Buku Rut

Rut ᯒᯖᯮ᯲ 1

1:1 Dung i uju manggomgomi angka panguhum, masa ma haleon potir di tano i. Jadi bungkas ma sada halak sian Betlehem Juda rap dohot jolmana dohot anakna dua halak, laho maisolat tu luat Moab. ᯑᯮᯰ ᯤ ᯥᯐᯮ ᯔᯰᯎᯔᯬ᯲ᯎᯬᯔᯪ ᯀᯰᯄ᯦ ᯇᯝᯮᯂᯔᯮ᯲ ᯔᯘ ᯔ ᯂᯞᯩᯀᯉᯬ᯲ ᯇᯬᯖᯒᯪ᯲ ᯑᯪ ᯖᯉᯬ ᯤ ᯐᯑᯪ ᯅᯮᯰᯄᯘ᯲ ᯔ ᯘᯑ ᯂᯞᯄ᯦᯲ ᯘᯪᯀᯉ᯲ ᯅᯖᯩ᯲ᯞᯩᯂᯔᯩ᯲ ᯐᯮᯑ ᯒᯇ᯲ ᯑᯬᯂᯖᯬ᯲ ᯐᯞᯬ᯲ᯔᯉ ᯑᯬᯂᯖᯬ᯲ ᯀᯉᯄ᯦᯲ᯉ ᯑᯮᯀ ᯂᯞᯄ᯦᯲ ᯞᯂᯬ ᯔᯤᯘᯬᯞᯖ᯲ ᯖᯮ ᯞᯮᯀᯖ᯲ ᯔᯬᯀᯅ᯲

1:2 Ia goar ni baoa i si Elimelek do, ia goar ni jolmana si Naomi, ia goar ni anakna na dua i si Malon dohot si Kilian, halak Eprata i do nasida sian Betlehem Juda. Jadi dung tolhas nasida tu luat Moab, laos maringan nasida disi.

1:3 Dung i mate si Elimelek, sinonduk ni si Naomi, gabe holan parompuan i nama tinggal rap dohot anakna na dua i.

1:4 Dung i dibuat nasida ma boru Moab bahen jolmanasida, goar ni na sada si Orpa, goar ni na sadanari si Rut. Jadi dung adong arga sampulu taon nasida maringan disi.

1:5 Mate ma dohot nasida duansa, si Malon dohot si Kilian, gabe tarpunjung ma parompuan i di panading ni anakna na dua i dohot sinondukna i.

1:6 Dung i hehe ma parompuan i rap dohot parumaenna na dua i, asa mulak sian luat Moab, ai tarbortik do tu pinggolna di luat Moab naung marpangulahi roha ni Jahowa mida bangsona mangalehon sipanganon tu nasida.

1:7 Jadi ruar ma nasida sian inganan paisolatanna na sai laon rap dohot parumaenna na dua halak i, asa mardalan sumuang tu tano Juda.

1:8 Dung i ninna si Naomi ma tu parumaenna na dua i: Laho ma hamu mulak ganup tu bagas ni inana be. Sai marasi ni roha ma Jahowa mamaloshon tu hamu, hombar tu na binahenmuna tu angka na mate dohot tu ahu!

1:9 Sai dibasabasahon Jahowa ma tu hamu, asa jumpangan hasonangan hamu, ganup di jabu ni sinondukna be! Dung i diumma ma nasida, laos dipangiar be suarana tumatangis.

1:10 Dung i ninna nasida ma tu simatuana i: Ingkon udur hita mulak tu bangsom.

1:11 Alai ninna si Naomi ma: Mulak ma hamu, ale angka dainang! Boasa naeng mardalan hamu rap dohot ahu? So tagamon adong be tubu anakku bahen sinondukmuna dohot.

1:12 Mulak ma hamu, ale angka dainang, ai nunga matuahu ahu anggo tung marsinonduk mangan muse. Tung sura pe hudok: Adong dope sihirimon di ahu, jala saborngin on dope ahu marsinonduk mangan, jala tubuan anak ahu.

1:13 Tung tarpaima hamu ma nasida paima magodang? Tung tarpunjung ma hamu bahenon ni, gabe sundat marsinonduk mangan? Unang ma songon i ale angka dainang, ai sumapot dope na huae sian hamu, ai ruar huhut tangan ni Jahowa marbajo i ahu.

1:14 Jadi dipangiar nasida muse suarana be, manggogo tumatangis, laos diumma si Orpa ma simatuana i, alai marsihohot ma anggo roha ni si Rut tu nasida.

1:15 Dung i ninna si Naomi ma: Ida ma, nunga mulak ia haham tu bangsona dohot tu debatana, mulak ma dohot ho mangihuthon hahami.

1:16 Alai ninna si Rut ma mangalusi: Unang sai sosoi ahu tumadingkon ho, laho sirang sian ho; ia tusi ho laho, ingkon tusi ihuthononku; ia tusi ho maringanan, ingkon tusi ahu maringanan; bangsom nama bangsongku, Debatam nama Debatangku.

1:17 Ia disi ho mate, ingkon disi ahu mate, disi do ahu huhut naeng tartanom. Sai songon i ma dibahen Jahowa tu ahu, jala songon i ditambai tu joloan on, holan hamateani nama tarbahen manirang ahu sian ho.

1:18 Jadi dung diida si Naomi, sai pir hatana naeng mardalan rap dohot ibana, dipasohot ma hatana manosoi nasida.

1:19 Dung i mardalan ma nasida duansa, paima sahat tu Betlehem. Jadi dung sahat nasida tu Betlehem, riburan ma sude isi ni huta i ala ibana, angka ninna ma: On do hapengani si Naomi?

1:20 Alai ninna ibana ma mandok nasida: Unang be goar hamu ahu si Naomi, tagonan goar hamu ahu si Paet ai paet situtu do pambahenan ni Nasunhinagogo tu ahu.

1:21 Mararta godang ahu laho borhat sian on, alai marsangkot bulung ahu mulak, dibahen Jahowa. Boasa dope goaronmuna ahu si Naomi, nunga tung tarjepol ahu dibahen Jahowa, jala marhinamago dibahen Nasunhinagogo i.

1:22 Alai tongon uju mamungka gotilon patumonaan sahat tu Betlehem si Naomi dohot si Rut, boru Moab parumaenna i rap dohot ibana, mulak sian Moab.

Rut 2

2:1 Dung i adong ma di si Naomi sahalak sihasolhotan ni sinondukna nahinan, na mora jong do ibana, dongan samarga ni si Elimelek, goarna si Boas.

2:2 Dung i ninna si Rut, boru Moab i ma mandok si Naomi: Ua loas ma ahu laho tu ladang manjomputi biur paihutihut halak na marasi ni roha mida ahu. Jadi ninna si Naomi ma tu ibana: Antong laho ma dainang.

2:3 Dung i laho ma ibana, jala sahat tu ladang manjomputi biur paihutihut angka panggotil. Jadi tongon nasida tu ladang golat ni si Boas, dongan samarga ni si Elimelek.

2:4 Jadi ida ma, tongon ro si Boas, sian Betlehem, didok ma mandok angka panggotili: Didongani Jahowa ma hamu! Jadi didok nasida mandok ibana: Sai dipasupasu Jahowa ma ho!

2:5 Dung i didok si Boas ma mandok naposona, na manguluhon angka panggotili: Boru ni ise do na marbaju on?

2:6 Jadi ro ma alus ni naposo na manguluhon angka panggotili mandok: I ma boru Moab, na mulak rap dohot si Naomi sian luat Moab.

2:7 Ro nangkin hatana songon on: Ue loas ma ahu manjomputi di holangholang ni angka tibalan paihutihut angka panggotil! Jadi ro ibana tutu, jala sai dinunuti do sian na sogot rasirasa nuaeng; satongkin sambing dope ibana hundulhundul di bagasan soposopo on.

2:8 Dung i ninna si Boas ma tu si Rut: Tangihon ma hatangkon, ale ito! Unang ho laho manjomputi tu ladang na asing, jala unang ho laho sian on, sai marsilohot dison ma ho rap dohot naposongku boruboru.

2:9 Sai matahon ma ladang tinopotnasida laho manggotil, jala paihutihut nasida. Nunga pola martona ahu tu angka naposongku, asa unang dihaori nasida ho; ia mauas ho, laho ma ho tu panguhatan, jala minum sian aek na tinahuan ni angka naposo i.

2:10 Jadi manungkap ma si Rut, pola dais bohina tu tano marsomba, huhut didok mandok ibana: Dia do dalanna umbahen marasi roha ho mida ahu, pola disarihon roham ahu halak dagang nian.

2:11 Dung i ninna si Boas ma mangalusi nasida: Nunga sar dibaritahon halak tu ahu sude uhummu na denggan i, na binahenmu tu simatuam boru, dung mate sinondukmu; na tinadingkonmi amanta dohot inanta dohot tano hagodanganmu, jala laho manopot bangso na so tinanda hian.

2:12 Sai dibalos Jahowa ma tu ho uhummu na denggan i, jala ingkon marupa na gok ma ho sian Jahowa, Debata ni Israel, na nidapothonmu, laho marondingonding tu toru ni habonghabongna.

2:13 Dung i ninna si Rut ma: Sai dapotan asi ni roha ma ahu di adopanmu, ale tuanku, ai nunga diapuli ho ahu, jala didok ho hata sipir ni tondi ni naposom boruboru, atik pe so songon sada naposom boruboru ahu nian.

2:14 Dung i didok si Boas ma tu ibana: Molo jumpang tingki mangan ro ma dohot ho mandapothon, asa mangan sian sagusagu, jala tullukkon sagusagumi tu bagasan ingkau na asom i. Jadi hundul ma si Rut tu lambung ni angka panggotil, dilehon ibana huhut tu nasida biur na binolgang, gabe butong nasida mangan, pola marlobilobi.

2:15 Jadi dung hehe nasida muse laho manjomputi, ro ma hata ni si Boas mandok tu angka naposona: Pasombu hamu ibana huhut manjomputi di holangholang ni angka tibalan, jala unang paurak hamu nasida.

2:16 Pampisikpisikkon hamu huhut deba di nasida sian angka tibalan i, jala tadingkon hamu, asa dijomputi, jala unang mangonai hata hamu tu nasida.

2:17 Jadi sai didatdati nasida manjomputi di ladang i sahat ro di bot ni ari, laos didege ma na jinamputanna i, gabe adong arga saampang eme godangna.

2:18 Dung i diporsan nasida ma i laho masuk tu huta i, gabe diida simatuana ma na jinamputanna i; laos dirungkai, jala dilehon tu nasida ebaeba sian sipanganonna i.

2:19 Dung i ninna simatuana i ma tu nasida: Didia ho manjomputi sadarion, jala sian dia on diomo ho? Pinasupasu ma baoa na marpanatap tu ho! Dung i dipaboa nasida ma tu simatuana i manang di ladang ni ise nasida mulaulaon, ninna ma: Si Boas do goar ni baoa nampuna ladang panjomputanki sadarion.

2:20 Jadi ninna si Naomi ma tu parumaenna i: Pinasupasu ni Jahowa ma ibana, ala so dialang asi ni rohana i tu halak na mangolu dohot naung mate. Angkupni didok si Naomi tu nasida: Baoa i do na sumolhot tu hita, ibana tama sitean hita.

2:21 Dung i ninna si Rut, boru Moab i ma: Dohot hata on tahe didok mandok ahu: Ingkon angka naposongku hombarhombaronmu, paima sun digotil nasida sandok haumangku.

2:22 Dung i didok si Naomi ma tu si Rut parumaenna i: Denggan do i, ale inang, ia ruar ho rap dohot angka naposona boruboru, asa unang dihaori halak ho di ladang ni halak na asing.

2:23 Jadi sai marsilohot ma si Rut tu angka naposo boruboru ni si Boas manjomputi, paima sun gotilon patumonaan dohot gotilon godang, dung i tinggal ibana rap dohot simatuana.

Rut 3

3:1 Dung i ninna si Naomi, simatuana i ma tu nasida: Ale inang, tung so luluanku hahotanmu, asa marhasonangan ho?

3:2 On pe nda si Boas i, nampuna naposo boruboru na nidongananmu, na sumolhot tu hita? Ida ma, na mamurpur eme do ibana saborngin on di pardegean.

3:3 Dibahen i maridi ma ho huhut marpangir, jala solukkon ma pangkeanmu, jala tuat ma ho tu pardegean, alai unang pola tartanda ho tu baoa i, paima sun ibana mangan dohot minum.

3:4 Ia dung laho modom ibana, jala diboto ho podomanna, laho ma ho mandapothon, jala pasisi bulusanna sian patna, laos papeak ho, dung i paboaonna ma tu ho manang aha sibahenonmu.

3:5 Dung i ninna si Rut ma tu simatuana i: Saluhut na pinaboami tu ahu, i do bahenonku.

3:6 Dung i tuat ma ibana tu pardegean i, jala dibahen ma hombar tu saluhut na tinonahon ni simatuana i tu ibana.

3:7 Jadi dung sun mangan dohot minum si Boas, jala marlas ni roha ibana, laho ma ibana modom tu lambung ni bunbunan ni eme i; jadi ro ma si Rut manisipi, dipasisi ma bulusan sian patna, laos dipapeak ibana.

3:8 Jadi dung tonga borngin tarsonggot ma baoa i, didadapi ma humaliang, hape ida ma, parompuan sada modom di lambung patna.

3:9 Dung i ninna ibana ma: Ise do ho? Jadi ninna nasida ma: Ahu do si Rut naposom boruboru; sai paherbang ma habonghabongmu mangulosi naposomon, ai ho do na sumolhot pareak ahu.

3:10 Dung i ninna si Boas ma: Sai dipasupasu Jahowa ma ho, ale inang! Ai dumenggan dope holong ni roham na parpudi on sian na parjolo i, ala so dipaihutihut ho angka dolidoli, manang halak na pogos manang na mora pe.

3:11 On pe ale inang, unang ho mabiar! Manang aha pe pinangidom, bahenonku do i tu ho; ai sange isi ni huta on donganku samarga umbotosa, parompuan na punia marpangalaho do ho.

3:12 On pe, tongon do, na solhot do ahu nian tu ho, alai adong dope na sumolhot sian ahu.

3:13 Antong dison ma ho saborngin on, anggo manogot, molo tung olo ibana mareakkon ho, denggan do, pareahonna ma ho; alai molo so lomo rohana mareakkon ho, songon sintongna mangolu Jahowa, ahu ma mareakkon ho! Modom ma ho sahat ro di andostorang.

3:14 Jadi modom ma nasida di lambung patna sahat ro di andostorang. Dung i hehe ma nasida, tagan so masitandaan dope jolma sogotna, ai ninna roha ni si Boas do, sai unang ma diboto halak adong parompuan i ro tu pardegean!

3:15 Angkup ni didok: Buat tuson mandar na nialithonmi, jala tarehon, laos disuhati ma tusi onom jual eme, laos diampehon tu ibana, dung i laho ibana tu huta.

3:16 Sahat ma dohot si Rut tu simatuana i, na mandok: Beha do parturena, ale inang? Dung i dipajojor ma tu nasida saluhut na binahen ni baoa i tu ibana.

3:17 Dipaboa huhut: Eme na onom jualon dilehon tu ahu, ai ninna do mandok ahu: Ndang jadi rumar ho mulak tu simatuam.

3:18 Dung i ninna si Naomi ma: Pasonang ma roham, ale inang, paima diboto ho ujung ni hata i, ai ndang tagamon pasohoton ni baoa i, nda ingkon marujung sadarion hata i.

Rut 4

4:1 Dung i laho ma si Boas manopot partungkoan ni huta i, laos hundul disi; jadi ida ma, mamolus ma panean na nidok ni si Boas i, ninna ma: Aning ale, ro ho jolo hundul tuson. Jadi ro ma ibana laos hundul.

4:2 Dung i dibuat si Boas ma sampulu halak sian angka sintua ni huta i, ninna ma: Hundul hamu tuson, gabe hundul ma nasida.

4:3 Didok muse tu panean i: Ia hauma golat ni donganta si Elimelek nahinan, nunga digadis si Naomi, na mulak i sian luat Moab.

4:4 Jadi huambathon ma hatangku mandok: Naeng jolo papataronku hata i tu pinggolmu, on pe tobus ma i di adopan ni halak isi ni huta on dohot di adopan ni sintua ni bangsongku; alai molo so olo ho manobus, paboa di ahu asa huboto, ai ndang adong halak dungkon ni ho manobus, dung ho ahu nama; jadi didok baoa i ma: Ahu ma manobus.

4:5 Dung i ninna si Boas ma: Sadari ditobus ho hauma i sian tangan ni si Naomi, pagodangonmu ma dohot si Rut, boru Moab i na mangkabaluhon na mate, asa marrindang bahenonmu na mate na mangihutihut pargolatanna.

4:6 Jadi ninna panean i ma: Molo songon i ndang tarbahen ahu manobus i, atik tung beha mangago partohapanku sandiri ahu disi. Tobus ma di ho sitobusonku hian, ai ndang tarbahen ianggo ahu manobus.

4:7 Alai songon on do hasomalan di Israel sian na robi dope, molo manobus manang palibehonsa halak, asa tung hot hata i: Ditanggali halak na sambariba ma sipatuna mangalehon tu donganna; i ma hasomalan di Israel.

4:8 Dung i didok panean i ma tu si Boas: Tobus ma di ho, laos ditanggal sipatuna i.

4:9 Dung i ninna si Boas ma tu angka sintua i dohot tu sude halak situan na torop i: Sitindangi ma hamu sadarion, paboa naung hutobus sian tangan ni si Naomi luhut na tinading ni si Elimelek nahinan ro di luhut na di si Malon dohot si Kilian nahinan.

4:10 Angkupni pagodangonku ma si Rut, boru Moab i, jolma ni si Malon nahinan, asa marrindang na mate na mangihutihut pargolatanna, asa unang siap goar ni na mate sian tongatonga ni angka donganna dohot sian bahal ni hutana i. Hamu do sitindangi ni saluhutna i sadarion.

4:11 Dung i luhut situan na torop angka na di partungkoan i, ro di angka sintua mandok: Hami ma tutu sitindangina! Sai dibahen Jahowa ma parompuan on na masuk tu jabumuna songon si Rahel dohot si Lea, nasida na dua do haroroan ni pinompar ni Israel, sai marhuaso ma ianggo ho di Eprata, jala marbarita goarmu di Betlehem.

4:12 Pinomparmu pe, sai songon pinompar ni si Peres ma, na tinubuhon ni si Tamar di si Juda marhite sian pomparan sibasabasahonon ni Jahowa tu ho sian parompuan naposo on.

4:13 Jadi dibuat si Boas ma si Rut bahen jolmana. Jadi dung ditopot si Boas nasida, gabegabean ma nasida ditumpak Jahowa, jala ditubuhon sada anak.

4:14 Dung i didok angka parompuan i ma mandok si Naomi: Pinuji ma Jahowa, na patongonhon tu ho sadarion sada panean, asa marbarita goarna di Israel.

4:15 Ingkon ibana ma sipasabam roham dohot pasarisari ho di hatutuamon, ai parumaenmi na holong roha di ho manubuhonsa, na dumenggan di ho sian anak pitu.

4:16 Dung i dibuat si Naomi ma posoposo i, laos diabing mainunduhonsa, jala ibana gabe parorotna.

4:17 Dung i ro ma angka parompuan hombar bagasna mambahen goarna, ninna ma: Nunga tubu sada anak di si Naomi, gabe dibahen goarna si Obed, i ma ama ni si Isai, ama ni si Daud muse.

4:18 On ma angka sundut ni si Peres: Peres manubuhon Hezron.

4:19 Si Hezron manubuhon si Ram, na manubuhon si Aminadab.

4:20 Si Aminadab manubuhon si Nahason, na manubuhon si Salmon.

4:21 Si Salmon manubuhon si Boas, na manubuhon si Obed.

4:22 Si Obed manubuhon si Isai, na manubuhon si Daud.