C'hwevrer
| Genver · | C'hwevrer · | Meurzh · | Ebrel · | Mae · | Mezheven · | Gouere · | Eost · | Gwengolo · | Here · | Du · | Kerzu |
| ||||||||||||||||||||||||||||||||||||||||||
Eil miz ar bloaz eo C'hwevrer en deiziadur gregorian.
Miz berrañ ar bloavezh eo, 28 deiz ennañ ; un devezh ouzhpenn a vez bep pevar bloaz, er bloavezhioù bizeost evel 2020.
Dont a ra an anv brezhonek eus an anv-gwan latin februarius, « miz ar glanaat », eus februare « glanaat », diwar anv an doueez roman Febris, deuet diwar anv an doue etrusk Februus ar glanaer : gouel ar glanaat en nevezamzer e oa ar februa, februalia, a veze lidet da 15vet devezh ar miz-se.
Lidoù
kemmañ- D'an 2 e vez Gouel Maria ar Gouloù en Iliz katolik roman, ma lider kinnig Jezuz gant e dud e templ Jeruzalem.
Krennlavaroù
kemmañ- « An Ened sec'h, Pask kailharek / A laka an arc'h da varrek »[1]
- « Ar voualc'h a gan e miz C'hwevrer eo gwelloc'h dezhi tevel »
- « Da c'houel Chandelour / Deiz da c'hwec'h eur da bep micherour / Nemet d'ar c'hemener ha d'ar gwiader »
- « Da c'houel Maria ar gouloù / Kuzhet ar c'hantolerioù / Ha torret ar c'hegeloù / Hanter greun, hanter bloaz / An had diavaez / An ozhac'h en e aez »
- « Da c'houel Mathiaz / Ar piged a ra o neizh »
- « Da c'houel Mathiez / Vi e revr an houadez / Hag ar big a choaz he farez »[2]
- « Da c'houel ar Chandelour / Deiz da bep micherour / Nemet d'ar c'hemener / Ha d'al luguder »
- « Deuet Meurlarjez pa garo / Pask pe Gazimodo / En Ebrel en em gavo »
- « Diouzh an heol Meurlarjig / Diouzh an etev, Paskig »
- « Etre Pask ha Meurlarjez / Seizh sizhun nemet daou zeiz / Etre Pask ha Pentekost / Seizh sizhun penn ha lost »
- « Gouel Mari ar Chandelour / Deiz da bep micherour / Ar c'hantolorioù en tan / Hag ar vatezh da gousket / Pa vez debret he c'hoan »
- « Gouel Mari ar gouloù, gora ar chandelour / Hir a-walc'h an deiz d'an ozhac'h da labourat / Ha d'ar wreg da gribat »
- « Gouel sant Mathiaz / Ne savo ket ar c'hoad e glas / Troc'het hiziv, sec'h warc'hoazh »
- « Mar deuje Meurlarjez teir gwech ar bloaz / E lakaje an dud da redek en noazh »
- « Meurlarjez 'tal an tan, Pask en nor »
- « Meurlarjez kailharet / Arc'h ha solier barrek »
- « Meurlarjez me 'garfe 'vefe bemdez / an eost div wech ar bloaz / Ha gouel Mikael bep seizh vloaz »[3]
- « Miz C'hwevrer : hanter blouz, hanter foenn, hanter gerc'h / Hag al lodenn vrasañ c'hoazh war-lerc'h »
- « Miz C'hwevrer a c'hwezh, a c'hwezh / Hag a lazh ar voualc'h war he neizh »
- « Ret eo lakaat piz e glec'h / N'eo ket hiziv evel dec'h[4]
- « Tremenet gouel sant Mathaiz / An heol d'e liv, an dour d'e blas / Ha lezenn an hent da vezañ glas »
Notennoù
kemmañ- ↑ Ened : predad gouelioù etre gouel ar Rouaned (06/01) ha Merc'her al Ludu (deiz kentañ ar C'hoariz, 46 devezh a zioueroù etre Meurlarjez ha Pask) ; e 2019 e red an Ened eus ar 06/01 betek ar 06/03, Meurlarjez o vout d'ar 05/03 hag e red ar C'hoariz adalek ar 06/03 betek an 21/04.
- ↑ Mathiez : 24/02.
- ↑ Da c'houel Mikael e veze paeet ar feurmoù, ha tutaet mevelien.
- ↑ Da Verc'her al Ludu. »
