Sboncen
Gêm pêl a raced i ddau neu bedwar o chwaraewyr yw sboncen.[1] Chwaraeir â racedi a phêl rwber fechan a fwrir yn erbyn waliau cwrt caeedig.
 | |
| Enghraifft o'r canlynol | math o chwaraeon, difyrwaith  |
|---|---|
| Math | chwaraeon peli, chwaraeon raced |
 Ffeiliau perthnasol ar Gomin Wicimedia | |
Datblygodd sboncen o'r gêm racedi yn ysgolion bonedd Lloegr yng nghanol y 19g. Ar droad y ganrif, adeiladwyd cyrtiau preifat a sefydlwyd clybiau cynnar yng Nghaerfaddon a Llundain. Ffynnodd y gêm yn Lloegr wedi'r Rhyfel Byd Cyntaf, a chytunwyd ar y rheolau. Yn Unol Daleithiau America, chwaraeid gêm ychydig wahanol o'r enw tenis sboncen ac yn defnyddio pêl a racedi tenis lawnt. Cafodd cystadlaethau cynnar rhwng Prydain a'r Unol Daleithiau eu rhwystro felly oherwydd gwahaniaethau rhwng y cyrtiau a'r dull sgorio. Cyflwynwyd sboncen o Loegr i wledydd yr Ymerodraeth Brydeinig, ac yn hwyrach i wledydd eraill. Heddiw, mae Ffederasiwn Sboncen y Byd yn hyrwyddo'r fabolgamp ac yn trefnu pencampwriaethau rhyngwladol.[2] Mae sboncen yn un o chwaraeon Gemau'r Gymanwlad ond nid yn rhan o'r Gemau Olympaidd.
Ymhlith mawrion y gêm mae'r Eifftiwr F. D. Amr Bey, y teulu Khan o Bacistan (gan gynnwys Jahangir Khan), y Saesnes Janet Morgan, ac Heather McKay (Blundell gynt) o Awstralia.
Cyfeiriadau
golygu- ↑ sboncen. Geiriadur Prifysgol Cymru. Adalwyd ar 19 Mehefin 2017.
- ↑ (Saesneg) squash rackets. Encyclopædia Britannica. Adalwyd ar 19 Mehefin 2017.