ni angka gurungku, tung so hupaeleng pinggolhu tu angka na mangajari ahu!

5:14 Otiknari, tung marjea situtu do ahu hape di tongatonga ni luhutan dohot huria!

5:15 Minum aek ma ho sian sumurmu sandiri, jala aek mata na mabaor sian tongatonga ni mualmu.

5:16 Tung tama ma binsat angka mualmu tu balian, hira sunge di angka alaman.

5:17 Sasada ho ma nampuna nasida, jala unang halak sileban donganmu nampunasa.

5:18 Sai pinasupasu ma mualmu, jala dihalashon roham ma jolma ni haposoonmu!

5:19 I ma ursa tini hasoloan di ho, jala hije hasudungan; * sombu ma roham tongtong mida bagotna, mariaia ma ho tongtong binahen ni holong ni rohana.

5:20 Boasa ma tung parhamudaonmu dirim ale anaha, mangihutihut parompuan sileban, jala pajamajamaonmu bagot ni sibabijalang.

5:21 Ai patar do di adopan ni Jahowa dalan ni ganup jolma, jala dipahornop Ibana do saluhut dalan ni patna.

5:22 Hajahatonna sandiri do padapot parjahat i, jala angka jorat ni dosana sandiri marningot ibana.

5:23 Laos mate ibana ala so ditangihon pangajaran, jala binahen ni hinagodang ni haotoonna lonong ibana.

Poda 6

6:1 Ale anaha, molo tung mangkangkung ho di donganmu, pola masijamaan tangan ho mangkangkung halak sileban.

6:2 Tung sura naung tarjorgong ho binahen ni hatahata ni pamanganmu, jala naung tardapot ho binahen ni pangkataion ni pamanganmu.

6:3 Songon on ma bahen ale anaha, sai palua ma dirim ale naung tarjobung ho tu bagasan tangan ni donganmu; laho ma ho padoras langkam jala parajarajai donganmi!

6:4 Unang loas tarnono matam, manang mondokondok langkop ni matam.

6:5 Sai palua ma dirim songon hije sian tangan ni parburu, jala songon pidong sian tangan ni parsambil.

6:6 Laho ma ho, ale sigurbak ulu marsiajar tu porhis, parateatehon ma angka dalanna, asa marbisuk ho!

6:7 Nang so adong di ibana induk manang partogi manang pangarajai.

6:8 Sai dipadiri do bohalna di partaonan logo ni ari, dipapungupungu do sipanganonna di hamamasa ni gotilon.

6:9 Sadia leleng on modommodom ho, ale sigurbak ulu? Sadihari pe ho hehe sian podomanmon?

6:10 Otiknari modom, otiknari mondokondok, otiknari mangunsimpu tangan, laos peak modom, nimmu.

6:11 Jadi ro ma hapogosonmu songon halak panamun, jala haraparonmu songon halak parlombulombu.

6:12 Jolma parroha na jat sahali do baoa pangansi, na marpangalahohon ansiansi ni pamangan.

6:13 * Mangkidophidopi ia matana mangkatai do ibana marhitehite patna, martudutudu marhitehite jarijarina.

6:14 Getegete do di bagasan rohana, sai tongtong do ibana patahitahi hajahaton, patubitubi parbadaan.

6:15 Dibahen i ro hinamago tu ibana so pangkirimanna, tompu do ibana ripur, so hadaonan.

6:16 Harohaon na onom on do dihagigihon Jahowa, jala marbiasbias rohana mida na papituhon:

6:17 Mata haginjangon; dila pargapgap; tangan angka na mandurushon mudar na so marpipot.

6:18 Roha na patubutubu gasa; pat angka na bontis marlojong tu hajahaton.

6:19 Sitindangi pangansi na mangaturhon gapgap, jala na pabolabola halak na marhahamaranggi. C.

6:20 Ale anaha, sai radoti ma tona ni amangmu, jala unang tulakkon poda ni inangmu.

6:21 Duduk ma angka i tongtong tu bagasan roham, jala horunghorungkon tu rungkungmu.

6:22 Molo mardalani ho, ingkon i ma mangiringiring ho; molo modom ho, ingkon i ma mangaramoti ho; jala ia dungo ho muse, ingkon * i ma donganmu mangkatai.

6:23 Ai * sulusulu do tona i, jala patik i do panondang, jala dalan tu hangoluan do angka pinsangpinsang ni pangajaron.

6:24 Laho mangaramoti ho maradophon parompuan parjahat dohot maradophon dila elaela ni sibabijalang.

6:25 Unang ma mangapian roham di hinaulina, jala unang tarjorgong ho binahen ni pangkirdop ni salibonna.

6:26 Ai binahen ni parompuan sibabijalang sahat iba tu roti sanseat sambing, jala jolma ni halak sileban mangago tondi na arga i.

6:27 Tung tarpatuba halak ma api di gedekgedekna, so soksohanna angka ulosna?

6:28 Tung tarbahen halak ma mardalan di atas gara ni api, so matutung patna?

6:29 Laos songon i do manang ise na manopot jolma ni donganna: Ndang tarbahen so manginsombut tu ganup na jerjer jamajama.

6:30 Gari halak panangko ingkon hona uhum do, molo manangko ibana pasabam hisapna, ala male ibana.

6:31 Tung sura dapot tartangkup ibana, ingkon uhum simamitui gararonna, pola ingkon sandok ugasan ni jabuna lehononna alina.

6:32 Alai tung na lalaen do manang ise na mangalangkup jolma ni halak, na mangago tondina do halak na mangulahoni.

6:33 Jea dohot haurahon manginona tu ibana, jala ndang hasalesean haurahonna.

6:34 Ai pangiburuon manunggul rimas ni baoa, jala ndang maralangalang rohana di ari partubolon i.

6:35 Ndang parduli ibana di uhum pardengganan, jala ndang sombu rohana nang dipagodang ho dangdang.

Poda 7

7:1 Ale anaha, sai radoti ma angka hatangki, jala pajop tu bagasan roham angka tonangki.

7:2 Sai paingotingot angka tonangki, asa mangolu ho, jala ramoti patikki songon anak ni matam.

7:3 Tung rahuti ma angka i tu jarijarim, jala surathon angka i bahen parningotan ni roham.

7:4 Dok ma tu hapistaran i: Ibotongku do ho! Jala goari habisukon i pedanmu.

7:5 Asa diramoti ho maradophon jolma ni sileban, maradophon

7:6 Ai mandulo ahu sahali sian pandiloan ni jabungku, sian bonggarbonggar:

7:7 Jadi huida ma di tongatonga ni halak na so hona ajar, dapot ahu ma di tongatonga ni angka anak, sada dolidoli na hurang roha.

7:8 Madangadang do ibana di alaman mardonokkon suhisuhi ni bagas ni parompuan i, jala dalan tu jabu ni sibabijalang didalani.

7:9 Di na rambon ari, di na mamungka holom, pola borngin marimpotimpot.

7:10 Jadi ida ma, ro sada parompuan manomunomu ibana marpangkean sibabijalang, jala parroha marsibuni.

7:11 Na tetep do ibana, jala na hijang, ndang hatiopansa patna di bagasan jabuna.

7:12 Tongkin di alaman, tongkin di pasar, jala di saluhut sirpang ni dalan nasida mangonggop.

7:13 Dung i disoro nasida ma dolidoli i, laos diumma, jala dipapuraga bohina huhut didok mandok ibana.

7:14 Marutang angka * pelean hamauliateon ahu, apala sadarion ma hugarar bagabagangku.

7:15 Alani umbahen ruar ahu manjumpangkon ho mangalului bohim, gabe jumpang ahu do tongon.

7:16 Nunga pola hupahembang angka lage di podomanku, martutup hain na halus sian Misir.

7:17 Nunga pola hupispisi podomanku dohot pamurpuri angka na angur.

7:18 Beta hita, pasombu rohanta masihaholongan sahat ro di torang ni ari, asa tung sabam rohanta masiummaan!

7:19 Ai ndang di jabu anggo baoa i, laho do ibana tu dalanan na dao.

7:20 Diboan huhut puro isian ni hepeng di bagasan tanganna, di tula pe ibana mulak.

7:21 Jadi meleng ma rohana binahen ni hinagodang ni sipaotootona, binahen ni tabotabo ni hatana ibana diluahon.

7:22 Hapogan ibana mangihuthon parompuan i, songon jonggi na tartogu tu pamotongan, jala songon ursa na masuk tu bagasan aring ni parburu.

7:23 Paima dibola sumbia ateatena; songon pidong na manahopi sambil, hape ndang diboto, hosana sandiri do na binununa.

7:24 Dibahen i hamu ale angka anaha, tangihon hamu ma ahu, jala parateatehon hamu angka hata ni pamanganku.

7:25 Unang paeleng roham tu dalan ni parompuan i, unang maupaup ho di angka lapangna.

7:26 Ai tung torop do baoa marragean angka na binununa, jala deak halak angka na tinodosna.

7:27 Angka dalan tu na roko do dalan tu jabuna, angka na pate tu angka bilut ni hamatean.

Poda 8

8:1 Nda joujou do hapistaran i, jala dipangiar habisukon i suarana?

8:2 Di punsu ni angka dolokdolok di lambung dalan, di tongatonga ni angka dalan sirpang na maropat do ibana jongjong.

8:3 Di lambung ni angka bahal, di partungkoan ni huta i, di haroroan tu angka pintu harbangan Ibana joujou songon on:

8:4 Tu hamu ale angka baoa Ahu joujou, jala tu hamu ale jolma manisia hupangiar suarangki.

8:5 Marsiajar habisuhon ma hamu, ale angka na bodo, jala olo ma hamu parrohaon, hamu ale angka na oto.

8:6 Sai tangihon hamu ma, ai na andar do angka na huhatahon, jala buhabuha ni bibir ni pamanganku do hasintongan.

8:7 Ai habonaron do dipaboaboa pamanganku, jala marbiasbias do bibir ni pamanganku mida hajahaton.

8:8 Hatigoran do saluhut hata ni pamanganku, ndang adong na geduk di bagasanna, manang getegete nanggo sada.

8:9 Luhutna i unur do di halak na marroha, jala sintong di halak naung dapotan parbinotoan.

8:10 Sai jangkon hamu ma pangajaranku, unang tagonan perak; jangkon hamu parbinotoan lobi sian sere palangki.

8:11 Ai ummarga do hapistaran sian mutiha, jala saluhut mata intan ndang tarpatudos tusi.

8:12 Ahu, Hapistaran i maringan tampak dohot habisuhon, jala jumpang Ahu do parbinotoan ni panuturion.

8:13 Biar mida Jahowa do mangkagigihon na jat, roha haginjangon dohot hajungkaton; pangalaho na jahat pe dohot pamangan getegete pe na huhagigihon do.

8:14 Ahu do nampuna panuturion dohot hatongtongon, Ahu do nampuna pangantusion dohot hagogoon.

8:15 Marhitehite Ahu mangarajai angka raja, jala mangkajongjongkon hasintongan angka induk.

8:16 Marhitehite Ahu mangarajai angka induk, nang angka na sangap ro di saluhut panguhum na di tano on tahe.

8:17 Ahu mangkaholongi angka na mangkaholongi Ahu, jala angka na burju mangalului Ahu sai jumpangsa do Ahu.

8:18 Guru di Ahu do hamoraon dohot hamuliaon, arta angka na arga dohot hatigoran.

8:19 Dumenggan do parbuengku sian sere palangki dohot sian sere naung niuji, jala dumenggan do na huomo sian perak na pinillit.

8:20 Ahu mangiringiring halak di dalan hatigoran di tongatonga ni angka lapang habonaron.

8:21 Marbasabasahon siteanon tu angka na mangkaholongi Ahu, jala parartaon nasida hugoki do.

8:22 Jahowa do nampuna Ahu di mula ni dalanna sahali, jumolo sian jadijadianna di na robi.

8:23 Sian mulamula sahali Ahu dimiahi, jumolo sian mula ni tano on.

8:24 Uju so adong dope angka laut, nunga ditubuhon hian Ahu, uju so adong dope mual angka na marisi aek.

8:25 Tagan so ojak dope angka dolok, jumolo sian angka dolok batu Ahu ditubuhon.

8:26 Uju so dijadihon dope tano dohot angka adaran ro di sisiasia ni tano on.

8:27 Uju dipadiri Ibana angka langit i, nunga disi hian Ahu, uju pinahembangna hajanghajang i di atas ni lung.

8:28 Uju pinahotna angka ombun di ginjang, uju pinaojakna angka mual ni lung.

8:29 Uju binahenna parbalohan ni laut, asa unang disalpui angka aek bibirna, uju na pinahotna angka ojahan ni tano on.

8:30 Ahu do uju i di lambungna pande, jala marolopolop Ahu ariari marmeami tongtong di jolona.

8:31 Jala Ahu marmeami di liat portibi on, jala * hasudungan ni rohangku do jolma manisia.

8:32 On pe hamu ale angka anaha, sai tangihon hamu ma Ahu! Martua ma angka na mangaradoti angka dalanku.

8:33 Sai tangihon hamu ma pangajaran, asa marbisuk hamu, jala unang hamu mangalo.

8:34 Martua ma jolma na tumangihon Ahu, marjaga di lambung ni pintungku ariari mangaramoti angka tiang ni bahalhu.

8:35 Ai manang ise na jumpangan Ahu, jumpangan hangoluan do, jala maruli asi ni roha sian Jahowa.

8:36 Alai manang ise na mardosa dompak Ahu, mangago tondina sandiri do; nasa na mangkagigihon Ahu mangkaholongi hamatean.

Poda 9

9:1 Nunga dipajongjong hapistaran i jabuna, jala nunga, didakdak tiangna batu sipitupitu i.

9:2 Nunga dipotongi pinahanna pamuean jala dipapang anggurna, nunga huhut dipadiri mejana.

9:3 Nunga disuru surusuruanna boruboru, manggokkon jolma di atas buntulbuntul ni huta i:

9:4 Manang ise na tobok, ro ma ibana tuson! Tu ganup na hurangan roha hatana songon on:

9:5 Ro ma hamu, pangan hamu ma sian rotingku, jala inum hamu sian anggur ma hupapang i.

9:6 Tadingkon hamu ma angka na neang roha, asa mangolu hamu, jala ihutihut hamu ma dalan hapantason.

9:7 Manang ise na umpinsang pangarehe, mangalap haurahon tu ibana sandiri do, jala manang ise na mangajar parjahat gabe tihasna do.

9:8 Unang pinsang pangarehe, asa unang ho dihagigihon; pinsang tagonan halak na bisuk, jadi haholonganna ma ho.

9:9 Lehon sipaingot tu na bisuk, asa ganda dope bisukna; ajari halak partigor, asa tamba parbinotoanna.

9:10 Biar mida Jahowa do parmulaan ni hapistaran, jala parbinotoan ni angka na badia do hapantason.

9:11 Ai marhitehite Ahu ganda ariarim, jala tamba di ho angka taon ni ngolum.

9:12 Molo tung marbisuk ho, bisuk di dirim sandiri do ho, jala molo mangarehe ho, manginona tu ho sandiri do.

9:13 Parompuan na oto do na hijang marpangalaho, jala na gatal, jala ndang diboto agia aha.

9:14 Hundulhundul do ibana di pintu ni jabuna, marhabangsa di atas buntulbuntul ni huta i.

9:15 Asa dipail pardalan angka na mamolus sian dalan i, angka na manulus dalanna hian, ninna do:

9:16 Manang ise na tobok, tuli ma ibana sian on! Jala tu na hurang marroha i hatana songon on:

9:17 Aek na tinangkotangko do na tonggi, jala roti sibunian do na tabo.

9:18 Alai ndang mamoto rohana, disi do angka anak hamatean, jala di bagasan angka godung ni na roko do, angka na ginokkonna i.

Poda 10

10:1 Anak na pistar palas roha ni amana, alai anggo anak na bodo arsak ni roha ni inana.

10:2 Ndang marguna angka arta hajahaton, alai anggo hatigoran paluahon sian hamatean.

10:3 Ndang tagamon * haraparon tondi ni partigor loason ni Jahowa, alai anggo hisap ni angka parjahat, disundati do.

10:4 Marpogospogos ma manang ise na langgus mulaulaon, alai anggo tangan ni angka na padot parohon hamoraon.

10:5 Manang ise na papungupunguhon di partaonan logo ni ari, i ma anak na marroha; alai manang ise na redem di hamamasa ni gotilon, i ma anak jea.

10:6 Angka pasupasu do songgop tu ulu ni partigor; alai anggo pamangan ni halak parjahat hungkupan ni haurahon do.

10:7 Parningotan ni partigor mangkorhon pasupasu, alai anggo * barita ni halak parjahat, sai na busuk do.

10:8 Parroha na bisuk manjalo pangajaran, alai anggo pardila na oto sai na pidom do.

10:9 Manang ise ma marpangalahohon hadaulaton, sai na marsihohot di dalanna, alai manang ise na pageduk dalanna botoon ni halak do i.

10:10 Manang ise na * mangkidophidopi mambahen hajepolon; jala pardila na oto, sai na pidom do.

10:11 Mual ni hangoluan do ianggo pamangan ni partigor; alai anggo pamangan ni halak parjahat hungkupan ni haurahon do.

10:12 Hosom pahehe parbadaan, alai * saluhutna hasalaan di hungkupi roha holongi do.

10:13 Di bibir ni halak na marroha i jumpang halak habisuhon, alai matua hotang tama tu tanggurung ni na hurang roha.

10:14 Ia halak na bisuk marhohomhon parbinotoan, alai anggo pamangan ni na oto manahopi hamagoan.

10:15 Artana i do huta na gonting di roha ni na mora, alai hapipidom ni angka na parir do hapogosonnasida i.

10:16 Na niula ni partigor gabe hangoluan, alai anggo na niomo ni * parjahat gabe dosa do.

10:17 Mardalan di * lapang tu hangoluan do manang ise na mangaramoti pangajaran, alai manang ise na manjua pinsangpinsang, na mangaliluhon do.

10:18 Manang ise na mananom roha hosom, pardila sipaotooto do i; alai manang ise na pararat pangkataon tundal, halak na oto do i.

10:19 Di bagasan hinadeak ni hatahata, ndang holang adong sala; alai manang ise na mangkongkangi bibirna, i ma na marroha.

10:20 Tudoshon perak na pita do dila ni partigor, alai anggo roha ni halak parjahat, ndang hanopan.

10:21 Bibir ni partigor marmahan torop halak, alai anggo halak na oto i haotoon ni rohana do di hamatehon.

10:22 Pasupasu ni Jahowa do mambahen mamora, jala ndang mardongan hangaluton dibahen.

10:23 Hira meammeam do di roha ni na oto mangulahon getegete, suang songon i do halak parhapistaran mangulahon habisuhon.

10:24 Na * hinabiaran ni parjahat, i do songgop tu ibana, alai * pinangido ni roha ni partigor dilehon Jahowa do.

10:25 Songon pamolus ni habahaba, tompuna pesan parjahat i, alai anggo partigor i, hot do ro di salelenglelengna.

10:26 Songon pangkorhon ni na asom tu ipon, jala songon timus tu mata, songon i do sigurbak ulu tu na marsuru ibana.

10:27 Biar mida Jahowa mangudut ariari, alai jempek do anggo angka taon ni parjahat.

10:28 * Arop ni roha ni halak partigor manjadi las ni roha, alai tarhirim do ianggo * halak parjahat i di na niaropna.

10:29 Partanobatoan do di halak na daulat roha dalan ni Jahowa, alai hamagoan do ianggo di halak siulahon hajahaton.

10:30 Ndang tarhutik * partigor i ro di saleleng ni lelengna, alai anggo * parjahat i, ndang maringan di tano on.

10:31 Pamangan ni partigor martumburhon hapistaran, alai anggo dila ni panggetegete ginsiron do.

10:32 Angka bibir ni partigor umboto na patut dohononna, alai anggo pamangan ni halak parjahat getegete sambing do dihatahon.

Poda 11

11:1 Hatian na marpangansi do na hinabiashon ni Jahowa, alai batu an na gok do lomo ni rohana.

11:2 Ia ro hajungkaton, ro ma dohot haurahon: Alai jumpang do hapistaran di halak na serep marroha.

11:3 Hadaulaton ni halak partigor manogihon nasida, alai ansiansi ni halak pangoseose mangago nasida sandiri.

11:4 Ndang marguna hamoraon uju di ari pangarimasan, alai anggo hatigoran paluahon sian hamatean.

11:5 Hatigoran ni na daulat roha patigor dalanna, alai tinggang do anggo parjahat i, binahen ni hajahatonna.

11:6 Hatigoran ni angka partigor paluahon nasida, alai tarjorgong do anggo halak pangoseose, binahen ni hisapna sandiri.

11:7 Molo mate jolma parjahat i, mate do dohot arop ni rohana, jala pangkirimon marhite sian hajahaton mago do.

11:8 Malua do halak partigor sian hagogotan, parjahat i do soluk singkatna tusi.

11:9 Marhitehite pamangan ni pangansi mago donganna dibahen, alai marhitehite parbinotoan ni halak partigor malua nasida.

11:10 Marolopolop do isi ni sada huta mida hadoharon ni halak partigor, jala ia mago halak parjahat masa suraksurak.

11:11 Marhitehite pasupasu ni halak partigor, gabe timbul huta, alai marhitehite pamangan ni halak parjahat maloha do huta i.

11:12 Manang ise na paro lea di donganna, i ma na so marroha, alai anggo baoa na pantas marroha hohom do.

11:13 Manang ise na mangalap manaruhon hata, i ma manjehehon hahomion; alai anggo partondi na marsihohot mangkuphupi hatahata.

11:14 Molo soada ruhut harentaon, peut ma na sabangso i, alai hatuaon do i, molo torop panuturi.

11:15 Tung na marjea situtu do manang ise na girgir mangkangkungi halak sileban, alai manang ise na mangkasogohon pangkangkungion, na marsijamaan tangan, i ma na sonang.

11:16 Inaina na basar marsihohot do maniopi hamuliaon, tudos tu halak siulahon gogo mangahuti hamoraon.

11:17 Mambahen na denggan tu dirina do baoa na basa, alai pasusa sibukna sandiri do halak na garang roha.

11:18 Marpangomoan sipaotooto do halak parjahat; alai manang ise na manaburhon hatigoran, maruli upa haburjuon do.

11:19 Manang ise na marsihohot di hatigoran, sahat do tu hangoluan; alai manang ise na mangeahi hajahaton, patibu hamamatena.

11:20 Marbiasbias do roha ni Jahowa mida halak parroha na geduk, alai lomo ni rohana do halak na daulat marpangalaho.

11:21 Sian sundut tu sundut, tung na so tarbahen lias do parjahat i; alai anggo pinompar ni halak partigor malua do.

11:22 Songon harihir sere di bagasan igung ni babi, suman tusi do parompuan na uli na tumundalhon hatomanon.

11:23 Pangidoan ni halak partigor denggan sambing do, alai anggo arop ni roha ni halak parjahat, mangalap torutoru situtu do.

11:24 Adong deba halak na buas manaburhon, hape lam ganda do, adong huhut deba mangkolit hamoraonna, hape lam marpogospogos do.

11:25 Halak pardenggan basa mokmohan do, jala lam lobian manang ise na mardenggan basa.

11:26 Manang ise na manongkik arga ni emena, buraan ni halak ma ibana, alai maruli pasupasu do ulu ni panggadis.

11:27 Manang ise na manjugulhon na denggan, mangalului lomo ni Debata, alai manang ise na manjalahi hajahaton, sai na manginona tu ibana sandiri do.

11:28 Manang ise na marhaposan tu hamoraonna, sai na tinggang do ibana, alai martumbur do songon bulung anggo halak partigor i.

11:29 Manang ise na mangarapari isi ni bagasna, teanonna ma alogo, jala gabe naposo ni na pistar roha do halak na oto i.

11:30 Parbue ni partigor do * hau hangoluan, jala manang ise na malo sumambut roha ni halak, na pistar do i.

11:31 Ida ma, gari halak partigor maruli pamaloson di tano on, lam halak parjahat ma dohot pardosa.

Poda 12

12:1 Manang ise na holong roha di pangajaran, holong ma rohana di parbinotoan; alai anggo halak na mangkagigihon pinsangpinsang, na dodongon do i.

12:2 Halak na denggan roha maruli halomoan sian Jahowa; alai anggo baoa panggetegete ditorui Ibana do.

12:3 Ndang marsihohot roha ni jolma binahen ni hajahaton; alai anggo urat ni halak partigor, ndang tarhutik.

12:4 Parompuan na marhuaso do tumpal ni harajaanna, alai songon bisa na manggagat tu holiholina do anggo parompuan sibahen haurahon.

12:5 Hasintongan do pingkiran ni halak partigor, alai aturan ni halak parjahat sipaotooto do.

12:6 Pangkataion ni halak parjahat * mangonggop naeng mandurushon mudar; alai anggo pamangan ni halak partigor paluahon halak.

12:7 Humosinghosing do roha ni halak parjahat, gabe pidom nasida; alai hot do ianggo bagas ni halak partigor.

12:8 Marguru tu hapantasonna marroha tarpuji baoa, alai anggo halak na sungkalit marroha hagigian do.

12:9 Dengganan marlea iba, laos iba naposoniba, sian patimbotimbo diriniba, hape hurangan sipanganon do.

12:10 Diparhamaol halak partigor i do hosa ni pinahanna; alai anggo asiasi ni halak parjahat hagarangon do.

12:11 Manang ise na mangula tanona, bosuran ma di sipanganon; alai anggo halak na mangolooloi marlanggelangge, hurangan roha do.

12:12 Marsiilailaan do halak parjahat i manaon jorgong hamagoan, alai hot do ianggo urat ni halak partigor.

12:13 Jorgong na rahat do oseose ni pangkataion, alai malua sian hagogotan do halak partigor i.

12:14 * Marhite sian parbue ni pamangan butongan baoa i di na denggan, jala * sumuang tu ibana do pambahenan ni tanganna sandiri.

12:15 Tigor do dalan ni na oto di rohana, alai anggo halak na pistar i, olo do tumangihon sipaingot.

12:16 Hamurhingon ni na oto botoon do satongkinnari; alai manang ise na mangkuphupi haurahon, i ma na bisuk.

12:17 Manang ise na patajom hasintongan, i ma na papatarhon hatigoran; alai halak sitindangkon gabus papatarhon sipaotooto.

12:18 Halak na neang marpangkuling tudoshon horis na maniham do tajomna, alai anggo dila ni halak na pistar hahisaron do.

12:19 Hot do pangkataion hasintongan ro di salelenglelengna, alai sangkidop mata sambing do anggo dila sipaotooto.

12:20 Sipaotooto do di bagasan roha ni halak na patubutubu hajahaton; alai las ni roha do di halak angka na marsangkap hadameon.

12:21 Ndang mangonai hamagoan agia aha tu partigor; alai gok hajahaton do anggo halak parjahat i.

12:22 Marbiasbias do roha ni Jahowa mida * angka bibir sipaotooto; alai lomo ni rohana do anggo halak siulahon hasintongan.

12:23 Jolma na bisuk mangkahohomhon parbinotoan; alai anggo roha ni halak na oto maningtingkon habodoon.

12:24 Manggomgomi do sogot tangan ni halak na padot; alai anggo halak sigurbak ulu, ingkon marrodi do.

12:25 Holsoholso di bagasan roha ni baoa patungki ibana, alai anggo * hata na denggan pahinsahon rohana muse.

12:26 Dipatongon halak na tigor do donganna tu dalan hasintongan; alai anggo dalan ni halak parjahat mangaliluhon nasida sandiri do.

12:27 Ndang dapotan na binuru anggo halak sigurbak ulu, alai dapotan arta apala na arga do anggo jolma na padot.

12:28 Di bagasan lapang hatigoran do hangoluan, alai anggo dalan panirpangan pate tu hamatean do.

Poda 13

13:1 Anak na pistar marateatehon pangajaran ni amana, alai anggo pangelesi, ndang ditangihon nang hona hata ibana.

13:2 Marhite sian * parbue ni pamanganna, mangan na denggan ganup jolma, alai anggo hisap ni pangoseose pangarupaon do.

13:3 Manang ise na mamompomi pamanganna, i do na mangaramoti hosana, alai manang ise na pangangang bibirna, hamagoan do ujungna.

13:4 Sai dajian mangapian do roha ni sigurbak ulu, hape matua so sombu rohana; alai marmiak do ianggo roha ni halak na padot.

13:5 Dihagigihon halak partigor do hata sipaotooto, alai anggo halak parjahat pabusuk dohot paurak dirina.

13:6 Hatigoran mangaramoti halak na daulat marpangalaho, alai anggo hajungkaton mangonjar tu dosa.

13:7 Adong deba halak paulahon mora ibana, hape maliali di handang do; na deba paula pogos ibana, hape na mora jong do.

13:8 Partobus ni hosa ni baoa do hamoraonna, alai anggo halak na pogos ndang ditangihon, nang hona hata ibana.

13:9 Panondang ni halak partigor marsigorgor do, alai anggo * palito ni halak parjahat mintop do.

13:10 * Roha haginjangon mangalap tongkartongkar sambing, alai jumpang do * hapistaran anggo di halak na olo parrohaon.

13:11 Hamoraon sian dalan na so turut, lam tu otikna do, alai manang ise na paidukidukkon, lam tu gandana do.

13:12 Arop na ngolngol pasusasusa roha, alai hau hangoluan do pangidoan naung ro.

13:13 Manang ise na so parduli di hata ni Debata, mangago dirina sambing do, alai anggo halak na mangkabiari patik, maruli upa do.

13:14 Poda ni halak na pistar do mual hangoluan, pasidingkon angka jorgong hamatean sian ibana.

13:15 Roha hapantason na denggan mambahen hasian, alai anggo dalan ni halak pangose mambahen hagigian.

13:16 Luhut na niula ni halak na bisuk maraturan do, alai anggo na * bodo pararat habodoonna do.

13:17 Suruan na jahat parohon hamagoan, alai anggo suruan haposan mangkorhon hahisaron do.

13:18 Hapogoson dohot haurahon do tohap ni halak na manulak pangajaran; alai manang ise na marateatehon pinsangpinsang, sai marmulia do.

13:19 Molo jumpang na pinangido, tonggi do di roha; alai marmalumalu do halak na oto sumurut sian hajahaton.

13:20 Manang ise na mangkombar halak na bisuk, gabe marbisuk do, alai manang ise na sauduran dohot halak na oto, manjadi jahat do.

13:21 Hamagoan do paburuburu halak pardosa, alai na denggan do dibasahon Jahowa tu halak partigor.

13:22 Halak na denggan roha martohap do ro di pinomparna alai bali tu * halak partigor do hamoraon ni pardosa.

13:23 Godang sipanganon dapot na pogos sian rimbana, alai lan halak ripur do binahen ni hageduhon.

13:24 Manang ise na alang roha mangonai hotang, i ma na mangkagigihon anakna alai manang ise na holong roha di anakna, patibuonna ma pangajaran.

13:25 Halak partigor mangan sampe sombusombu ni rohana, alai sai na rapar do anggo butuha ni halak parjahat.

Poda 14

14:1 Hapistaran ni angka parompuan pajongjong jabuna, alai anggo na oto, laos tanganna sandiri mangalohaisa.

14:2 Manang ise na marpangalahohon hatigoranna mabiar do mida Jahowa, alai anggo halak na pageduk dalanna, palea Ibana do.

14:3 Di bagasan pamangan ni halak na oto do linsinglinsing ni jungkatna; alai anggo bibir ni halak na pistar mangaramoti nasida.

14:4 Molo so adong horbo paninggala, rumar ma sopo; alai godang parsaulian dapot sian gogo ni horbo.

14:5 Sitindangi haposan, ndang olo margabus, alai mangkusiphon gabus do anggo halak sitindangkon sipaotooto.

14:6 Mangalului hapistaran do halak pangarehe, hape ndang jumpangsa; alai muda do dapot halak na marroha i parbinotoan.

14:7 Paholang ma ho sian baoa na oto, ndang tagamon dapot ho bibir na marparbinotoan di ibana.

14:8 Hapistaran ni na bisuk do i: Ditimbang do dalanna, alai anggo haotoon ni halak na oto panginsu do i.

14:9 Tung na so marguna do pelean parsalaan di halak na oto, alai anggo di tongatonga ni halak partigor do hasortaon.

14:10 Roha i do tumanda arsak ni rohana sandiri, las ni rohana pe, ndang dapot hilalaon ni halak sileban.

14:11 * Bagas ni halak parjahat siap do, alai anggo * undungundung ni halak partigor martumbur do.

14:12 Adong do sada dalan, tigor do i di roha ni jolma, hape anggo ujungna gabe dalan tu hamatean do.

14:13 Nang di bagasan parengkelon, tupa do marsak roha, jala ujung ni las ni roha sisongon i hajepolon do.

14:14 Mahap binahen ni dalanna do parroha na marbalik i, alai dihasabamhon baoa na denggan roha i do na di ibana.

14:15 Halak na oto marhatutuhon luhut hatahata, alai anggo halak na bisuk i, ditimbang do langkalangkana.

14:16 Mabiar do ia jolma na pistar, gabe sumurut ibana sian hajahaton, alai anggo halak na oto patealteal hatahatana huhut pedem.

14:17 Halak parpiripiri mangulahon haotoon, jala baoa panggetegete dihagigihon halak do.

14:18 Halak na oto martohap haotoon, alai * martumpalhon parbinotoan do ianggo halak na bisuk.

14:19 Marsomba do sogot halak parjahat di jolo ni halak na denggan roha, jala halak na jungkat di lambung pintu ni partigor.

14:20 Molo dung * pogos, peus nang alealena mida ibana, alai torop do aleale ni halak na mora.

14:21 Manang ise na lea roha mida alealena, pardosa do i; alai manang ise na asi roha mida na dangol, * martua do.

14:22 Tung so lilu ma halak angka na marsangkap hajahaton? Tung so dapotan asi ni roha dohot haburjuon ma halak na marsangkap na denggan?

14:23 Sai mardongan parsaulian do nasa hangaluton, alai anggo hata teal mambahen hurangan halak.

14:24 Tumpal ni halak na pistar do hamoraonnasida, alai haotoon do anggo tengatenga ni halak na oto.

14:25 Siondingi hosa do halak sitindangkon hasintongan, alai anggo halak sitindangkon gabus mangagohon do.

14:26 Biar mida Jahowa do partanobatoan na togu, laos gabe haporusan di angka anakna do Ibana.

14:27 Biar mida Jahowa do mual hangoluan, asa mandao angka jorgong ni hamatean.

14:28 Hinatorop ni na nirajaan do hamuliaon ni raja, alai oruoru ni na nirajaan do hapipidom ni pangarajai.

14:29 Halak na lambat tarrimas do sigodang panimbangon, alai halak parpiripiri pagodang haotoon.

14:30 Ngolu tu pamatang do roha halambohon, alai * manggagat tu holiholi do anggo roha pangiburuon.

14:31 Manang ise na * mangarupa halak na parir, mangaleai Sitompa ibana do; alai * manang ise na pasangap Ibana, asi do rohana mida na pogos.

14:32 Binahen ni hajahatonna pupur parjahat i, alai nalom do roha ni partigor nang di hamamatena.

14:33 Di bagasan roha ni halak na pistar do tongon mangulon hapistaran, alai sai tartanda do i di tongatonga ni halak na oto.

14:34 Habonaron do patimbul sada bangso, alai haurahon ni angka bangso do ianggo dosa i.

14:35 Lomo do roha ni raja mida * naposo na pantas marroha, alai hona rimasna do ianggo sibahen haurahon.

Poda 15

15:1 Alus na lambok paombun rimas, alai anggo hata na horas mambahen marsijongjong ateate.

15:2 Dila ni halak na pistar paholpu parbinotoan, alai anggo pamangan ni * halak na oto marbullakbullakkon haotoon.

15:3 Manatap manonggor do mata ni Jahowa tu liat portibi on, marnida halak na jahat dohot na denggan marroha.

15:4 Dila halambohon do sada hau hangoluan, alai anggo ansiansi marhite sian i, hasedaon ni roha di bagasan do i.

15:5 Halak na oto mangkasogohon pangajaran ni amana, alai jolma na bisuk do manang ise na marateatehon pinsangpinsang.

15:6 Di bagasan jabu ni halak partigor do godang arta, alai parohon hagaoron do anggo parsaulian tu parjahat.

15:7 Pamangan ni halak na pistar manaburhon parbinotoan, ndang songon i anggo roha ni halak na oto.

15:8 Marbiasbias do roha ni Jahowa mida pelean ni halak parjahat, alai anggo tangiang ni halak partigor lomo ni rohana do i.

15:9 Marbiasbias do roha ni Jahowa mida dalan ni parjahat alai dihaholongi rohana do manang ise na mareakkon hatigoran.

15:10 Pangajaran na posi do mangonai tu manang ise na tumadingkon dalan hatigoran; ingkon mate do halak na mangkagigihon pinsangpinsang.

15:11 Gari * parbeguan dohot banua toru sahali patar do di jolo ni Jahowa, lam angka roha ni jolma manisia ma.

15:12 Ndang lomo roha ni pangarehe hona pinsang ibana, ndang laho ibana tumopot halak na pistar.

15:13 Roha na hilas pasihar panaili, alai molo marsak roha margudompong ma tondi.

15:14 Roha na pantas mangalului parbinotoan, alai anggo bohi ni halak na oto lilian mida haotoon.

15:15 Luhut ariari ni na parir jahat do di rohana, alai anggo roha na hilas i hira marharoan tongtong.

15:16 Tagonan na otik mardongan biar mida Jahowa, asa arta godang mardongan hasusaan.

15:17 Tagonan ingkau rata mardongan holong ni roha, sian lombu na pinamokmok mardongan pangiburuon.

15:18 Baoa parpiripiri pahehe parbadaan, alai anggo halak na lambat tarrimas mangintopi pargulutan.

15:19 Tudos do * dalan ni sigurbak ulu tu handang sian bulu duri, alai manaletes do anggo lapang ni halak partigor.

15:20 Anak na pistar palas roha ni amana, alai jolma na oto sahali do manang ise na palea inana.

15:21 Haotoon do apala las ni roha ni halak na hurang roha, alai anggo halak na pantas marroha pabulus pangalahona.

15:22 Sai na tarselak do angka sangkap molo soada tuptupan, alai molo torop panuturi, sai tulus ma.

15:23 Dapotan las ni roha baoa marhite sian paraluson ni pamanganna, jala hata sisandok pe di tingki halehetanna, mansai denggan do.

15:24 Lapang hangoluan manuju dompak ginjang do di halak na pantas marroha, asa dipaholang dirina sian dalan na tuat tu banuatoru.

15:25 Siap do bagas ni halak na jungkat bahenon ni Jahowa, alai hot do ianggo talutuk ni boruboru na mabalu dihajongjongkon.

ᯘᯪᯀᯇ᯲ ᯑᯬ ᯅᯎᯘ᯲ ᯉᯪ ᯂᯞᯂ᯲ ᯉ ᯐᯰᯮᯂᯖ᯲ ᯅᯂᯩᯉᯉᯬ᯲ ᯉᯪ ᯐᯂᯬᯋ, ᯀᯞᯤ ᯂᯖᯬ᯲ ᯑᯬ ᯤᯀᯰᯎᯬ ᯖᯞᯮᯖᯂᯮ᯲ ᯉᯪ ᯅᯬᯒᯮᯅᯬᯒᯮ ᯉ ᯔᯅᯞᯮ ᯑᯪᯂᯐᯰᯬᯐᯰᯬᯂᯉᯬ᯲.

15:26 Marbiasbias di roha ni Jahowa mida sangkapsangkap angka na roa; alai pita do di jolona angka pangkataion sian holong ni roha.

15:27 Laos manggaori bagasna sandiri do manang ise na mangadangi pangomoan na so turut, alai sai mangolu ma halak na mangkasogohon sisip.

15:28 Marhusari do jolo roha ni halak partigor taringot tu alusna, alai anggo pamangan ni halak parjahat marbullakbullakkon hajahaton.

15:29 Holang do Jahowa sian halak parjahat, alai ditangihon do anggo tangiang ni halak partigor.

15:30 Sihar ni panaili palashon roha, * barita na denggan mambahen marmiak holiholi.

15:31 Pinggol na tumangihon pinsangpinsang hangoluan, mian do di tongatonga ni halak na pistar.

15:32 Manang ise na manjua pangajaran, palea rohana sandiri do, alai manang ise na tumangihon pinsangpinsang dapotan roha ma.

15:33 * Biar mida Jahowa do pangajaran tu hapistaran, jala haserepon do * patujolo ni hamuliaon.

Poda 16

16:1 Lan do sangkap ni roha ni jolma, alai sian Jahowa do anggo paraluson ni pamangan.

16:2 Saluhut dalan ni baoa pita do di rohana, alai Jahowa do mangantan angka tondi.

16:3 Tu Jahowa ma giling angka pambahenanmu, asa tulus angka sangkap ni roham.

16:4 Luhut do dijadihon Jahowa hombar tu na tinembak ni rohana, nang halak parjahat tu ari hamagoan.

16:5 * Marbiasbias do roha ni Jahowa mida sude jolma na ginjang marroha; * sian sundut tu sundut: Ndang tagamon lias ibana.

16:6 Marhite sian asi ni roha dohot habonaron salese hajahaton, jala marhite sian biar mida Jahowa mandao iba sian hajahaton.

16:7 Molo lomo roha ni Jahowa mida dalan ni baoa, padameonna tu ibana nang angka musuna.

16:8 Tagonan do na otik marhitehite hatigoran, asa parsaulian godang sian dalan na so turut.

16:9 Roha ni jolma marsangkap dalanna, alai Jahowa do patontu langkana.

16:10 Ulpuhan sian Debata di bagasan pamangan ni raja, jadi ndang manjahati pamanganna di paruhuman.

16:11 Jahowa do nampuna hatian dohot bulung ni dasing hasintongan, jadijadianna do saluhut batu timbangan di bagasan hadanghadangan.

16:12 Marbiasbias do tama roha ni angka raja mangulahon hajahaton, ai * marhite sian hatigoran do hot habangsana.

16:13 Bibir hatigoran i do lomo ni angka raja, jala dihaholongi rohana do halak sidok hata sintong.

16:14 Rimas ni raja do hira angka suruan hamatean, alai anggo halak na pistar paombun rohana.

16:15 Di bagasan sihar ni panaili ni raja do hangoluan, jala tudoshon ombun di partaonan logo ni ari habasaon ni rohana.

16:16 Andul do dumenggan mangomo hapistaran asa sere, jala tagonan do mangomo roha hapantason asa perak.

16:17 Dalan ni halak partigor mandao do sian hajahaton, marhamaol hosana sandiri do manang ise na mangaramoti dalanna.

16:18 Matua ginjang ni roha do patujolo ni hajepolon, jala hatimboon diri patujolo ni hatinggangon.

16:19 Tagonan do serep martondi rap dohot halak na dangol, asa marbagi tabantaban rap dohot na jungkat.

16:20 Manang ise na marateatehon hata ni Debata, jumpangan na denggan, jala halak na marhaposan tu Jahowa maruli tua.

16:21 Halak na pistar marroha targoar na pantas, jala halambohon ni bibir manambai poda.

16:22 Mual hangoluan do * roha hapantason di nampunasa, alai anggo pangajaran ni halak na oto haotoon sambing do.

16:23 Roha ni na pistar papantas pamanganna, jala ditambai poda di atas dilana.

16:24 Tudoshon situak ni loba do pangkataion halambohon, tonggi tu roha, jala hahisaron tu holiholi.

16:25 Adong do sada dalan, tigor di roha ni baoa, hape marhapatean tu hamatean do ujungna.

16:26 Roha ni halak na ngalutan manambai hangalutan tu ibana, ai pamanganna patungki ibana.

16:27 Baoa parjahat sahali mambungbungi hajahaton, jala songon api na marsigorgor do di atas ni bibirna.

16:28 Baoa panggetegete patubi parbadaan, jala parhusiphusip pabolabola halak na maraleale.

16:29 Baoa pangarupa mangela alealena, jala ditogihon ibana tu dalan hamagoan.

16:30 Mangkidophidopi ia matana laho umpingkir getegete, dipahuntamhuntam bibirna naeng mangulahon hajahaton.

16:31 Tumpal hamuliaon do uban na jumpang marhite sian dalan hatigoran.

16:32 Tagonan do halak na lambat tarrimas sian ulubalang, jala halak na mangarajai dirina, umbalga do i sian na papatu huta.

16:33 Tu bagasan ampuan tardanggur rujiruji, alai saguru di Jahowa do haputusanna.

Poda 17

17:1 Tagonan do roti naung pir sanseat mardongan hasonangan, asa gok bagas juhut tibaltibal mardongan bada.

17:2 Sai na rajaan ni anak somang na pantas marroha do sogot anak mata na marroha jea, jala marbagi teanteanan ibana di tongatonga ni angka hahaanggi.

17:3 Balanga pangalalaan manguji perak, jala liang pangalalaan manguji sere, alai Jahowa do na manguji angka roha ni jolma.

17:4 Sai lomo do roha ni halak parjahat i patangitangi bibir pangahution, jala halak sibahen sipaotooto manarehon pinggolna patangitangi dila pangansion.

17:5 Manang ise na mangelak halak na pogos, i ma na manginsahi Sitompa ibana, manang ise na martillahon jea ni donganna jolma, ndang tagamon lias sian uhum.

17:6 * Tumpal ni natuatua do angka pahompuna, jala hamuliaon ni angka anak do amanasida.

17:7 Ndang patut di halak na oto bibir hatengaon, lam di halak na raja ma patut bibir sipaotooto.

17:8 Humala hasudungan ni roha do silehonlehon di roha ni sijalosa, manang dompak dia pe ibana humusor, sai na mardohar do.

17:9 Manang ise na manghungkupi hasalaan, i ma na mangalului haholongan; alai manang ise na mangehet hata, pabolabola halak na maraleale do.

17:10 Masuhan do hata pinsang sahali tu roha ni halak na pistar, asa lombutlombut saratus hali tu halak na oto.

17:11 Hagunturon sambing do na niluluan ni halak parjahat, ingkon borhat nian suruan na jorbut mangalo ibana.

17:12 Tagonan pajumpang iba dohot gompul inaina na agoan anak, asa dohot halak na bodo di habodoonna.

17:13 Manang ise na mambahen na jat balos ni na denggan, matua ibana ndang meret jea i sian jabuna.

17:14 Umpulha aek do manang ise na marmulahon bada, dibahen i tagan so mangalantap dope tagonan otap i badai.

17:15 Manang ise na mamintori halak parjahat, jala disalahon halak partigor, duansa nasida hagigian ni Jahowa do.

17:16 Tung aha ma gunana sinamot di bagasan tangan ni halak na oto tung tartuhorsa ma hapistaran so manang na marroha ibana!

17:17 Manang ise na tongtong marholong ni roha, i ma aleale, alai tartulluk di hagogotan pe ianggo dongan situtu.

17:18 Jolma na hurang roha do manang ise na girgir martopap tangan laho mangkangkung donganna.

17:19 Mangkaholongi dosa do manang ise na mangkaholongi pargulutan, halak na patimbo pintuna mangalului hamagoan.

17:20 Ndang tagamon dapotan tua manang ise na geduk marroha, jala halak pardila getegete madabu tu bagasan jea.

17:21 Manang ise na tumubuhon anak na bodo, mambahen margudompong rohana sandiri, jala ndang tarbahen marlas ni roha ama ni halak na oto.

17:22 Roha na hilas manumpak hahisaron, alai anggo tondi na gondok pamalas holiholi.

17:23 Manjalo sisip sian ampuan do halak parjahat, asa umputor angka dalan ni uhum.

17:24 Di adopan ni halak na pantas marroha do hapistaran, alai anggo mata ni halak na oto mangarambang do sahat ro di ujung ni tano on.

17:25 Hajepolon ni amana do anak na oto, jala arsak ni roha ni ina na tumubuhon ibana.

17:26 Gari dandoon halak partigor ndang jadi, lam ompongan ma tama halak na sangap humongkop hatigoran.

17:27 Manang ise na marroha, markokang do hatahatana, jala parroha na hohom, i ma baoa apala na pantas.

17:28 Nang halak na oto, molo hohom, bisuk do ibana dohonon ni halak, jala na pantas marroha do manang ise na humuntam bibirna.

Poda 18

18:1 Mangolooloi pinangido ni rohana sandiri do manang ise na papulik dirina, saluhut roha hapantason do na nialona.

18:2 Ndang lomo roha ni halak na oto mida roha hapantason, sai naeng botoon ni halak sibunian ni rohana.

18:3 Molo ro hajahaton, ro ma dohot haleaon, jala mangihut tu haurahon do elakelak.

18:4 Aek angka na bagas do hata sian pamangan ni baoa, jala sunge na doras mardalan do mual ni hapistaran.

18:5 Ndang jadi dingkan an halak parjahat i, ala mida sangap, manang pataluhon partigor di paruhuman.

18:6 Bibir ni halak na oto girgir maniroi parsalisian, jala pamanganna pajuju marsilombutan.

18:7 Pamangan ni halak na oto mambahen hamagoanna sandiri, jala bibirna gabe jorgong tu rohana.

18:8 Hatahata ni pangasung i, hira hata pargaiton, hape torus do angka bilut ni pusupusu ditondong.

18:9 Nang halak na marlanggelangge di ulaonna, anggi ni pargadombus do ibana.

18:10 Partanobatoan na togu do Goar ni Jahowa, marhaporusan tusi do partigor i, gabe timbul do.

18:11 Sinamotna do huta na gonting anggo di roha ni na mora, jala tudoshon parik na timbo disura rohana.

18:12 Jolo * dipaginjang jolma i do rohana, asa ro hamagoan, matua haserepon do anggo * patujolo ni hamuliaon.

18:13 Manang ise na mangulak hata, so jolo sahat ditangihon, otona do i, jala parohon haurahon.

18:14 Baoa partondi na pir manaon, i ma paneang parsahitonna, alai anggo partondi na gondok, tung ise ma manganjusa?

18:15 Roha na pantas mangomo parbinotoan, jala pinggol ni halak na pistar manjalahi parbinotoan.

18:16 Silehonlehon ni jolma palumbang langkalangkana, jala i do manogihon ibana tu jolo ni halak na balga.

18:17 Halak parjolo mangaluhon badana parpintor di rohana, hape ro ma muse alona padapot ibana.

18:18 Rujiruji * pasohot angka parsalisian, jala mambahen tolatola tu halak angka na gogo.

18:19 Haha manang anggi na niosean, ummendel do i sian huta na gonting, jala tudoshon ransangransang ni bagas na bolon do angka parsalisian.

18:20 Ingkon sian parbue ni pamanganna pabutongon ni baoa butuhana, jala sian pinarbuehon ni bibirna sabam rohana.

18:21 Hamatean dohot hangoluan marpandapotan do tu dila, jala manang ise na mangaradotisa panganonna do parbuena.

18:22 Manang ise naung jumpangan soripada, dapotan tua, jala maruli habasaon sian Jahowa.

18:23 Marhurajai na pogos i mandok suara, alai kasar do ianggo na mora i maralus.

18:24 Baoa parpedan na torop parohon hasusaan tu ibana sandiri; alai anggo aleale situtu marsilohotan do i sian hahaanggi.

Poda 19

19:1 Tagonan do halak na pogos, na marpangalahohon hadaulatonna sian halak pardila getegete, hape na oto do ibana.

19:2 Nang roha na so marparbinotoan, ndang denggan, jala manang ise na bojok marpangalaho, sai na mardosa do.

19:3 Haotoon ni jolma sandiri mangago dalanna, hape dompak Jahowa do marmungutmungut rohana.

19:4 Hamoraon do patorop aleale, alai anggo halak na parir, gari alealena tumadingkon ibana.

19:5 Ndang tagamon lias sian uhum halak sitindangi pargapgap, jala ndang tagamon malua manang ise na mangkatahon gabus.

19:6 Torop halak papujipuji halak na sangap, jala luhut halak maralealehon baoa pardengganbasa.

19:7 Luhut hahaanggi ni na pogos mangkagigihon ibana, lam alealena ma tung so mandao sian ibana; manang ise na mangulasulas hata ndang marlaba.

19:8 Manang ise na manuhor roha hapantason, mangkaholongi hosana, manang ise na mangaradoti parbinotoan, dapotan tua.

19:9 Halak sitindangi pargapgap, ndang tagamon lias sian uhum, jala mago do halak na mangkatahon gapgap.

19:10 Ndang tama sampe hadoharon tu halak na oto, lam anak somang ma tama gumomgom indukna.

19:11 Roha habibiton ni jolma palambat ibana tarrimas, jala hamuliaonna do i umbolus hasalaan.

19:12 Tudoshon pangorong ni babiat do piripiri ni raja, alai songon nambur tu duhutduhut do anggo habasaronna.

19:13 Mardapotdapot do jea dibahen * anak na oto tu amana, jala songon * panirisan ni udan nene do badabada ni ina.

19:14 Jabu dohot sinamot do teanteanan sian ama, alai sian Jahowa do anggo pardihuta na pantas marroha.

19:15 Halosohon mambahen tarnenep modom, jala roha na marlanggelangge, ingkon rapar do.

19:16 Manang ise na marateatehon tona, mangaramoti hosana do, alai sai na mate do manang ise na neang marpangalaho.

19:17 Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu ibana.

19:18 Sai ajar ma anakmi, ai tarparbaga dope muba rohana; alai unang tubu roham naeng mambunu hosana.

19:19 Halak parpiripiri bolon mambahen siaeonna; alai molo tung dipalua ho ibana sai lam tu tambana dope pangajaran.

19:20 Sai tangihon ma hata sipaingot jala jangkon pangajaran, asa gabe pistar ho di hasusuda ni bohalmu.

19:21 Pasimpar do sangkapsangkap di bagasan roha ni baoa, alai sangkap ni Jahowa do na marsihohot.

19:22 Pinangido ni roha ni jolma do habasaronna, jala tagonan do halak na pogos sian baoa pargapgap.

19:23 Biar mida Jahowa parohon hangoluan, jala halak na sabam roha marsonangsonang do, ndang manginona jea tu ibana.

19:24 Dipohul halak sigurbak ulu do nian indahanna, gari mambahen tu pamanganna ro losokna.

19:25 Mangonai tangan ma ho tu halak pangelesi, asa anggiat marbisuk halak na oto, sai ajar ma halak na pantas marroha, asa tamba parbinotoannai.

19:26 Manang ise na mangarupa amana, tung pola dipalaholaho inana, i ma halak sibahen haleaon dohot haurahon.

19:27 Ale anaha, molo dipasadi ho tumangihon pangajaran, jadi lilu ma ho sian angka hata parbinotoan.

19:28 Halak sitindangi parroha na jat palea uhum, jala pamangan ni halak parjahat mamolgak hageduhon.

19:29 Naung pinadiri hian torutoru di halak pangarehe, jala lipatlipat tu tanggurung ni halak na oto.

Poda 20

20:1 Pangapasi do anggur i, jala sibahen hagunturon tuak na pang, nasa na lilu tu bagasan ni, ndang tagamon marbisuk ibana.

20:2 Tudoshon parauangon ni babiat do asupasup ni raja, manang ise na manggitik ibana, mardosa tu hosana sandiri do.

20:3 Hamuliaon ni baoa do i molo mandao ibana sian bada, alai manang ise na girgir manean bada halak na oto do i.

20:4 Binahen ni biar mida ngali ni ari ndang maninggala sigurbak ulu, jadi manohunohu ibana di hamamasa ni gotilon, hape ndang adong jumpangsa.

20:5 Tudoshon aek angka na bagas do sangkap ni roha ni baoa di bagasan, alai anggo baoa na bistok dapotsa do sulingkitonna.

20:6 Lan jolma mangusaphon denggan basana sandiri, alai anggo baoa haposan, tung mahal do jumpang manang ise.

20:7 Halak na marpangalahohon hadaulatonna, i ma partigor, martua ma angka anakna dung mate ibana.

20:8 Raja na juguk di habangsa paruhuman, mamurpurhon nasa na jat marhitehite matana sandiri.

20:9 Tung ise ma na hum mandok: Nunga tung huurasi rohangki, nunga tung ias ahu sian dosangku?

20:10 Mardua hatian jala mardua solup, rap hagigian ni Jahowa do duansa.

20:11 Nang dakdanak tartanda do marhite sian angka parulaonna, manang na toman, manang na tigor ulaonna.

20:12 Pinggol na tinggil marbinege, dohot mata na torang marnida, Jahowa do jumadihon duansa.

20:13 Unang halomohon na modommodom, asa unang gabe pogos ho, pabidok matam, asa butongan sipanganon ho.

20:14 Na roa do, na roa do! Ninna halak panuhor, alai ia dung tundal ibana, dipapujipuji ma dirina.

20:15 Adong do nian sere dohot torop angka humala: Alai ulaula apala na arga sahali do angka bibir parbinotoan.

20:16 Buat hian ma ulosna, ai halak sileban do na hinangkunganna, jala pangido ma singkoram sian ibana ala ni halak ruar.

20:17 Tabo do didai baoa roti sipaotooto, hape gok batu garaga pamanganna ia di ujung.

20:18 Marsihohot do angka sangkap binahen ni tuptupan, jala mardongan partogion na pantas ulahon hamusuon.

20:19 Manang ise sialap manaruhon hata, i ma na manjehehon hahomion; jala unang angkupangkupi halak sijubajabi.

20:20 Manang ise na mamburai amana dohot inana, ingkon mintop palitona di na holom marimpotimpot.

20:21 Teanteanan na nilahutan di mulana, ndang parsaulihononhon di ujungna.

20:22 Unang dok: Ingkon marbalos bahenonku na jati! Marhaposan tu Jahowa ma ho tagonan, asa Ibana manumpak ho.

20:23 Hagigian ni Jahowa do na mardua batu timbangan, jala tung na roa sahali do dasing panginsu.

20:24 Marharoroan sian Jahowa do langkalangka ni baoa, tung ise ma jolma na mangantusi dalanna sandiri?

20:25 Manjadi jorgong do di jolma, molo marneang ni roha ibana mangehet na badia i; jala dung sor angka bagabagana naeng dope diordioronna alus.

20:26 Raja na pantas marroha mangkiaphon halak parjahat, jala dibolushon di atas nasida roda pardegean.

20:27 Palito ni Jahowa do tondi ni jolma, na manulingkit sude bilut ni pusupusu.

20:28 Habasaron dohot habonaron mangaramoti raja, jala hot habangsana marhitehite roha haholongon.

20:29 Tumpal ni angka dolidoli do gogo nasida, jala * hamuliaon ni halak na tuatua do uban.

20:30 Pangalilitan ni bugang do manjadi pangurasan sian na jat dohot libaslibas angka na masuk tu bagasan angka bilut ni pusupusu.

Poda 21

21:1 Tudoshon aek ni angka sunge do roha ni raja di bagasan tangan ni Jahowa, tung tu sandok lomo ni rohana do * ditogutogu.

21:2 Saluhut dalan ni baoa tigor do di rohana sandiri, alai Jahowa do mangantan angka roha.

21:3 Lomoan do roha ni Jahowa mida na mangulahon hatigoran dohot uhum, asa mida pelean.

21:4 Mata haginjangon dohot roha hajungkaton dohot tiur ni parnidaan ni halak parjahat, dosa sambing do i.

21:5 * Sangkapsangkap ni halak na padot manjadihon hadumaon situtu, alai anggo halak na hojok, ingkon haraparon do.

21:6 Manang ise na papunguhon arta marhite sian dila sipaotooto, ombun sambing do i di halak na mangalului hamatean.

21:7 Pangarupaon ni halak parjahat manggagat tu ibana sandiri, ai manjua do nasida mangulahon uhum hasintongan.

21:8 Marlegotlegot do dalan ni baoa parjahat, alai tigor do anggo ulaon ni halak na pita marroha.

21:9 Tagonan do maringan di bubung parsuhi ni jabu, asa marsajabu dohot parompuan parbadabada.

21:10 Roha ni halak parjahat mangapian di hajahaton, ndang tagamon marasi ni roha ibana, nang mida alealena.

21:11 Molo tarjepol pangarehe, dapotan bisuk ma na oto, jala molo niajaran halak na pistar, ganda ma parbinotoanna.

21:12 Manatap manonggor do Partigor i dompak bagas ni halak parjahat, laos didabuhon halak parjahat i tu hamagoan.

21:13 Manang ise na manongsong pinggolna maradophon angguk ni na parir, joujou nang ibana sogot, hape ndang adong na mangalusi.

21:14 Silehonlehon di sihabunian paombun rimas, jala silua di ampuan paombun piripiri bolon.

21:15 Marlas ni roha do halak partigor mangulahon uhum; alai hasonggoton sambing do i, anggo di halak siulahon jea.

21:16 Jolma na lilu sian dalan hapistaran, ingkon mangangguhi ibana di bagasan parbeguan.

21:17 Ingkon hurangan do baoa na girgir marpanggalangon, ndang tagamon mamora manang ise na holong roha di anggur dohot di pangirpangir.

21:18 Bahen partobus ni partigor do halak parjahat i, jala singkat ni halak parroha sisangunjur do halak pangoseose.

21:19 Dengganan maringan iba di halongonan, asa marsajabu dohot parompuan parbadabada dohot na murhing.

21:20 Arta na arga dohot miak na hushus do di jabu ni halak na pistar, alai anggo jolma na oto mansuasaehonsa do.

21:21 Manang ise na mangaradoti hatigoran dohot habasaon, dapotan hangoluan, hatigoran dohot hamuliaon ibana.

21:22 Dipanaek halak na pistar do huta ni halak na begu, jala diparumpak do tanobato pangatauanna i.

21:23 Manang ise na mangaramoti pamanganna dohot dilana, i ma na mangaramoti tondina maradophon hagogotan.

21:24 Halak na ginjang marroha manelengneleng, pangelak do goarna; marpangalahohon hajungkatonna na tarlobi do ibana.

21:25 Hisaphisap ni sigurbak ulu mambunu ibana sandiri, ai manjua do tanganna mulaulaon.

21:26 Ariari do adong hinapian ni rohana; alai anggo halak partigor buas do mangalehon, jala ndang mangkoliti.

21:27 Hagigian hian do pelean ni halak parjahat, muba do sogirna molo marsangkap tu hajahaton umbahen dipelehon.

21:28 Sai na mago do * sitindangi pargapgap, alai anggo baoa pananginangi masuk do ibana mandok suara ro di salelenglelengna.

21:29 Baoa parjahat papuragahon bohina, alai anggo halak partigor pahothon dalanna.

21:30 Ndada hasea hapistaran, manang roha hapantason manang tuptupan anggo maralohon Jahowa.

21:31 Pinadiri pe hoda tu ari tongtangan, alai guru di Jahowa do anggo haantuon.

Poda 22

22:1 Argaan do barita na denggan sian hamoraon godang, andul do dumenggan roha haholongon sian perak dohot sere.

22:2 Sai pajumpang do halak na mora dohot na pogos, Jahowa do manongos nasida sudena.

22:3 Diida halak na bisuk do jea i ro, gabe laho martabuni, alai anggo halak na oto marsalasala pitpit gabe marsingkor.

22:4 Upa ni roha haserepon dohot biar mida Jahowa: I do hamoraon, hamuliaon dohot hangoluan.

22:5 Basir dohot jorgong do di dalan ni halak pargeduk, manang ise na naeng marhamaolhon hosana, dipaholang ma dirina sian i.

22:6 Tibu hian pasomalsomal dakdanak i marparange hombar tu dalanna; nang dung matua ibana, ndang tagamon morot ibana sian i.

22:7 Halak na mora mangarajai halak na pogos, jala ingkon mangadop parutang tu baoa parutangan.

22:8 Manang ise na manaburhon hageduhon, gotilonna do sogot hamagoan, jala siap do tungkot ni hajungkatonna i.

22:9 Halak na lambok marpanaili, dapotan pasupasu, ai dilehon do sian indahanna tu halak na pogos.

22:10 Sai pabali ma halak pargeduk, asa mandao parbadaan, jadi mansadi ma parsalisian dohot tongkartongkar.

22:11 Manang ise na mangkaholongi roha hapitaon, basar huhut pangkulingna, alealena marajai.

22:12 Mata ni Jahowa mangaramoti parbinotoan, alai anggo hatahata ni pangoseose, dibalikkon Ibana do.

22:13 Hata ni sigurbak ulu: Babiat do di balian, atek beha bunuonna ahu maon di dalan na bolon.

22:14 Godung na bagas do pamangan ni sibabijalang, halak na tinoruan ni Jahowa madabu tu bagasan.

22:15 Haotoon do lohot di bagasan roha ni dakdanak, ingkon hotang pangajaran paholangkon sian ibana.

22:16 Manang ise na mangarupa halak na pogos, paganda na di ibana do, jala manang ise na mardenggan basa tu na mora, mambahen ibana sandiri hurangan.

22:17 Paeleng ma pinggolmu jala tangihon ma pangkataion ni halak na pistar, jala parateatehon ma pangajaranku.

22:18 Ai tung hasonangan situtu do i, molo dipajop ho angka i di bagasan roham; sai rade ma luhutna i di atas bibirmu.

22:19 Sai marhaposan tu Jahowa ma ho, i ma na hupabotohon tu ho sadarion, tu ho ma tongon!

22:20 Nda nunga husurathon tu ho hata angka na arga sahali mardongan panuturion dohot parbinotoan?

22:21 Laho pabotohon tu ho hagostongon ni angka hata hasintongan, asa tung taralushon ho angka hata hasintongan tu halak na marsuru ho.

22:22 Unang tung pupusi halak na parir, ala parir ibana, jala unang tung pajepol halak na dangol hian di paruhuman.

22:23 Ai Jahowa do marluluhon parkaronasida, jala Ibana mamutusi hosa ni angka na mamutusi nasida.

22:24 Unang maraleale ho tu halak parmuruk, jala unang parrosurosu baoa parpiripiri.

22:25 Asa unang diguruhon ho angka pangalahona, jala manaon jorgong di hosam.

22:26 Unang pasaorsaor ho tu halak angka na marjanji, pola masijalangan, angka na manaoni utang ni halak sileban.

22:27 Molo so adong pineopmi bahen garar, boasa tagonan toltolon ni halak lage podomanmi?

22:28 Unang tung paorot talutuk sian na robi, angka na binahen ni ompum dope.

22:29 Molo diida ho baoa na manjugulhon ulaonna, tarbahensa ma tindang marhalado di jolo ni angka raja, ndengkon ibana tindang di jolo ni halak angka na lea.

Poda 23

23:1 Molo hundul ho sapanganan rap dohot sada halak raja, ingkon tangkas timbangonmu manang ise na di jolom.

23:2 Ingkon ampehononmu hian ma mata ni piso tu aruarum, molo tung parhisap ho.

23:3 Unang mangapian roham di sipanganonna angka na tabo i, ai sipanganon sipaotooto do i.

23:4 Unang parenge ulaonmu mangido naeng mamora, tung pasadi ma pingkiranmu sisongon i.

23:5 Tung patut ma mangaranapi matam tusi, hape so adong be disi? Ai tung bahenonna do angka habongna, songon pidong raja wali na habang dompak aoangaoang.

23:6 Unang pangan roti ni halak na murhing marpanaili, jala unang mangapian roham di sipanganonna angka na tabo i!

23:7 Ai songon piningkiranna di bagasan rohana, songon i do ibana tongon; mangan minum ma ho, ianggo hatana tu ho, alai dao do ianggo rohana sian ho.

23:8 Indahan naung pinanganmi, ingkon utahononmu muse, gabe magopo sambing hatahatam, angka na manisi.

23:9 Unang ho mandok hata tu pinggol ni na oto, ai sai na reheonna do sipaingot ni hatami.

23:10 Unang paorot talutuk sian na robi, jala unang soluk bogas ni tangan ni angka na sopot so marama.

23:11 Ai na gogo sahali do Parlulu di nasida, Ibana sandiri mangkasuhuthon parkaronasida dompak ho.

23:12 Sai tarehon ma roham tu pangajaran, jala pinggolmu tumangihon angka hata parbinotoan.

23:13 Unang ontohi pangajaran sian dakdanak; molo hona hotang ibana dibahen ho, ndang tagamon mate ibana.

23:14 Hona hotang pe dagingna dibahen ho, alai anggo tondina paluaonmu ma sian parbeguan.

23:15 Ale anaha, molo marbisuk roham, las ma rohangku, las ma tutu.

23:16 Marolopolop huhut angka puangku, molo di hatahon bibirmu hasintongan.

23:17 Unang mangiburu roham mida halak pardosa, mangapian ma tagonan di biar mida Jahowa ariari.

23:18 Ai ia dung jumpang ari parpudi, ndang tagamon pesan arop ni roham.

23:19 Mananginangi ma ho ale anaha, asa marbisuk ho, jala patongon roham tu dalan na tigor.

23:20 Unang pasaorsaor ho tu halak sisobur tuak anggur, manang tu halak sisohali lompan.

23:21 Ai sai lam tu pogosna do * halak sisobur tuak anggur dohot sisohali lompan, jala marulos rumbangrambing do * halak parondohondok.

23:22 Sai tangihon ma hata ni amangmu na tumubuhon ho, jala unang toishon inangmu, ia dung matua ibana.

23:23 Tuhori ma hasintongan, jala unang gadishon nang hapistaran, pangajaran dohot roha hapantason.

23:24 Mariaia do ama ni halak partigor, manang ise na maranak na pistar marlas ni roha ma mida ibana.

23:25 Sai marlas ni roha ma amangmu dohot inangmu, ingkon marolopolop ma pangintubu di ho.

23:26 Sai lehon ma, ale anaha, rohami tu Ahu, sai dihalomohon matam ma angka dalanku.

23:27 Ai godung na bagas do sibabijalang, jala sumur na pitut do paiturun.

23:28 Tongon do, mangonggop do nasida songon halak panamun, jala dipatorop do halak pangose di tongatonga ni jolma.

23:29 Di ise ulaning hoihoi? Di ise parisuangon? Di ise badabada? Di ise holsoholso? Di ise do angka bugang so marala? Di ise do mata angka na balisaon?

23:30 Di halak angka na laon painuminum tuak anggur, di halak na ro manguji tuak na marraru.

23:31 Unang paberengbereng tuak anggur i, ala marrara idaon, ala marlinolino di bagasan panginuman, ala lambok laho mabaor.

23:32 Hape anggo di ujungna mangkarat do songon ulok, jala dibursikkon bisana songon ulok dari.

23:33 Ia matamu mamereng dompak parompuan sileban, jala rohami mangkatahon getegete.

23:34 Jadi tudoshon halak na modom di tongatonga ni laut do ho, jala songon halak na modom di ujung ni tiang layar.

23:35 (Lam dohononmu dope): Hona lombut ahu, ndang hansit huhilala; ditunjang ahu ndang huboto; ia dung * tarjolma ahu, suang songon i ulahanku dioronku anggur i.

Poda 24

24:1 Unang mangiburu roham mida halak parjahat, jala unang mangapian roham naeng maralealehon nasida.

24:2 Ai hamagoan do dipatahitahi rohanasida, jala jea sambing dihatahon bibirnasida.

24:3 Marhitehite hapistaran pinajongjong sada bagas, jala dipahot do i marhitehite roha hapantason.

24:4 Jala marhitehite * parbinotoan, gok angka bilutna dohot ugasan marragamragam angka na arga jala na uli.

24:5 Holan halak na pistar do ompu ni gogo, jala baoa na marparbinotoan, i ma na so taralo.

24:6 Ai ingkon pantas panguluhonmu tu hamusuon, haantuon pe marguru tu hinadeak ni panuturi do.

24:7 Mamaolhu do hapistaran di halak na oto, dibahen i ndang hum ibana mangungkap pamanganna di partungkoan.

24:8 Halak na marsangkap naeng manjahati, i ma na patut goaron induk ni getegete.

24:9 Pingkiran haotoon do ia dosa, jala marbiasbias do jolma mida halak sipangarehe.

24:10 Molo godoron roham di ari hagogotan, lam moru ma gogom.

24:11 Sai palua ma halak angka na tarboan laho bunuon, ro di angka na tartogu tu pamotongan, molo tung haambatan ho nasida.

24:12 Tung sura dohononmu: Ida ma, ndang huboto hami hata i! Tung so mananda disi Tuhan i, * Sidodo angka roha? Tung so mamoto disi Ibana na mangaramoti tondimu? Ibana do tahe * mamaloshon tu jolma hombar tu pambahenanna be.

24:13 Mangan situak ni loba ma ho, ale anaha, ai na denggan do i dohot aek ni sarang ni loba, ai na tonggi do i di tolonanmu.

24:14 Suang songon i ma dai ni parbinotoan di hapistaran tu tondimu; molo dung dapot ho, * jumpang pe ajalmu, ndang pesan ianggo sihirimon ni roham.

24:15 Unang mangonggop ho ale parjahat di inganan ni halak partigor, unang segai hapeahanna.

24:16 Ai tung sura pe tinggang * halak partigor i pola pitu hali, sai hehe do ibana muse, alai anggo halak parjahat i ompas do binahen ni hinamago.

24:17 Unang martilla ni roha ho, molo tinggang musum, jala unang marolopolop roham molo ompas ibana.

24:18 Asa unang tung diida Jahowa, gabe sogo rohana disi, jala marsibalik rimasna maon sian ibana tu ho.

24:19 Unang pola mohop ateatem mida halak paruhur, unang pola mangiburu ho mida halak parjahat.

24:20 Ai ndang adong sihirimon di halak parjahat i sogot, tung mintop do palito ni halak parjahat.

24:21 Ale anaha, sai habiari ma Jahowa, nang raja, unang rosu ho tu halak panggunturi.

24:22 Ai tompu do hehe hamagoannasida, jala tung ise na umboto tingki partubolon sian nasida na dua i.

24:23 Nang angka poda siingoton sian halak na pistar do i: Ndang denggan marnida bohi di paruhuman.

24:24 Manang ise na mandok tu halak parjahat i: Parpintor do ho! Pulasan ni halak situan na torop do ibana, jala buraan ni angka bangso.

24:25 Alai marsonangsonang do angka na umpinsang ibana, jala songgop do tu nasida pasupasu hatuaon.

24:26 Mangumma bibir do manang ise na maralushon hata angka na sintong.

24:27 Jolo sarihon ulaonmu di balian, jala pature ladangmu, dung i pe asa pauli bagasmu.

24:28 Unang olo ho gabe sitindangi dompak donganmu, soada paralaan; tung tama ma ho marjehejehe marhitehite bibirmu.

24:29 Unang dok: Suang songon na binahenna tu ahu, bahenonku tu ibana; ahu ma mamaloshon tu baoa i, hombar tu pambahenanna.

24:30 Mamolus do ahu sian lambung ladang ni sigurbak ulu, dohot sian lambung porlak anggur ni jolma na hurang roha.

24:31 Jadi ida ma, tubuan siarum horsik do luhutna, jala ditutup sihupi sisikna, jala maloha do parikna batu.

24:32 Dung huida i laos huparateatehon ma; dung huida i laos hubuat ma sipaingot sian i.

24:33 Otiknari modom, otiknari mondokondok, otiknari muse mangunsimpu tangan peak modom nimmu.

24:34 Jadi ro ma hapogosonmu songon halak panamun, jala haraparonmu songon halak na marsinjata.

Poda 25

25:1 Nang angka on poda sipaingot sian si Salomo dope, angka na pinapungu ni angka naposo ni si Hiskia, raja sian Juda.

25:2 Hamuliaon di Debata do i, mangkomihon hata, alai hamuliaon ni angka raja do i, sumulingkit hata.

25:3 Rap so dapot hadodoan do timbo ni langit dohot hapal ni tano on dohot roha ni angka raja.

25:4 Ingkon sirangon do angka taktak sian perak, jala ruar ma ulaula na arga bahenon ni panopa.

25:5 Ingkon pabalion halak parjahat i sian jolo ni raja, jadi hot ma * habangsana marhitehite habonaron.

25:6 Unang patongamtongam dirim di jolo ni raja, jala unang jongjong ho tu inganan ni halak na balga.

25:7 Ai tagonan do dohonon ni halak tu ho: Tungkan julu on ma ho! Unang tung pajepolon ni halak ho di jolo ni halak raja, angka na niida ni matam.

25:8 Unang girgiran ho marbada, ai beha bahenonmu di ujungna, ia dung tarurak ho dibahen donganmu.

25:9 Datdati jujur parkarom dompak donganmu, alai na so tupa papataronmu * hata sibunian ni halak sileban.

25:10 Asa unang direhe na umbegesa i ho, gabe ndang be montok baritam na roa i.

25:11 Antajau sere di bagasan pinggan perak do sada hata na nidok di hahonaanna.

25:12 Antinganting sere dohot horungkorung sian sere palangki do sipaingot, na tupuk tu pinggol ni halak na olo paingoton.

25:13 Songon lambok ni aek mata di hamamasa ni gotilon, songon i do suruan haposan di na marsuru ibana, tung nalom do roha ni tuanna dibahen.

25:14 Songon ombun dohot alogo na so mardongan udan, songon i do baoa na papujipuji dirina ala silehonlehon sipaotooto.

25:15 Tupa do melok roha ni panguhum, binahen ni roha na lambat tarrimas, jala dila na lambok umponggolhon holiholi.

25:16 Ia jumpang ho situak ni loba, pangan ma i sae di ho asa unang magap roham, gabe ingkon utahononmu muse.

25:17 Patollang patmu sian jabu ni alealem, asa unang marmahapmahap rohana mida ho, gabe hagigihononna ho maon.

25:18 Songon ompongompong, podang dohot sumbia na niugam do baoa sitindangkon gabus dompak donganna.

25:19 Tudoshon ipon na tungkolon dohot pat na tarsulandit do nalom ni roha mida halak pangose di ari hagogotan.

25:20 Songon halak na mananggal ulosna di ngali ni ari, jala songon na asom tu sira masiu songon i do halak na mangendehon angka ende tu halak na marsak roha.

25:21 Molo male musum, bahen ibana mangan roti, molo mauas ibana, bahen ibana minum aek.

25:22 Ai molo dibahen ho songon i, na papunguhon angka gara ni api do ho tu atas uluna disi, jala Jahowa mamalosi tu ho.

25:23 Alogo sian utara mamboan udan, jala dila na mangkata tundal paasomasom bohi.

25:24 Tagonan do maringan di bubung parsuhi ni jabu, asa marsajabu dohot parompuan parbadabada.

25:25 Tudoshon aek mata di halak na mandate do barita na denggan sian luat na dao.

25:26 Tudoshon mual na litok dohot sumur na nirasun do halak partigor na targasip mida halak parjahat.

25:27 Ndang denggan magodangku panganon situak ni loba, suang songon i halak na masihasangapon padokdok sarihononna.

25:28 Tudoshon huta na marparik naung magargar do halak na so mangarajai dirina.

Poda 26

26:1 Songon ambolas di partaonan logo ni ari dohot songon udan di hamamasa ni gotilon, suang songon i, ndang patut halak na oto i hasahatan ni hamuliaon.

26:2 Songon amporik na ripe lelean, songon parhabang ni leangleang, songon i do bura na so dalan, ndang mangonai.

26:3 Lisiklisik tama bahenon tu hoda, jala kokang tu halode, alai hotang do tama anggo tu tanggurung ni halak na oto.

26:4 Unang paalusalusi halak na oto paihuthon haotoonnai, asa unang dohot ho tudoshon ibana.

26:5 Alusi tagonan halak na oto i hombar tu haotoonna, asa unang marbisuk ibana disura rohana.

26:6 Manggotapi patna duansa sandiri do, jala marsobur jea manang ise na manongos hata marhite sian halak na oto.

26:7 Songon pangantan ni halak na pangpang di patna duansa, songon i do hata umpama di bagasan pamangan ni halak na oto.

26:8 Songon batu na tinambat di ambalangna do pangalaho ni halak na mangalehon hamuliaon tu halak na oto.

26:9 Songon tungkot tadatada na nialbashon ni tangan ni halak na mabuk, songon i do hata umpama di bagasan pamangan ni halak na oto.

26:10 Parohon hasusaan godang tu ibana sandiri do manang ise na mangupai halak na oto dohot paraotaot.

26:11 Songon biang na mulak tu utautana, suang songon i do diulahulahi halak na oto haotoonna.

26:12 Ia diida ho sada baoa na bisuk di bagasan rohana, gumodang do sihirimon sian halak na oto sogot asa sian ibana.

26:13 Sigurbak ulu mandok: Adong do babiat di tongan dalan, adong singa di pogu ni alaman.

26:14 Songon pintu na mordong di pangordongordonganna, suang songon i sigurbak ulu di atas lagena.

26:15 Dipohul sigurbak ulu do nian indahanna, hape pola susa rohana pasuangkon tu pamanganna.

26:16 Umbisuk do sigurbak ulu di rohana sian pitu halak angka na malo maralus.

26:17 Manangkup pinggol ni biang do manang ise pamolus, molo pola piripirion ibana mida bada na so ro di ibana.

26:18 Songon halak na lalaen, na mamantomhon tulbu, sumbia dohot hamatean:

26:19 Songon i do baoa na mangansi kedanna, gabe didok muse: Nda na margait sambing do ahu!

26:20 Molo soada soban mintop ma api, jala molo soadong pangasung i mansohot ma parsalisian.

26:21 Songon arang tu gara ni api, jala songon soban tu api, songon i do baoa parbadabada pasobu parsalisian.

26:22 Hatahata ni pangasung i, hira hata pargaiton do i, hape torus do angka bilut ni pusupusu ditondong.

26:23 Songon hudon na nilampis dohot taktak ni perak, songon i do bibir angka na marsigorgor mangumma, hape jat do anggo rohana.

26:24 Marhitehite bibirna mangela pangiburu i, hape patahitahi sipaotooto do anggo rohana di bagasan.

26:25 Molo dipabasar ibana pangkulingna, unang ma porsea ho di ibana, ai pitu lampis do biasbias ni rohana di bagasan.

26:26 Dihungkupi pe hosom ni rohana marhite sian ansiansi, hape patar do muse hinajahatna di bagasan luhutan.

26:27 Manang ise na mangkali godung, laos ibana sandiri madabu tu bagasanna, jala marsibalik do batu tu halak na manggulangsa.

26:28 Matua dila sipaotooto mangkosom halak na niropuhanna, jala

Poda 27

27:1 Unang ma pangasahon sadari marsogot, ai ndang diboto ho manang aha na tubu di na sadari.

27:2 Halak na asing tagonan mamuji ho, unang tung pamanganmu sandiri, halak sileban tagonan, unang bibirmu sandiri.

27:3 Dokdok do batu, jala borat horsik, alai dumokdok sian duansa do anggo hamurhingon ni halak na oto.

27:4 Na jorbut do rimas na marpiarpiar, jala lualua ni piripiri tudoshon aek na mangalantap, alai tahe tung ise ma manahan maradophon pangiburuon.

27:5 Tagonan do pinsangpinsang na andar sian roha haholongon na marsibuni.

27:6 Tanda ni haburjuon do bugang angka na binahen ni aleale, alai marjehejehe do anggo ummaumma ni pangasung i.

27:7 Roha na majal mandegedege nang situak ni loba, alai anggo roha na male, gari luhut na paet tonggi do di rohana.

27:8 Songon pidong na tumadingkon asarna, songon i do baoa na madoado holang sian ingananna.

27:9 Miak na hushus dohot daupa palas roha ni jolma, alai halambohon ni aleale dumenggan dope sian sangkap ni rohaniba sandiri.

27:10 Unang tadingkon alealem naung aleale ni amangmu hian, jala * unang bongot i bagas ni hahaanggim jumpa di ari hinamagom; tagonan do sahalak hombar bagas na jonok sian hahaanggi na holang.

27:11 Marbisuk ma ho ale anaha, jala sai palas ma rohangku, asa huboto mangalusi hata ni halak pangarehe.

27:12 Diida halak na bisuk do haroro ni jea, gabe laho ibana martabuni, alai marsalasala pitpit do anggo halak na oto, gabe marsingkor.

27:13 Buat hian ma ulosna, ai halak sileban do na hinangkunganna, jala pangido hian ma singkoram sian ibana, ala ni halak ruar.

27:14 Manang ise na papujipuji alealena, pola dipangiar suarana sogot manogotna i, bura do i balik etongon tu ibana.

27:15 Tiris nene di haroro ni udan tipotipo, dos do i dohot ina parbadabada.

27:16 Manang ise na naeng mamolpol nasida, alogo naeng polpolonna disi, manang miak naeng golomon ni tanganna siamun.

27:17 Bosi manajomi bosi, suang le songon i baoa manajomi bohi ni donganna.

27:18 Manang ise na pauliuli hau ara, panganonna ma parbuena, jala halak na marhaladoi tuanna dapotan hamuliaon.

27:19 Songon halinu ni bohi di bagasan aek, songon i do suman roha ni jolma na sada tu jolma na asing.

27:20 * Parbeguan dohot banua toru ndang olo mahap, * mata ni jolma pe, ndang olo marmahapmahap.

27:21 Balanga pangalalaan manguji perak, jala liang pangalalaan manguji sere, alai anggo baoa taruji do hombar tu pangujianna.

27:22 Tung sura pe diduda ho halak na oto i dohot andalu di bagasan pandudaan rap dohot jagung, laos so sirang do sian ibana habodoonna.

27:23 Sai tangkas ma tandai rupa ni birubirum, sai diparhamaol roham ma punguanmu.

27:24 Ai ndada * hot ro di salelengnilelengna anggo hamoraon, gari tumpal jujungan tung marsundutsundut ma i?

27:25 Molo malos duhutduhut i, tarida ma tumburna, gabe dipapungu halak ma pulungpulungan sian angka dolok.

27:26 Angka anak ni birubiru mambahen parulosonmu, jala tuhor ni hauma do angka hambing tunggal.

27:27 Singkop ma susu ni hambing bahen lompanmu, dohot bahen lompan ni isi ni bagasmu, huhut bahen hangoluan ni angka naposom boruboru.

Poda 28

28:1 * Maporus do halak parjahat soada mangalele, alai anggo halak partigor marnalom ni roha do songon singa.

28:2 Molo masa gunturguntur di na saluat, gabe torop ma indukna; alai molo pantas jala bistok marroha angka jolma i, leleng ma induk i mangolu.

28:3 Baoa pangulu na mangarupa angka na parir tudos do tu udan tangkuju mambaorhon hangoluan.

28:4 Halak angka na tumadingkon uhum papujipuji halak parjahat; alai anggo halak na mangaradoti uhum mangalo nasida.

28:5 Halak parjahat ndang mananda uhum hasintongan alai anggo halak na mangalului Jahowa mangarisik saluhutna i.

28:6 Tagonan do halak na pogos na marpangalahohon hadaulatonna, sian halak na geduk na mardua roha, nang pe mora ibana.

28:7 Manang ise na mangaradoti patik ni Debata i ma anak na pantas marroha, alai manang ise na maralealehon halak pargadombus mambahen haurahon ni amana.

28:8 Manang ise na paganda sinamotna marhitehite bunga ni hepeng dohot parlabaan na so turut, i ma na papunguhon di halak na marasi ni roha tu na parir.

28:9 Manang ise na padao pinggolna unang tangitangionna uhum, tangiangna pe antong gabe biasbias do.

28:10 Manang ise na mangaliluhon halak na tigor tu dalan hajahaton, madabu tu bagasan godung binahenna sandiri do ibana, alai anggo halak na daulat roha manean hatuaon sogot.

28:11 Bisuk do halak na mora di rohana, alai anggo halak ma pogos na pantas marroha dapot do sulingkitonna rohana.

28:12 Molo marolopolop halak partigor, godang ma hamuliaon, alai molo naek sorga halak parjahat monjap ma angka jolma i.

28:13 Manang ise na mamorso angka hajahatonna, ndang tagamon mardohar, alai manang ise na manopoti, laos ditadingkon antong, dapotan asi ni roha do.

28:14 Martua ma jolma na tongtong marhabiaran, alai manang ise na manangkangi rohana madabu tu bagasan jea do.

28:15 Songon singa na marauang, jala songon gompul na maotaot do pangarajai parjahat gumomgom bangso na parir.

28:16 Sada raja na hurang pingkiran, i do pagodang pangarupaon; alai anggo halak na mangkagigihon pangomoan na so turut i do na paganjang ariarina.

28:17 Jolma panginonaan sapata ni mudar ni jolma, mompasompas do sahat ro di tanoman, unang ma antong niambat ibana.

28:18 Manang ise na daulat marpangalaho dapotan tua, alai manang ise na geduk marpangalaho, mardua dalan, sai na tinggang do ibana di na sada.

28:19 Manang ise na mangula tanona, bosuran do ibana di sipanganon; alai manang ise na mangolooloi marlanggelangge, bosuran do ibana di hapogoson.

28:20 Baoa haposan do sigodang pasupasu, alai anggo halak na hapogan pamora ibana, ndang tagamon lias sian uhum.

28:21 Ndang denggan ruhut marmiak ni bohi, hape gari ala ni indahan sampohul, olo do baoa manjahati.

28:22 Monsong do roha ni baoa naeng pamora ibana, marmata pangiburuon, hape ndang diboto songgop hapogoson tu ibana sogot.

28:23 Manang ise na umpinsang jolma marhasangapon do ibana di ujung, gumodang sian halak na palemeslemes pangkulingna.

28:24 Manang ise na mamupusi amana dohot inana, lam didok muse dope: Ndang pola sala! Dos do ibana dohot halak panamun.

28:25 Halak pangahuti pagalak bada; alai manang ise na marhaposan tu Jahowa marlobilobi do di parbohalon.

28:26 Tung na oto sahali do manang ise na * marhaposan tu rohana sandiri, alai manang ise na marpangalahohon hapistaran, malua do ibana sian hamagoan.

28:27 Manang ise na mardenggan basa tu na pogos, ndang tagamon hurangan, alai manang ise na papitpit matana, godang bura manginona tu ibana.

28:28 Molo naek sorga halak parjahat i, monjap ma jolma na metmet, alai molo ripur halak parjahat i lam tamba ma halak partigor.

Poda 29

29:1 Jotjot pe hona pinsang baoa, hape tong do dipatangkang rohana, tompu do ibana ripur so ulahan bulung.

29:2 Molo lam naek sorga halak partigor, marlas ni roha ma halak situan na torop, alai molo halak parjahat mangarajai, gondok ma roha ni halak.

ᯔᯬᯞᯬ ᯞᯔ᯲ ᯉᯀᯂᯩ᯲ ᯘᯒᯬ᯲ᯎ ᯂᯞᯂ᯲ ᯇᯒ᯲ᯖᯪᯎᯒᯬ᯲, ᯔᯒ᯲ᯞᯘ᯲ ᯉᯪ ᯒᯬᯂ ᯔ ᯂᯞᯂ᯲ ᯘᯪᯖᯮᯀᯉ᯲ ᯉ ᯖᯪᯒᯇᯬ᯲, ᯀᯞᯤ ᯔᯬᯞᯬ ᯂᯞᯂ᯲ ᯇᯒ᯲ᯐᯂᯖ᯲ ᯔᯝᯒᯐᯤ, ᯎᯉᯬ᯲ᯑᯂᯬ᯲ ᯔ ᯒᯬᯂ ᯉᯪ ᯂᯞᯂ᯲.

29:3 Manang ise na * holong roha di hapistaran, palas roha ni amana; alai na mansuasaehon sinamotna do manang ise na rosu tu sibabijalang.

29:4 Raja pahothon gomgomanna marhite sian uhum hasintongan; alai anggo baoa sijalo sisip * mangago tanona.

29:5 Halak na palemeslemes pangkulingna tu donganna, manaon rambang di jolo ni patna ibana disi.

29:6 Tarjorgong di bagasan hajahatonna sandiri do halak parjahat i, alai anggo halak partigor i marolopolop do jala marlas ni roha.

29:7 Halak partigor maniroi parkaro ni halak na parir, alai anggo halak parjahat i ndang parduli di nasida.

29:8 Halak pangarehe pagalakgalak bada, pola gor sada huta, alai anggo halak na pistar paombun rimas do.

29:9 Molo maruhum halak na pistar dohot halak na oto, ia so * manggunjal martata do ibana, hape laos so marhasunan.

29:10 Halak sisopsop mudar mangkagigihon halak na daulat roha, alai anggo halak partigor, sai naeng nian pangolu hosana.

29:11 Tung nasa piripirina diparuar halak na oto, alai anggo halak na pistar paombunombun rohana.

29:12 Pangarajai na patangitangi hata gapgap: Saluhut parhaladona gabe parjahat sogot.

29:13 Sai na pajumpang do halak na pogos dohot halak na paanakkon hepeng; Jahowa do patiur mata nasida be.

29:14 Raja na mandabu uhum hasintongan tu angka na parir, pahot habangsana ro di salelenglelengna.

29:15 Hotang dohot pangajaran mangalehon hapistaran, alai anggo dakdanak na pinasombu tarboan rohana, mambahen haurahon ni inana.

29:16 Molo ganda halak parjahat, ganda dohot dosa; alai sanga do * paidaidaon ni halak partigor hariripurnasida.

29:17 Sai ajar ma anakmu, asa sonang ho bahenonna, jala lehononna angka silas ni roham.

29:18 Molo soada panurirangon lumlam ma halak situan na torop, alai martua ma manang ise na mangaradoti patik ni Debata.

29:19 Ndang tarajar hatoban anggo marhitehite hata sambing, ai diantusi do nian, hape ndang diihuthon.

29:20 Molo * diida ho sada baoa na girgir mandok hatahatana, gumodang do sihirimon sogot sian halak na oto asa sian ibana.

29:21 Manang ise na mambahen naposona marlompan, olat ni sidakdanahonna, lam naeng gabe anak ni tuan ibana di ujungna.

29:22 Baoa parpiripiri pahehe parsalisian, jala halak parmurukmuruk do sigodang sala.

29:23 Roha haginjangon ni jolma pajimput ibana, alai anggo partondi na serep dapotan hamuliaon.

29:24 Manang ise na marbagi rap dohot panangko mangkagigihon dirina sambing, * dibege do nian torutoru i, hape ndang dipalumba.

29:25 Biar mida jolma mambahen jorgong, alai manang ise na marhaposan tu Jahowa gabe timbul sogot.

29:26 Torop halak mangalului bohi ni pangarajai mambuat rohana, alai Jahowa do haroroan ni uhum na sintong tu ganup jolma.

29:27 Marbiasbias do halak partigor mida halak pargeduk, marbiasbias huhut halak parjahat mida halak na tigor marpangalaho.

Poda 30

30:1 On ma angka poda ni si Agur, anak ni si Jake. Hata sipaingot dohot panurirangon sian baoa Letiel tu si Itiel dohot si Ukal.

30:2 Ahu do tongon baoa apala na ummoto, jala ndang adong panimbangon ni jolma di ahu.

30:3 Angkup ni ndang huguruhon hapistaran, parbinotoan ni Debata na badia pe ndang hutanda.

30:4 Tung ise ma dung manaek tu banua ginjang, jala tuat muse sian i? Tung ise ma manggolom alogo di bagasan tanganna? Tung ise ma manimpus aek di bagasan ulos? Tung ise ma pahot luhut parbolatan ni tano on? Ise do Goarna, jala ise do Goar ni Anakna? Hatahon ma i molo tung diboto ho!

30:5 Luhut hata ni Debata pita do, tau lombulombu do Ibana di halak angka na marhaposan mida Ibana.

30:6 Unang ambai angka hatana i, asa unang Ibana maminsang ho, gabe pargapgap ho maon didapot.

30:7 Dua ragam do na hupangido sian ho, sai unang ma ontohi sian ahu, tagan so mate dope ahu:

30:8 Sai padao ma sian ahu neang ni roha dohot hata gabus; hapogoson manang hamoraon unang lehon tu ahu; sai loas ma panganonku * bohal tinurpukkonmi tu ahu.

30:9 Asa unang tung * huporso Ho, dung butong ahu, gabe dohononku maon: Ise do Jahowa? Manang unang tung manangko ahu ala dung pogos, gabe huparoaroa maon Goar ni Debatangku.

30:10 Unang patubitubi hatoban mangkata tuanna, asa unang ho diburai, gabe ingkon manginona tu ho muse.

30:11 Adong do sada sundut na mamburai amana, jala ndang dipasupasu ia inana.

30:12 Adong muse sada sundut na pita di bagasan rohana, hape gari ginagatna ndang diburi.

30:13 Adong muse sada sundut mansai dipabollang matana, jala dipatuginjang langkop ni matana.

30:14 Adong muse sada sundut tudoshon podang do ngingina, jala tudoshon piso ia ngadolna laho mansudahon halak na dangol sian tano on dohot halak na pogos sian tongatonga ni manisia.

30:15 Dua do boru ni linta: Nia tuson! Nia tuson! Tolu do nasida na so habutongan, opat do tahe na so olo mandok nunga sae!

30:16 I ma parbeguan dohot bortian na hol; tano i na so olo mahap di aek dohot api na so olo mandok: Nunga sae!

30:17 Mata ni halak na mangelak amana, jala malluk rohana mangoloi tona ni inana, ingkon pulsikkonon ni pidong sigak di topi ni sunge jala parsurageon ni anak ni lali.

30:18 Na tolu ragam on tung halongangan bolon di ahu, jala na opat on ndang dapot rohangku:

30:19 I ma dalan ni pidong raja Wali di aoangaoang, dalan ni ulok di atas dolok batu, dalan ni parau di tongatonga ni laut dohot dalan ni baoa di bagasan boruboru namarbaju.

30:20 Suang le songon i dalan ni parompuan sibabijalang; mangan do nasida, diapusi muse babana, gabe didok muse: Ndang huulahon na so uhum.

30:21 Binahen ni na tolu ragam guntur tano on, jala binahen ni na opat on ndang tarbahensa manahan.

30:22 Binahen ni anak somang molo tung gabe pangarajai ibana, dohot halak na oto molo tung butongan indahan ibana.

30:23 Binahen ni parompuan na hinagigihon molo tung marharajaan muse, dohot hatoban boruboru molo tung ditean na morana.

30:24 Na opat ragam on do apala na metmet di tano on, alai tung na bisuk sahali do i jala angka na bistok.

30:25 I ma angka porhis, sada bangso na so margogo nian, alai diparade do bohalna di partaonan logo ni ari.

30:26 Angka ampodi i ma sada bangso na so tambos nian, alai dibahen do asarna di bagasan dolok batu.

30:27 Ndang marraja nian angka sihapor, alai sahali borhat do luhutna marhoronhoron.

30:28 Babibabi manangkup dohot patna nian, hape maringan do di bagasan jabu ni raja.

30:29 Na tolu ragam i patongamtongam langkana, jala na opat on panuitnuiton mardalan.

30:30 I ma singa, na umpuraga sian saluhut angka binatang, jala ndang mulak maradophon manang aha.

30:31 Hoda pargonting na gompis, manang hambing sada dohot raja na so tardopang.

30:32 Molo tarpaoto ho di na pinatimbomi dirim manang naung marsangkap na roa ho, ampehon ma tangan tu pamanganmu!

30:33 Ai susu na ginunsang manjadi mantega, jala igung na pinisat gabe tarrungar, jala rimas na ginitik patubu bada.

Poda 31

31:1 On ma angka hata ni raja Lemuel, hata sipaingot na pinodahon ni inana tu ibana.

31:2 Aha do dohononku tu ho ale anakku? Aha tahe ale sinuan tunashu? Aha ale * anak bagabagangku?

31:3 Sai unang ma lehon gogom tu angka parompuan manang angka dalanmu bahen hamagoan ni angka raja.

31:4 Ndang patut di angka raja, ale Lemuel, ndang patut tutu di angka raja minum anggur, manang di angka induk minum tuak na pang.

31:5 Asa unang lilian minum, gabe lupa ibana di uhum hasintongan, gabe dipapeol uhum tu luhut anak pardangolan.

31:6 Lehon hamu ma siinumon na horas tu halak na marhinamago, jala anggur tu halak na marsak marroha.

31:7 Minum ma ibana asa dihalupahon hapogosonna; jala unang be dipaingotingot pardangolanna i.

31:8 Ungkap ma pamanganmu mangondihon halak na ngungu, humongkop uhum di saluhut anak na tading di lampin.

31:9 Ungkap ma pamanganmu mandabu uhum hasintongan, jala patingkos uhum tu halak na dangol dohot na pogos.

31:10 Soripada na marhuaso, tung ise ma jumpangan i? Hape daul do argana martimbangkon mutiha.

31:11 Pos do roha ni harajaonna di nasida, di sinamot pe ndang tagamon hurangan nasida.

31:12 Denggan do uhum nasida tu ibana, ndang dung anggo na jat saleleng mangolu ibana.

31:13 Ringkot do rohana manjalahi imput ni birubiru dohot hori jala girgir tanganna marhobas.

31:14 Tudos do nasida tu hopal ni saudagar, sian na dao do diparo indahanna.

31:15 Borngin dope nunga hehe nasida, asa marsagihon sidabuan ni isi ni bagasna dohot tumurpukkon ulaon tu angka naposona boruboru.

31:16 Disangkapi rohana hauma santurpuk, laos dapotsa do sian na niomo ni tanganna, dipungka muse porlak anggur sada.

31:17 Marhohos hagogoon do gontingna, jala dipabosi botohonna.

31:18 Lam idaida ibana di denggan ni pangomoanna; ndang dung mintop palitona manipat borngin.

31:19 Malo do tanganna manjama bonang, jala diordong jarijarina do roda ni sorha i.

31:20 Disurdukkon do tanganna tu halak na dangol, jala dibungka tanganna mardenggan basa tu halak na pogos.

31:21 Ndang pola holsoan ibana taringot tu isi ni bagasna maradophon partaonan ngali ni ari, ai luhut isi ni bagasna marulos dua do.

31:22 Dibau do angka bulusan di ibana, hain na halus dohot lakan do pangkeanna.

31:23 Tarbarita do harajaonna di angka partungkoan, molo hundul ibana rap dohot angka sintua ni luat i.

31:24 Dipauli do angka kameja na halus, jala digadisi, jala dilehon do hohos tu saudagar.

31:25 Togu jala tongam parulosonna, jala * marlas ni roha nasida di ari na ro sogot.

31:26 Diungkap do pamanganna umpodahon hapistaran, jala poda halambohon di atas dilana.

31:27 Dimatamatahon do harentaon ni isi ni jabuna, jala indahan halangguson ndang dipangan.

31:28 Naek sorga do angka anakna, jala diparhatua nasida, harajaanna huhut mamujimuji nasida.

31:29 Torop do nian boru ni halak angka na marhuaso, alai ho do tumindi nasida luhutna!

31:30 Sipaotooto do anggo rupa hasoloan ni roha, jala alogo sambing do haulion, soripada na mangkabiari Jahowa i do sipujipujion.

31:31 Lehon hamu ma tu nasida sian parbue ni tanganna sandiri, jala ingkon papujipujion angka ulaonna di angka partungkoan.