Ciocciu

U ciocciu minori
Otus scops
Classifica scentifica
Regnu	Animalia
Divisioni	Chordata
Classa	Aves
Ordini	Strigiformes
Famiglia	Strigidae
Genaru	Otus
Nome binuminali
Otus scops Linnaeus, 1753

U Ciocciu minori (Otus scops) hè un aceddu chì faci parti di a famiglia di i Strigidae. Hè u più chjucu frà i strigidi aurupei dopu à a civetta nannara. Righjunghji appena i diminsioni di a merula.

Discrizzioni

U ciocciu minori hè longu 18-21 cm. L'apartura di l'ali hè 47-55 cm. A coda hè longa 6,7-7,5 cm. U bizzicu hè longu 17-19 mm. U ciocciu pesa 56-102 g. L'imprissioni di i prupurzioni è di i diminsioni di sta spezia dipendi assà da a pusizioni di i curnetti: minusculi, facini simbrà u ciocciu chjucu, chjattu è incù una testa maiori (in stu modu pudaria ancu essa cunfusu incù a civetta). Incù l'arechji pilosi pienamenti rialzati è micca sempri evidenti, u ciocciu pari inveci magru, incù a testa chjuca è più grandi chì ciò ch'eddu hè in veru. Rispettu à a civetta hè più allungatu ed hà u capu più chjucu è più appiattitu. U ciocciu hà un piumaghju pichjulatu di brunu grisgicciu, chì và da u grisgiu à u marronu castagnu sottu l'ali incù parechji tacchi bianchi evidenti annantu à u dossu. U so purtamentu hè assà eleganti. L'ochji ani un'iridi di culori arancinu chì tendi à u giaddu. In a parti infiriori di u corpu si trovani dinò strisci neri beddi visibuli.

Biulugia

Stu rapaci vivi di solitu sulitariu, calchì volta in picculi gruppi. U ciocciu minori hè un aceddu attivu soprattuttu di notti incù un prufilu d'attività di dui fasi. U puntu principali di a so attività righjunghji u culminu prima di mezanotti. Trà mezanotti è dui ori hè attivata par u più una fasa di pausa. À u tramontu o pocu dopu u ciocciu compii a so fasa di pausa, è à i primi luci di l'alba si ritira in u so rifughju è trascorri la ghjurnata di solitu senza particulari muvimentu. Friquenti pause di pulizia intarrompini 'ssu periodu di riposu. Sò stati ussirvati, ancu puri raramenti, veri è probbii bagni di soli o di rena.

Boci

U cantu di u ciocciu minori ùn si pò cunfonda: hè un "djü" o "chjù" micca particularamenti forti, un pocu' nasali è guasi sempri monusillabicu guasi com'è s'eddu era una sonda, chì à spessu hè ripitutu duranti l'ori incù un intarvallu chì và da dui à 3,5 sicondi. Calchì volta a nota principali hè priceduta d'un sonu iniziali, tantu ch'è l'appeddu sembra bisillabicu. Apposta ch'è u ciocciu movi u capu duranti u cantu, hè difficiuli da lucalizà riguardu à i so richjami. L'attività di cantu cumencia pocu dopu à u tramontu è finisci à l'alba. Dopu à mezanotti l'attività di richjamu diminuisci chjaramenti par una o dui ori. I femini è i masci cantani à spessu in duettu, a femina chjama incù una intunazioni un pocu più alta è un pocu menu rigularamenti ch'è u masciu.

Ripruduzioni

Otus scops

I ciocci minori suvitani un matrimoniu staghjunali monugamu. Ancu in casu di perdita prumaticcia di u cumpagnu un antru accuppiamentu avveni solu raramenti. L'aceddi sò dighjà maturi sissualmenti à l'ità di deci mesa. Apposta ch'eddi nidificheghjani in i sapari, i ciocci minori covani soprattuttu in i tafona di l'arburi. Uccasiunalamenti aprodani ancu cavità di scogli è edifizii.

A cuvata di u ciocciu minori, chì hè cumposta da trè o cinqui ova, hè diposta solu da a femina. A femina i cova par 25 ghjorna è dopu à a sbucciata i piulacona escini fora dopu à circa 21-22 ghjorna è sò curati in generali da i dui genitori. Dighjà à 40 ghjorna sò capaci di caccià in modu autunomu i predi, ma sò curati da i genitori par dinò 20 ghjorna.

I masci è i femini aprodani, ancu duranti a cura di a prughjinitura, solu piuttostu raramenti listessu arburi par dorma è u cuntattu curporeu in a fasa di calma ùn hè micca statu ussirvatu fora di a staghjoni di l'accuppiamenti. Duranti u periodu di cova è di nutrimentu hè soprattuttu u masciu chì surveglia u locu di cuvata. I piulacona riposani par u più stretti l'uni à l'altri annantu à un ramu in i circonda di u fustu.

Nutrimentu

Un ciocciu annantu à un arburi

U ciocciu minori hè soprattuttu un cacciadori d'insetti. Ma si nutrisci ancu di mignoculi. Trà i predi ci sò solu aceddi minori è ruspi. Solu raramenti u ciocciu caccighjeghja i topa è altri picculi mammiferi.

A preda hè lucalizata da una pusizioni bassa è sbattuta dopu in terra. Solu raramenti caccighjeghja u ciocciu minori mentri u bulu o da terra. Ma ùn si sà sempri micca incù chì tecnica di caccia eddu attacca l'aceddi.

A tecnica di cattura di i picculi aceddi si basa annantu à u "magnitisimu" (par u più l'ochji) incù u quali l'aceddu stendu in fermu induci picculi aceddi à avvicinà si d'eddu.

Ripartizioni

U ciocciu minori hè prisenti in parti assà di l'Auropa, di l'Africa Nordu è di l'Asia uccidentali. Omu u trova dinò in certi righjoni di u Mediu Urienti. Prifirisci l'ambienti buscosi, tali i furesti, i buschetti è i parchi, ind'eddu pò appuddà si annantu à i rami bassi di l'arburi.

In Corsica

U ciocciu minori hè prisenti è cumunu in Corsica.

Cunsirvazioni

U ciocciu minori hè classificatu com'è una spezia di priaccupazioni minori da l'Unioni internaziunali par a cunsirvazioni di a natura (UICN). Eppuri, certi pupulazioni lucali poni essa minacciati par via di a distruzzioni di u so ambienti naturali, di a polluzioni luminosa è di a caccia illegali. I misuri di cunsirvazioni, tali a prutizzioni di i zoni buscosi è a sinsibilisazioni di u publicu, sò nicissarii pà assicurà a sopravvivenza di 'ssa spezia à longu andà.

Citazioni

U ciocciu hè mintuvatu:

• in a puisia U ciocciu è u corbu di Carulu Giovoni:

À fà di ghjornu, quandu a notte si n'andava

Capulendu a luna, u sole s'annunciava

In un' oscura furesta

S'infattonu testa à testa

Dui acelli di preda o di malincunia:

Apria l'ochji u corbu è lu ciocciu i chjudia.

• in a puisia I pienta di a machja d' Achilli Bartuli:

A notti sintiu cantà

È u malaceddu,

I ghjacari abbaghjà,

A vulpi racanà.

• in u pruverbiu: Ùn parlà di ciocciu in Ampriani.
• in u pruverbiu: Ùn parlà di ciocciu in Poghju. (Poghju si riferisce quì à U Poghju di Nazza)
• in a sprissioni: dorma com'è un ciocciu

Bibliugrafia

• Ciavatti, Petru (dir. ridazzioni) Dizziunariu U Muntese, 1984, Albiana
• Thibault, Jean-Claude, Acelli di Corsica - Les oiseaux de Corse, 1983, PRNC (in francesu)
• J.-C. Thibault & G. Bonaccorsi, The birds of Corsica, British Ornithologists’ Union, Check-list n°17, 1999

Liami

• Videu di ciocciu vicinu à U Spiluncatu

Altri prugetti

• Otus scops annantu à Wikimedia Commons.