Swèden
| Kerajaan Swèden Konungariket Sverige (Swèd) | |||
| |||
| |||
| Ibu negeri | Stokholem | ||
| Nama pengendek | Swèd | ||
Swèden (hurup Arab Gundul: سويدن atawa اسويدن; basa Swèd: Sverige) atawa resminya Kerajaan Swèden (hurup Arab Gundul: كراجأن سويدن; basa Swèd: Konungariket Sverige) entu atu negara Norden nyang ada di bagèan Èropa nama Skandinawi. Dia punya jiran entu Pinlan ama Norwèhen. Swèden juga' kejuntrung ama Dènemarken di kidul paké jembatan. Ni negara – atu negara bekembang. Dia punya hopstad[1] ama kota paling gedénya entu Stokholem. Adapun orang-orang Swèden digero'nya orang Swèd (hurup Arab Gundul: اورڠ سويد).
Jumblah penduduknya ada sekitaran 10 jutaan orang. Di hopstatnya, ada tinggal ampir 1 juta orang. Adapun kota gedé laènnya antara laèn kaya': Gotenbereh èn Malmè. Ni kota pada di belah ponggahan kidulnya deri ni negara, nyang di mana kaga' pati dingin kaya' bagèan lor punya dingin.
Swèden entu negara kerajaan konstitusionil, sebab ada rajanya, Raja Karèl XVI Gustap, cuman kaga' gableg kuasa tulèn acan. Swèden entu negara parlemènter, artinya rehèringnya[2] dipili ama parlemèn nyang dibenum[3][4] ama ra'yat. Ni negara dipimpin secara kera'yatan[5] ama guwernemèn nyang dikepalain ama wajiralam[6] kepili.
Swèden ada punya basa mayoritèt resmi, ya'entu basa Swèd (basa Swèd: svenska). Swèden juga' gableg lima basa minoritèt laènnya, antara laèn: basa Pin, basa Dèt Yahudi, basa Sami, basa Pin Tornédal, ama basa Rom.
Swèden jadi anggota Uni Èropa ari bulan 1 Januari tahon 1995. Kaga' kaya' kebanyakan negara Uni Èropa, Swèden bukan anggota deri Kawasan Èuro èn belon mulain maké èuro jadi mata uangnya. Ni bahnanya orang-orang pada ngasi suara kaga' mau maké duit èuro, mangkanya duitnya tetep paké kron Swèd.
Ruju'an
permak- ↑ Hopstat atawa hopstad (hurup Arab Gundul: هوفستت atawa هوفستاد) – ibukota (Indo.); capital (Ing.); hoofdstad (Wld.).
- ↑ Rehèring (hurup Arab Gundul: رهيريڠ atawa رخيريڠ) – pemerintah, administrasi (Indo.); government, administration (Ing.); regering (Wld.).
- ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Benum (hurup Arab Gundul: بنوم) – angkat [jabatan] (Indo.); to appoint (Ing.); benoemen (Wld.).
- ↑ Saidi, Ridwan. (2007). Glosari Betawi: Kamus kata-kata, nama, dan peristiwa dari zaman prasejarah hingga zaman moderen. Betawi Ngeriung.
- ↑ Kera'yatan (hurup Arab Gundul: كرعيتن) – demokrasi (Indo.); democracy (Ing.).
- ↑ Wajiralam (hurup Arab Gundul: وزير اعظم) – perdana menteri (Indo.); prime minister (Ing.).