Ffugysgrifeniadau

Testunau apocryffaidd a briodolir yn anghywir yw ffugysgrifeniadau (Groeg: pseudepigraphos). Defnyddir yr enw gan amlaf yng nghyd-destun y Beibl, i ddisgrifio'r testunau nas cynhwysir yng nghanon yr Hen Destament gan unrhyw o'r prif enwadau Cristnogol, na chan yr Iddewon yn y Beibl Hebraeg. Maent felly, ynghyd â'r gweithiau isganonaidd, yn ffurfio apocryffa'r Hen Destament. Priodolir y rhain i gyd i awduron a sonir amdanynt yng nghanon yr Hen Destament, ac maent yn dyddio o'r cyfnod rhyngdestamentaidd (2g CC i'r 2g OC), a ni cheir ffynonellau Hebraeg nac Aramaeg gwreiddiol ohonynt. Ysgrifennwyd yn Lladin, Groeg, Syrieg, Georgeg, Armeneg, Copteg, ac Ethiopeg. Cafwyd hyd i ragor o ffugysgrifeniadau, yn Hebraeg ac Aramaeg, yn Sgroliau'r Môr Marw.

Rhennir y ffugysgrifeniadau yn ddatguddiadau, testamentau, gweithiau sy'n ymhelaethu ar straeon canonaidd yr Hen Destament, llên ddoethineb, a gweddïau, salmau, a chaniadau. Mae'r mwyafrif o'r gweithiau, ar wahân i'r datguddiadau, yn ddienw, a bod yn fanwl gywir nid ydynt wedi priodoli ar gam i awdur Beiblaidd, er bod eu harddull a'u cynnwys yn ymhonni taw testunau Beiblaidd ydynt. Testunau Iddewig ydy'r mwyafrif ohonynt, ac mae ambell un yn cynnwys rhyngosodiadau o natur Gristnogol.

Datguddiadau

• Llyfr Cyntaf Enoch, neu Ddatguddiad Ethiopeg Enoch
• Ail Lyfr Enoch, neu Ddatguddiad Slafoneg Enoch
• Trydydd Llyfr Enoch, neu Ddatguddiad Hebraeg Enoch
• Oraclau'r Sibyl
• Traethawd Shem
• Apocryffon Eseciel
• Datguddiad Seffaneia
• Pedwerydd Llyfr Esra
• Datguddiad Groeg Esra
• Gweledigaeth Esra
• Cwestiynau Esra
• Datguddiad Esra
• Datguddiad Sedrach
• Ail Lyfr Baruch, neu Ddatguddiad Syrieg Baruch
• Trydydd Llyfr Baruch, neu Ddatguddiad Groeg Baruch
• Datguddiad Abraham
• Datguddiad Adda
• Datguddiad Elias
• Datguddiad Daniel

Testamentau

• Testamentau'r Deuddeg Patriarch
• Testament Job
• Testamentau'r Tri Phatriarch
• Testament Moses
• Testament Solomon
• Testament Adda

Helaethiadau ar hanesion a chwedloniaeth yr Hen Destament

• Llythyr Aristeas
• Llyfr y Jiwbilïau
• Merthyrdod a Dyrchafael Eseia
• Joseff ac Asenath
• Buchedd Adda ac Efa, a gyfieithwyd i'r Gymraeg fel Ystoria Adaf ac Efa y Wreic
• Ffug-Philo
• Bucheddau'r Proffwydi
• Ysgol Jacob
• Pedwerydd Llyfr Baruch
• Jannes a Jambres
• Hanes y Rechabiaid
• Eldad a Medad
• Hanes Joseff

Llên ddoethineb

• Ahiqar
• Trydydd Llyfr y Macabeaid
• Pedwerydd Llyfr y Macabeaid
• Gwirebau'r Ffug-Phocylides (gwirebau Iddewig a briodolir i'r bardd Ïonaidd Phocylides, c. 50 CC–100 OC)
• Brawddegau Menander o Syria

Gweddïau, salmau, a chaniadau

• Salmau 152–155, a briodolir i Ddafydd
• Gweddi Manasseh (a ystyrir hefyd yn waith isganonaidd)
• Salmau Solomon
• Gweddïau Synagogaidd Helenistaidd
• Gweddi Joseff
• Gweddi Jacob
• Salmau Solomon