Esperidi

L' Esperidi (o Esperide) sò figuri di a mitulugia greca, figli femini di a Notti. Sicondu i lighjendi, custudiani u giardinu di i meli d'oru d'Era. Eppuri, parechji virsioni pusteriori i facini figlioli femini d'Atlanti.

U giardinu di l'Esperini, dipintu, circa 1869-1873, in Hamburger Kunsthalle

Urighjina è parintedda

L'Esperidi erani ninfi chì a so genealugia ferma à spessu cunfusa: sò calchì volta cunsidarati com'è figli di a Notti, di Teti è Uceanu, di Zeus è Temi, di Forco è Cetu è ancu, sicondu a tiuria più accriditata, d'Atlanti è Esperide. Incertu hè puri u so numaru, tantu ch'è parechji mitugrafi mintuveghjani cinqui Esperidi, è altri ni mintuveghjani setti. Certi sottuliniani inveci ch'eddi erani trè, cullighendu li à a triplici dea di a Luna in u so aspettu di suvrana di a morti. I numari riferiti vani quantunqua da una à ondici, è parechji di i so noma sò: Egle, Aratusa, Esperia o Esperetusa, Eriteide è cetara.

Attività è carattaristichi

U giardinu di l'Esperidi (1892) di Frederick Leighton

In ogni modu, ferma certu ch'eddi viviani in l'estremu Uccidenti di u mondu, oltri i cunfini di a terra abitata, è ch'eddi pussidiani quà un ortu maravigliosu ind'eddi aviani u compitu di custudiscia u priziosu arburi chì dava meli d'oru, donu di Gea par i nozzi di Zeus incù Era. Par maiò sicurezza, affinch'è i stessi Esperidi ùn cuglissini micca i prudigiosi meli, Era avia urdinatu à a sarpi Ladone da i centu testi di priseda à a vardia, stendu custantamenti atturcinata intornu à u fustu di l'arburi. Atlanti sustinia a volta di u celi pocu distanti da a terra di i figli femini, è Elios, divinità di u soli, tarminatu u so corsu cutidianu, scindia in u giardinu (u soli tramonta infatti à l'Uccidenti) è ci lasciava i cavaddi di u so carru à pascia, è incun eddi ripusava quì duranti a notti.

L'Esperidi sò culligati cusì à u tramontu, quandu i culori ch'eddu assumi u celi ricordani, par appuntu, quiddi di una mela carca di frutti durati. In tutti i raconti sò quantunqua custodii d'ughjetti magichi: hè dunqua pussibuli chì l'Esperidi possini essa assuciati à riti sicreti, chì si tiniani à a trabucinata incù dolci miludii, parchì ancu u cantu, à tempu cù a danza, hè una di i prirugativi chì l'erani assignati.

Vicendi mitulogichi

Erculu arrubendu i meli d'oru di u giardinu di l'Esperidi. Ditagliu di i Dodici lavori d'Erculu Mosaica rumana di Llíria, in iSpagna (3u seculu).

Una celebra passata narra chì, strappati à a so terra à tempu cù i so greghji da parechji pirati à l'ordini di Busiride rè d'Egittu, l'Esperidi funi dopu libarati da Erculu, chì i restituì à u patri Atlanti, uttinendu com'è ricumpensa l'insignamentu di l'astrunumia. Erculu cumparisci dinò in un antru racontu liatu à l'Esperidi. Par cunquistà i priziosi meli com'è da vulintà di u rè Euristeu, Erculu duviti ricorra à l'aiutu d'Atlanti, è sustituiscia lu timpuraniamenti in a vardia à i pilastri di u celi è purtà u mondu nantu à i spaddi. Ma l'ostacolu maiò era custituitu da Ladone, chì custudia i meli d'oru par vulintà d'Era. Ùn ci hè micca accordu trà i mitugrafi annantu à u fattu chì Erculu aghji divutu abbatta sta criatura chì ùn chjudia mai l'ochji, parchì parechji parlani d'una cunsegna 'pacifica' di i frutti da parti d'Atlanti o di i stessi Esperidi.

Si conta, d'altra parti, chì Erculu uccisi a sarpi scucchendu una freccia da sopra i mura di l'ortu custruiti da Atlanti. Era poti solu attinuà u so dulori par a morti di Ladone punendu ni l'imaghjini trà l'astri, com'è custiddazioni di a Sarpi; i meli colti da Erculu li funi dopu ristituiti da Euristeu. Sicondu altri fonti, i meli vultàni inveci à Erculu; quiddu, à so volta, i deti à Afrudita, oppuri à Atena: a dea dicisi infini di renda li à Era, apposta ch'è ùn era micca currettu ch'eddi fussini dunati à chiunqua. Ci hè parò una trista cunclusioni: u ghjornu dopu à u cumpiimentu di l'impresa d'Erculu, in u stessu ortu ghjunghjitini à pona pedi l'Argunauti, chì assistetini à a trasfurmazioni in arburi (un piobbu neru, un saliciu è un olmu) di l'Esperidi, morti addisperati da a perdita di u so tisoru è di u so custodiu è prutittori amatu.

I meli aurei di l'Esperidi sò prisenti dinò in u mitu di Atalanta, zitedda vilucissima in a corsa chì sfidava i so pritindenti prumittendu sè stessa com'è premiu. Un di sti curtighjadori era Melanione (o Ippomene) chì, chirendu aiutu à Afrudita, riciviti da a dea trè meli d'oru di u Giardinu di l'Esperidi, chì à so volta Erculu l'avia rigalatu. Mentri si svuglia a cumpetizioni, Ippomene lanciò i meli una dopu à l'altra à terra, di tali manera chì Atalanta, irresistibilamenti attratta, si firmò à raccoglia li pirdendu cusì a cuntesa.

Icunugrafia

Han von Marées, "Esperidi (tritticu)", München, Neue Pinakothek

L'icunugrafia cuncirnendu l'Esperidi hè sviluppata par u più nantu à u tema d'Erculu è i meli d'oru, mentri i sughjetti guasi infriquenti sò quiddi di u rapimentu di i sureddi è a so mitamurfosa in arburi. I figurazioni più antichi di l'Esperidi ghjunti finu à no sò quiddi annantu à i vasi attichi à figuri rossi di u V seculu a.C., induva frà altru ùn appariscini micca moltu friquintamenti. Menu rari sò inveci i rapprisintazioni in a ceramica di l'Italia miridiunali.

A pruduzzioni artistica carattarizata da u sughjettu di l'Esperidi hè moltu schersa, ma mancu stampa assenti, duranti u Rinascimentu è par l'intreiu periodu chì si stendi da u XVII à u XVIII seculu.

Sughjettu analogu à quiddu di l'Esperidi danzanti è tinendu si par a mani hè quiddu di i trè Grazia, chì a so furtuna artistica fù maiori.

I meli d'oru è a sarpi Ladone sò l'attributi distintivi di l'Esperidi, figurati com'è graziosi ziteddi femini chì u più suventi campani in trè è sò carattarizati da un'esprissioni nustalgica. Ripprisintati generalamenti vistuti à a diffarenza di i Grazia, sò culligati à u tramontu è cuntenini par quissa un alonu di misteru magicu.

Fonti

'Ss'articulu pruveni in parti o in tutalità da l'articulu currispundenti di a wikipedia in talianu.